“O Thabêlê Moxatš’axo wa Mehla Yela ò sa le yo Mofsa”
“O Thabêlê Moxatš’axo wa Mehla Yela ò sa le yo Mofsa”
“O thabêlê moxatš’axo wa mehla yela Ò sa le yo mofsa; . . . Ngwan’a-ka! O ka thabêla bya’ng o šele?”—DIEMA 5:18, 20.
1, 2. Ke ka baka la’ng go ka thwe lerato la magareng ga monna le mosadi le šegofaditšwe?
BEIBELE e bolela ka go lebanya ka dikopano tša botona le botshadi. Go Diema 5:18, 19, re bala gore: “Sediba sa xaxo a se šexofalê, O thabêlê moxatš’axo wa mehla yela Ò sa le yo mofsa; Yêna mo-ka thsêphê xo ratêxa, mo-ka komé ka bonatla. A nkê O fêlê O kxôlwa ke botse bya xaxwe; O fêlê O thabêla ’ratô la xaxwe.”
2 “Sediba” seo go bolelwago ka sona mo ke mothopo wa kgotsofalo ya tša botona le botshadi. Se šegofaditšwe ka gobane maikwelo a lerato le lethabo ao a thabelwago ke banyalani ke mpho e tšwago go Modimo. Lega go le bjalo, lethabo le le swanetše go thabelwa feela lenyalong. Ke ka baka leo Kgoši Salomo wa Isiraele ya bogologolo, mongwadi wa Diema, a botšišago ka tsela e sa hlokego karabo gore: “Ngwan’a-ka! O ka thabêla bya’ng o šele? O ka xokarêla bya’ng mosadi e sexo wa xaxo?”—Diema 5:20.
3. (a) Therešo e nyamišago ka manyalo a mantši ke efe? (b) Modimo o lebelela bohlotlolo bjang?
3 Ka letšatši la bona la lenyalo, monna le mosadi ba dira keno e kgonthišeditšwego ya gore ba tla ratana le go dula ba botegelana. Lega go le bjalo, manyalo a mantši a senywa ke bohlotlolo. Ge e le gabotse, ka morago ga go hlahloba dinyakišišo tše 25, monyakišiši yo mongwe o ile a phetha ka gore “25 lekgolong ya basadi le 44 lekgolong ya banna ba ile ba dira bohlotlolo.” Moapostola Paulo o boletše gore: “Le se ke la timetšwa. Ge e le diotswa, goba barapedi ba medimo ya diswantšho, goba dihlotlolo, goba banna ba ba boloketšwego merero yeo e sego ya tlhago, goba banna ba ba robalago le banna . . . ba ka se je bohwa bja mmušo wa Modimo.” (1 Bakorinthe 6:9, 10) Taba ye e molaleng. Bohlotlolo ke sebe se segolo mahlong a Modimo, le gona barapedi ba therešo ba swanetše go itiša malebana le go se botege lenyalong. Ke’ng seo se tla re thušago go ‘boloka lenyalo le hlomphega le malao a lenyalo a se na ditšhila’?—Baheberu 13:4.
Phafogela Pelo ya go Radia
4. Ke ditsela dife tše dingwe tšeo ka tšona Mokriste a ikhwetšago a tsene a sa lemoge tswalanong ya lerato le motho yo a sa nyalanago le yena?
4 Tikologong ya lehono ya batho bao ba gobogilego, batho ba bantši “ba na le mahlo a tletšego bohlotlolo gomme ba palelwa ke go tlogela sebe.” (2 Petro 2:14) Ba phegelela go ba le ditswalano tša lerato le batho bao ba sa nyalanago le bona. Mafaseng a mangwe, palo e kgolo ya basadi e gapeletšega go šoma, le gona go šoma le batho ba bong bjo bo fapa-fapanego go bakile gore go be le go ratana ga bašomi-gotee mo go sa swanelago. Le gona, mekero ya poledišano ya Internet e dirile gore go be bonolo gaešita le go batho ba ba nago le dihlong gore ba thome go tlwaelana kudu le batho ba bangwe ba diriša mokero wo. Batho ba bantši bao ba nyetšego goba ba nyetšwego ba wela molabeng o bjalo ba sa lemoge gore ba diragalelwa ke eng.
5, 6. Mosadi yo mongwe wa Mokriste o ile a ba molabeng wa boemo bjo kotsi ka tsela efe, gomme re ithuta’ng go se?
