1, 2. Ke ka baka la’ng e le mo go swanetšego gore o hlahlobe maikemišetšo a gago a go lebalela?

LENTŠU la Modimo le re thuša go ithuta kamoo Jehofa a lebelelago sebe ka gona le kamoo a ikwago ka gona ge re dira dibe. Le gona Lentšu la gagwe le bolela mo gontši ka taba ya go lebalela. Sehlogong se se fetilego, re boletše kudu kamoo boitshwaro bja Dafida le Manase bo dirilego gore Jehofa a ba lebalele. Go kwa ga bona bohloko le go nyama e le ka kgonthe ka baka la seo ba se dirilego go ile gwa dira gore ba ipobole, ba lahle mekgwa ya bona e kgopo gomme ba itshole go tšwa pelong. Seo se ile sa dira gore Jehofa a buše a ba amogele.

² Anke re ahlaahleng lehlakore le lengwe la taba ya go lebalela. Na o nagana gore o be o ka ba o ile wa ikwa bjang ka Manase ge nkabe yo mongwe wa batho bao a ba kwešitšego bohloko e be e le yo mongwe wa ba leloko la geno? Na o be o ka be o lebaletše Manase? Potšišo yeo ke ya bohlokwa lehono ka gobane re phela lefaseng leo le se nago molao, le šoro le la boithati. Ka gona, ke ka baka la’ng Mokriste a swanetše go hlagolela moya wa go lebalela? Le gona, ge e ba o rumolwa goba o swarwa gampe, ke eng seo se ka dirago gore o dule o išitše maswafo fase, o dire dilo ka tsela yeo Jehofa a nyakago gore o di dire ka yona gomme o ikemišetše go lebalela?

3-5. (a) Ke seswantšho sefe seo Jesu a ilego a se diriša go thuša batheetši ba gagwe go naganišiša ka bohlokwa bja go lebalela? (b) Ntlha ya seswantšho sa Jesu seo se begilwego go Mateo 18:21-35 ke efe?

³ Go ikemišetša ga rena go lebalela ba bangwe—go sa šetšwe gore ke ditho tša phuthego ya Bokriste goba ga se tšona—ke gabohlokwa ge e ba re tla ba le ditswalano tša khutšo le ditho tša lapa, bagwera, batho ba bangwe gaešita le Jehofa. Mangwalo a bontšha gore go ikemišetša ga rena go lebalela ba bangwe go sa šetšwe gore seo ba re dirilego sona ke se sebe gakaakang, ke senyakwa sa Bokriste. E le  gore Jesu a bontšhe go kwagala ga senyakwa se, o ile a diriša seswantšho sa mohlanka yo a bego a kolota kgoši ya gagwe.

⁴ Mohlanka yoo o be a kolota mong wa gagwe tšhelete e lekanago le mogolo wa matšatši a 60 000 000; eupša mong wa gagwe o ile a phumola molato woo. Ka morago ga moo, mohlanka yoo o ile a tšwa gomme a hwetša mohlankagotee le yena yo a bego a mo kolota tšhelete yeo e ka lekanago le mogolo wa matšatši a 100 feela. Mohlankagotee le yena o ile a mo lopa gore a se mo felele pelo, eupša mohlanka yoo molato wa gagwe o mogolo o bego o phumotšwe o ile a laela gore a lahlelwe kgolegong. Seo se ile sa galefiša mong wa bona. Mong wa bona o ile a mmotšiša gore: “Na . . . o be o sa swanela go gaugela mohlankagotee le wena bjalo ka ge le nna ke go gaugetše? Kgoši ya gagwe ya napa ya mo gafela go balebeledi ba kgolego e galefile, go fihla a lefa sohle seo a bego a se kolota.”—Mat. 18:21-34.

