Taba Ya Letlakala La Ka Ntle
Kamoo o ka Fetošago Mekgwa ya Gago
-
AUSTIN o ikwa a sa nyaka go robala le ka morago ga gore alamo e mo tsoše. Eupša gateetee o a tsoga, a apara diaparo tša go itšhidulla tšeo a di lokišitšego pele a robala ke moka a ya go kitima
—go etša ge a tlwaetše go dira bjalo gararo ka beke go tloga ngwageng o fetilego. -
Laurie o sa tšwa go kgakgana le monna wa gagwe. A galefile, o ya ka khitšhing ka go akgofa, a ntšha mokotla wa ditšhokolete gomme a di ja ka moka
—go etša ge a tlwaetše go dira bjalo ge a galefile.
Ke eng seo Austin le Laurie ba swanago ka sona? Go sa šetšwe gore ba lemoga seo goba go se bjalo, bobedi bja bona ba laolwa ke matla a itšego, e lego mekgwa ya bona.
Go thwe’ng ka wena? Na go na le mekgwa e mebotse yeo o nyakago go šomela go yona? Mohlomongwe o nyaka go itšhidulla ka mehla, go robala ka mo go lekanego, goba go dula o ikgokaganya le bao o ba ratago.
Ka lehlakoreng le lengwe, mohlomongwe o nyaka go tlogela mekgwa e mebe e bjalo ka go kgoga, go dula o e ja dijo tšeo di se nago phepo goba go fetša nako e ntši o diriša Inthanete.
Ke therešo gore go ka ba thata go tlogela mekgwa e mebe. Ge e le gabotse, go thwe mekgwa e mebe e swana le mpete o borutho ge go tonya: go bonolo go thoma mekgwa yeo eupša go thata go e tlogela!
Ka gona o ka fetoša bjang mekgwa ya gago gore e go hole go e na le gore e go gobatše? Ela hloko mehlala e meraro e latelago yeo e hwetšwago ka Beibeleng.