5 Ela hloko kamoo Mokriste yo re tla mmitšago Mary a ilego a akaretšwa a sa lemoge boemong bjo bo ilego bja nyaka bo mo lebiša boitshwarong bjo bo gobogilego bja tša botona le botshadi. Monna wa gagwe yo e sego yo mongwe wa Dihlatse tša Jehofa o be a sa bontšhe gore o rata lapa la gagwe. Mary o gopola nako e nngwe nywageng e sa tšwago go feta ge a be a kopana le monna yo a šomago le monna wa gagwe. Monna yoo o be a le botho e le ruri gomme ka morago o ile a bontšha kgahlego bodumeding bja Mary. Mary o re: “O be a kgahliša, a fapane kudu le monna wa-ka.” Go se go ye kae, Mary le monna yo a šomago le monna wa gagwe ba ile ba thoma go ba le maikwelo a lerato seng sa bona. O be a nea mabaka ka gore: “Ga se ka dira bohlotlolo, le gona monna yo o kgahlegela Beibele. Mohlomongwe nka mo thuša.”
6 Pele ga ge maikwelo a gagwe a lerato a mo diriša bohlotlolo, Mary o ile a hlaphogelwa. (Bagalatia 5:19-21; Baefeso 4:19) Letswalo la gagwe le ile la thoma go šoma, gomme o ile a lokiša boemo. Phihlelo ya Mary e bontšha gore “pelo ké yôna mmata-mâno-mabe, ké yôna lešaedi.” (Jeremia 17:9) Beibele e re eletša ka gore: “Mo xo tšohle di dišwaxo, diša pelo y’axo; xobane bophelô bo hlaxa xo yôna.” (Diema 4:23) Re ka dira bjalo bjang?
‘Mohlale o a Khuta’
7. Ke go latela keletšo efe ya Mangwalo mo go tla re šireletšago ge re thuša motho yo a nago le mathata a lenyalo?
7 Moapostola Paulo o ngwadile gore: “Anke yo a naganago gore o eme a hlokomele gore a se we.” (1 Bakorinthe 10:12) Le gona Diema 22:3 e re: “Mohlale ó bôna dikotsi di s’e-tla, a khuta.” Go e na le go nagana ka go ikholofela kudu gore, ‘Nka se diragalelwe ke selo,’ o tla ba o le bohlale ge o lekodišiša maemo ao a ka lebišago mathateng. Ka mohlala, phema go ba motho yo a utollelwago diphiri ke motho wa bong bjo bo sa swanego le bja gago yo a lebeletšanago le mathata a ferekanyago a lenyalo. (Diema 11:14) Botša motho yo a go utollelago mathata a gagwe a lenyalo gore go kaone go boledišana ka mathata ao le molekane wa gagwe, Mokriste yo a godilego ka tsebo wa bong bjo bo swanago le bja gagwe yo a nyakago gore lenyalo le atlege goba a boledišane le bagolo. (Tito 2:3, 4) Bagolo ka diphuthegong tša Dihlatse tša Jehofa ba bea mohlala o mobotse tabeng ye. Ge mogolo a nyaka go boledišana ka sephiring le kgaetšedi wa Mokriste, o dira bjalo mo a bonwago ke bohle—bjalo ka Holong ya Mmušo.
8. Ke temošo efe yeo e lego bohlokwa mošomong?
8 Mošomong le lefelong le lengwe, phafogela maemo ao a ka dirago gore o tlwaelane kudu le batho ba bong bjo bo sa swanego le bja gago. Ka mohlala, go fetša diiri tše di oketšegilego o šoma le motho yo mongwe wa bong bjo bo fapanego le bja gago go ka lebiša tekong. O le monna yo a nyetšego goba mosadi yo a nyetšwego, o swanetše go tiiša ka ganong le go bontšha ka boitshwaro gore ga o nyake go tsenela tswalano e bjalo ya lerato ka ge o e-na le molekane wa gago. Bjalo ka motho yo a dulago a kgomaretše boineelo bja gagwe go Modimo, ruri o ka se rate go dira gore motho a be le kgahlego e sa nyakegego go wena ka go bapala ka lerato goba ka go se apare goba go itokiša gabotse. (1 Timotheo 4:8; 6:11; 1 Petro 3:3, 4) Go bea dinepe tša molekane wa gago le tša bana ba gago mo o šomelago gona e tla ba kgopotšo go wena le ba bangwe gore go na le dilo tšeo o di lebelelago e le tša bohlokwa. Ikemišetše gore o se ke wa kgothaletša—goba gaešita le go kgotlelela—dikgoketšo tša lerato tša motho yo mongwe.—Jobo 31:1.