⁵ Ntlha ya Jesu e be e le efe ka seswantšho se? O ile a phetha seswantšho seo ka gore: “Tate wa legodimong le yena o tla le swara bjalo, ge e ba yo mongwe le yo mongwe wa lena a sa lebalele ngwanabo go tšwa pelong.” (Mat. 18:35) Ntlha ya Jesu e kwagala gabotse. Dibe tšeo re di dirago ge re sa dutše re phela re le batho ba sa phethagalago di hlatsela gore re ka se tsoge re fihleletše ditekanyetšo tša Jehofa ka botlalo. Lega go le bjalo, yena o ikemišeditše go re lebalela ka mo go feletšego, go be bjalo ka ge eka ga se ra ka ra dira dibe tšeo. Ka baka leo, mang le mang yo a nyakago go ba le tswalano le Jehofa o tlamegile go lebalela batho ba bangwe mafokodi a bona. Goba o swanetše go dira seo Jesu a se boletšego Thutong ya Thabeng ge a re: “Ge e ba le lebalela batho dikarogo tša bona, Tatago lena wa legodimong le yena o tla le lebalela; anthe ge e ba le sa lebalele batho dikarogo tša bona, Tatago lena le yena a ka se le lebalele dikarogo tša lena.”—Mat. 6:14, 15.

6. Ke ka baka la’ng go se bonolo ka mehla gore re lebalele ba bangwe?

⁶ Mohlomongwe o ka bolela gore: ‘Tšeo ka moka di a kwagala, eupša molomo o tshela noka e tletše.’ Seo ke ka gobane gantši batho ba gapša ke maikwelo ge ba kgopišwa. Motho a ka galefa, a ikwa a ekilwe, a nyaka gore toka e dirwe goba a nyaka go itefeletša. Ge e le gabotse, ba bangwe ba nagana gore ba ka se  tsoge ba lebaletše motho yo a ba senyeditšego. Ge e ba o ikwa ka tsela yeo, o ka hlagolela bjang moya wa go lebalela woo Jehofa a nyakago gore re be le wona?

7, 8. Ke eng seo se ka go thušago gore o be le moya wa go lebalela ge e ba o kgopišitšwe ke boitshwaro bjo bobe bja ba bangwe?

⁷ Re ka gapša ke maikwelo kudu ge re fošeditšwe goba ge re nagana gore re fošeditšwe. Ela hloko tsela yeo lesogana le lengwe le ilego la arabela ka yona, go etša ge le hlaloswa nyakišišong e nngwe ya mabapi le go galefa: “Ka letšatši le lengwe . . . ge ke be ke galefile, ke ile ka tšwa ka ntlong ke ipoditše gore nka se tsoge ke boile gae. E be e le letšatšing le lebotse la selemo, gomme ke ile ka sepela sebaka se setelele ditsejaneng tša go kgahliša, go ba go fihlela ganyenyane-ganyenyane setu seo se bego se le moo le botse bjoo ke bego ke bo bona bo dira gore ke theoše maswafo, ke moka ka morago ga diiri tše sego kae ka boela gae ke itshotše e bile ke se sa ikwa ke befetšwe.” Go etša ge phihlelo ye e bontšha, go ipha nako ya go okobala gomme wa lebelela boemo o sa gapša ke maikwelo go ka go thuša gore o pheme go arabela ka tsela e mpe yeo ka morago o tlago go itsholela yona.—Ps. 4:4; Die. 14:29; Jak. 1:19, 20.

⁸ Eupša go thwe’ng ge e ba maikwelo a mabe a sa kgaotše? Leka go nyaka lebaka leo le dirago gore o befelwe. Na ke ka gobane o swerwe gampe, mohlomongwe ka go hloka tlhompho? Goba na ke ka gobane o nagana gore motho yoo o go kwešitše bohloko ka boomo? Na seo a se dirilego e be e tloga e le se sebe? Go hlahlobišiša le go kwešiša lebaka leo o arabetšego ka mokgwa woo go tla go thuša gore o tsebe tsela e kaone kudu le ya Mangwalo yeo o swanetšego go arabela ka yona. (Bala Diema 15:28; 17:27.) Go dira ga gago seo go ka go thuša gore o kgone go lebelela taba yeo ka leihlo le lebotse gomme o ikemišetše go lebalela. Ge e ba o ka latela mokgwa woo, le ge boemo e ka ba bjo thata ka tsela le ge e le efe, gona o dumelela lentšu la Modimo gore le hlahlobe “dikgopolo le maikemišetšo a pelo” ya gago gomme le go hlahle gore o latele mokgwa wa Jehofa wa go lebalela.—Baheb. 4:12.

9, 10. (a) Ke eng seo o ka se dirago ge o nagana gore o fošeditšwe? (b) Go se akgofele go galefa le go ba le moya wa go lebalela go ka dira gore o lebelele dilo ka tsela efe?