“Thabišana le Mosadi W’axo yo O mo Rataxo”
9. Ke tatelano efe ya ditiragalo yeo e ka dirago gore go be thata go phema tswalano e mpsha ya lerato?
9 Go šireletša pelo go nyaka se se fetago go fo phema maemo a kotsi. Go thoma go rata motho yo mongwe yo o sa nyalanago le yena e ka ba pontšho ya gore monna le mosadi ga ba hlokomelane dinyakweng tša bona. Mohlomongwe mosadi o dula a hlokomologwa goba monna o dula a swaiwa diphošo. Gatee-tee motho yo mongwe—e ka ba yo go kopanwago le yena mošomong goba gaešita le ka phuthegong ya Bokriste—a ka bonagala a e-na le dika tšona tšeo molekane wa motho a se nago tšona. Go se go ye kae go thoma go ba le selo seo se golago, gomme tswalano e mpsha e ba yeo e goketšago ka tsela yeo e ka se phemegego. Go latelelana mo ga ditiragalo go kgonthišetša therešo ya mantšu a Beibele a rego: “Yo mongwe le yo mongwe o lekwa ka go gogwa le go goketšwa ke kganyogo ya gagwe.”—Jakobo 1:14.
10. Banna le basadi ba ka tiiša tswalano ya bona bjang?
10 Go e na le go lebelela ka kua ntle ga lenyalo bakeng sa go kgotsofatša dikganyogo tša bona—e ka ba tša lerato, segwera goba go thekgana nakong ya mathata—banna le basadi ba swanetše go katanela go tiiša tswalano ya lerato le balekane ba bona. Fetšang nako le le gotee ka mo le ka kgonago ka gona gomme le be bao ba batamelanego. Gopolang seo se ilego sa dira gore le ratane. Leka go ba le borutho bjo o bego o e-na le bjona go motho yo a ilego a ba molekane wa gago. Nagana ka dinako tše di thabišago tšeo le ilego la di fetša gotee. Rapela Modimo ka taba ye. Mopsalme Dafida o lopile Jehofa ka gore: “Modimo, mpopêlê pelo e sekilexo. Buša O nneêlê môya wa xo tia ka teng xa-ka.” (Psalme 51:10) Ikemišetše go ‘thabišana le mosadi wa gago yo o mo ratago mehla yohle ya bophelo bja gago bjo Modimo a go neilego bjona tlase ga letšatši.’—Mmoledi 9:9.
11. Tsebo, bohlale le temogo di kgatha tema efe tabeng ya go tiiša tlemo ya lenyalo?
11 Dilo tšeo di sa swanelago go hlokomologwa tabeng ya go matlafatša lenyalo ke bohlokwa bja tsebo, bohlale le temogo. Diema 24:3, 4 e re: “Ngwakô ó axwa ka bohlale; ó thêwa ka thlaoloxanyô. Ké ka tsebô ’polokêlô xe di tlala thotô ya mehuta, ya bohlôkwa le matsaka.” Gare ga dilo tša bohlokwa tšeo di tlaleletšago lethabong la lapa ke dika tše bjalo ka lerato, potego, go boifa Modimo le tumelo. Go fihlelela dilo tše go nyaka gore re tsebe Modimo. Ka baka leo, banyalani e swanetše go ba babadi ba bagolo ba Beibele. Eupša bohlale le temogo di bohlokwa gakaaka’ng? Go swaragana ka katlego le mathata a letšatši le letšatši go nyaka bohlale, e lego bokgoni bja go diriša tsebo ya Mangwalo. Motho yo a nago le temogo o kwešiša dikgopolo le maikwelo a molekane wa gagwe. (Diema 20:5) Jehofa ka Salomo o re: “Ngwan’a-ka! Thaetša ’hlale bya-ka; thlaloxanyô ya-ka O e sêkêxêlê tsêbê.”—Diema 5:1.
Ge go E-na le “Tlaišego”
12. Ke ka baka la’ng go sa makatše gore banyalani ba ba le mathata?
12 Ga go na lenyalo le le phethagetšego. Beibele e bile e bolela gore banna le basadi ba tla ba le “tlaišego nameng.” (1 Bakorinthe 7:28) Dipelaelo, bolwetši, tlaišo le dilo tše dingwe di ka baka kgateletšego lenyalong. Lega go le bjalo, ge mathata a tsoga, le swanetše go tsoma tharollo le le gotee bjalo ka banyalani bao ba botegelanago bao ba nyakago go kgahliša Jehofa.
13. Monna le mosadi ba ka itlhahloba dikarolong dife?
13 Go thwe’ng ge e ba lenyalo le le kgateletšegong ka baka la tsela yeo banyalani ba swaranago ka yona? Go tsoma tharollo go nyaka boiteko. Ka mohlala, mohlomongwe mantšu a sego botho a thomile go dirišwa lenyalong la bona gomme ga bjale a tlwaelegile. (Diema 12:18) Go etša ge go hlalositšwe sehlogong se se fetilego, se se ka ba le mafelelo a gobatšago. Seema sa Beibele se re: “Xo dula lešokeng xo phala xo dula le mosadi wa swele le manganga.” (Diema 21:19) Ge e ba o le mosadi lenyalong le bjalo, ipotšiše gore, ‘Na mokgwa wa-ka o dira gore monna wa-ka a thatafalelwe ke go fetša nako a e-na le nna?’ Beibele e botša banna gore: “Tšwelang pele le rata basadi ba lena gomme le se ke la ba galefela o šoro.” (Bakolose 3:19) Ge e ba o le monna, ipotšiše gore, ‘Na ke itshwara ka tsela e sa bontšhego lerato, yeo e beago mosadi wa-ka tekong ya go nyaka khomotšo felo-tsoko?’ Ke therešo gore go itshwara ka tsela e gobogilego ka tša botona le botshadi go ka se lokafatšwe. Lega go le bjalo, taba ya gore kotsi e bjalo e ka direga ke lebaka le lebotse la go boledišana ka mathata ka bolokologi.
14, 15. Ke ka baka la’ng go tsoma khomotšo go motho yo o sego wa nyalana le yena e se tharollo ya mathata a lenyalo?
14 Go tsoma khomotšo mothong yo o sego wa nyalana le yena ga se tharollo ya mathata a lenyalo. Tswalano e bjalo e ka lebiša kae? Na e tla lebiša lenyalong le lefsa le le kaone? Ba bangwe ba ka nagana bjalo. Ba ka bolela gore: ‘Le gona, motho yo o na le dika tšona tšeo ke di nyakago go molekane.’ Eupša go nagana ka tsela e bjalo go fošagetše, ka gobane motho le ge e le ofe yo a ka tlogelago molekane wa gagwe—goba yo a ka go kgothaletšago gore o tlogele molekane wa gago—ruri ga a hlomphe go kgethega ga lenyalo. Ga go kwagale go letela gore tswalano yeo e feleletše ka lenyalo le kaone.
15 Mary, yo go boletšwego ka yena pejana, o ile a naganišiša ka mafelelo a tsela ya gagwe, go akaretša le go ipakela goba go bakela motho yo mongwe gore a se ke a amogelwa ke Modimo. (Bagalatia 6:7) O re: “Ge ke be ke thoma go hlahloba maikwelo ao ke bego ke e-na le ona go monna yo a šomago le monna wa-ka, ke ile ka lemoga gore ge e le gore ruri monna yo o be a tla amogela tsebo ya therešo, go ra gore ke nna ke bego ke mo šitiša. Go dira sebe go ka gobatša bohle bao ba akaretšwago le go kgopiša ba bangwe!”—2 Bakorinthe 6:3.
Lebaka le Legolo Kudu
16. Mafelelo a mangwe a go se hlweke boitshwarong ke afe?
16 Beibele e lemoša ka gore: “Melomo ya mosadi e sexo wa xaxo e rothiša todi ya dinose; lexano la xaxwe le thêlêla wa makhura. Mafêlô a tša xaxwe, ôna a baba wa lengána; ó xalefa wa lerumô la maxale a mabedi.” (Diema 5:3, 4) Mafelelo a boitshwaro bjo bo sa hlwekago a kweša bohloko le gona e ka ba a gobatšago. A akaretša go tshwenywa ke letswalo, malwetši ao a fetetšwago ka dikopano tša botona le botshadi le go gobala maikwelong ga molekane wa yo a sa kago a botega. Ka kgonthe le ke lebaka la go phema tsela yeo e ka dirago gore motho a se botege lenyalong.
17. Lebaka le legolo kudu la go dula re botega lenyalong ke lefe?
17 Lebaka la motheo leo le dirago gore go se botege lenyalong e be mo go fošagetšego ke gore Jehofa, Mothomi wa lenyalo le Monei wa tokišetšo ya go ba le dikopano tša botona le botshadi, o nyatša seo. O bolela ka moporofeta Maleaki gore: “Ké mo ke tl’o xo Le sekiša sekxaufsi, ka napa kè e-ba hlatse ya xo tšwa . . . diotswa.” (Maleaki 3:5) Diema 5:21 e bolela ka seo Jehofa a se bonago gore: “Hleng ’tsela tša monna di bônwa ke Morêna! Ó hlatha dinaô tša xaxwe ka moka.” Ee, “dilo ka moka di hlobotše e bile di molaleng mahlong a yo re ikarabelago go yena.” (Baheberu 4:13) Ka gona, lebaka le legolo kudu leo le dirago gore o dule o botega lenyalong ke go lemoga gore go sa šetšwe tsela yeo go se botege go ka bago go dirilwe khupamarama ka yona le kamoo mafelelo a gona mmeleng goba maikwelong a ka bonagalago e le a manyenyane ka gona, tiro le ge e le efe ya go se hlweke go tša botona le botshadi e senya tswalano ya rena le Jehofa.
18, 19. Re ithuta’ng phihlelong ya Josefa le mosadi wa Potifara?
18 Mohlala wa Josefa, morwa wa mopatriareka Jakobo o bontšha gore kganyogo ya go ba khutšong le Modimo ke tutuetšo e matla kudu. Ka ge a be a kgahla Potifara, e lego mohlankedi wa kgorong ya Farao, Josefa o ile a ba le boemo bjo bo hlomphegago lapeng la Potifara. Le gona Josefa e be e le “yo botse sebopêxô le sefahloxô,” e lego seo mosadi wa Potifara a ilego a se lemoga. Letšatši le letšatši, o be a leka go goketša Josefa, eupša maiteko a gagwe a ile a folotša. Ke’ng seo se dirilego gore Josefa a gane maiteko ka moka a mosadi yo? Beibele e re botša gore: “A xana a re: O k’O bônê, xe nna kè le xôna, mong wa-ka xa a hlôkômele selô mo lapeng . . . xa xo na se se sa lakwexo ke nna, xe e se wêna ka xe Ò le mosadi wa xaxwe. Xomme nka dira bya’ng bobe byo boxolo byoo ka senya pele xa Modimo?”—Genesi 39:1-12.
19 Josefa yo a bego a sa nyala o ile a dula a hlwekile boitshwarong ka go gana go ratana le mosadi wa monna yo mongwe. Diema 5:15 e botša banna bao ba nyetšego gore: “Nwaa meetse a ’diba e lexo sa xaxo, a tšwaxo mothôpong w’axo.” Itiše malebana le go aga maikwelo a lerato go motho yo o sa nyalanago le yena gaešita le ge e se ka maikemišetšo. Dira boiteko bja go matlafatša tlemo ya lerato lenyalong la gago, gomme o šome ka matla go lokiša mathata le ge e le afe a lenyalo ao le ka lebeletšanago le ona. Dira ka mo o ka kgonago ka gona, “o thabêlê moxatš’axo wa mehla yela Ò sa le yo mofsa.”—Diema 5:18.
O Ithutile’ng?
• Mokriste a ka wela bjang molabeng wa go ba le tswalano ya lerato a sa ikemišetša?
• Ke ditemošo dife tšeo di ka thušago motho gore a pheme go aga tswalano ya lerato yeo e lego ka ntle ga lenyalo?
• Banyalani ba swanetše go dira’ng ge ba e-na le mathata?
• Ke lebaka lefe le legolo kudu la go nyaka go dula o botega lenyalong?
[Dipotšišo tša Thuto]
[Seswantšho go letlakala 26]
Ka manyami, lefelo la mošomo e ka ba mo go bago le go ratana ga bašomi-gotee mo go sa swanelago
[Seswantšho go letlakala 28]
“Ké ka tsebô ’polokêlô xe di tlala thotô ya . . . matsaka”