⁹ Maemo a mantši bophelong a dira gore batho ba galefe. Ka mohlala, a re re mootledi wa koloi e nngwe o nyakile a thulana le wena ge o be o otlela koloi ya gago. O tla arabela bjang? O ka ba o badile ka maemo ao baotledi ba ilego ba galefelana go fihla bokgoleng bja gore yo mongwe wa bona a hlasele yo mongwe. Lega go le bjalo, ka ge o le Mokriste, ga go pelaelo gore o ka se dire selo sa mohuta woo.

¹⁰ Ruri go be go tla ba kaone gore o fetše metsotswana o naganišiša ka boemo bjoo. Mohlomongwe le wena go na le seo o se dirilego seo se dirago gore o be le molato ka baka la ge o ile wa šitišega ka tsela e itšego. Goba mootledi yo mongwe a ka ba a bile le bothata ka koloi ya gagwe. Ntlha ke gore re ka fokotša bogale, manyami le dika tše dingwe tše mpe ge e ba re kwešiša maemo gakaone, re bulegile monaganong e bile re ikemišeditše go lebalela. Mmoledi 7:9 e re: “O se ke wa akgofela go kgopišega moyeng, gobane go kgopišega go agile sehubeng sa ditlaela.” O se ke wa tšeela dilo godimo. Maemong a mantši, seo batho ba naganago gore ke go fošetšwa ka boomo, ge e le gabotse ga se bjalo; ke feela gore selo seo se diragetše ka baka la go se phethagale goba go se kwešišane. Leka go ba yo a lekalekanego ditirong goba mantšung a itšego a bonagalago a se botho, gomme o ikemišetše go lebalela ka lerato. O tla thaba ge e ba o ka kgona go dira bjalo.—Bala 1 Petro 4:8.

11. Ka ge re le bagoeledi ba Mmušo, ditsela tšeo batho ba arabelago ka tšona go ditaba tše dibotse di swanetše go dira gore re ikwe bjang?

¹¹ Ge o le tirelong ya tšhemo, o ka dula  bjang o išitše maswafo fase ge motho yo mongwe a go rumola? Ge Jesu a be a roma baboledi ba 70, o ba boditše gore ba kganyogele ntlo e nngwe le e nngwe yeo ba tsenago go yona khutšo. Jesu o itše: “Ge e ba mogwera wa khutšo a le gona, khutšo ya lena e tla ba go yena. Eupša ge e ba a se gona, gona e tla boela go lena.” (Luka 10:1, 5, 6) Re a thaba ge e ba batho ba re theetša ge re le bodireding ka ge ba tla holwa ke molaetša wo re o swerego. Lega go le bjalo, ka dinako tše dingwe ga ba re theetše. Ke’ng seo re se dirago ge ba dira bjalo? Jesu o boletše gore khutšo yeo re e kganyogelago ntlo yeo e swanetše go boela go rena. Boemong le ge e le bofe, re swanetše go tloga ntlong e nngwe le e nngwe re na le khutšo dipelong tša rena, go sa šetšwe gore batho ba re swara bjang. Re ka se dule re na le khutšo ge e ba re galefa ge re rumolwa.

12. Go ya ka mantšu a Paulo a lego go Baefeso 4:31, 32, re swanetše go itshwara bjang ge re swarwa gampe?

¹² Katanela go ba le khutšo maemong ka moka, e sego feela bodireding bja Bokriste. Ge e le gabotse, go ikemišetša ga gago go lebalela ba bangwe ga go bolele gore o swanetše go amogela boitshwaro bja bona bjo bo fošagetšego goba go lokafatša tshenyo yeo e bo tlišago. Eupša go lebalela go bolela go tloša sekgopi seo o ka bago le sona ka tiro yeo gomme wa dula o na le khutšo. Batho ba bangwe ba dira gore boitshwaro bja ba bangwe bo ba amoge lethabo, ka gore ba nwelele dikgopolong tše di fošagetšego le ka gore ba dule ba naganišiša ka tsela yeo ba ba swerego gampe ka yona. O se ke wa dumelela dikgopolo tše bjalo di go laola. Gopola gore o ka se be le lethabo ge e ba o boloka sekgopi. Ka gona, eba yo a lebalelago!—Bala Baefeso 4:31, 32.

13. (a) Mokriste ‘o kgobelela bjang magala a mollo’ hlogong ya lenaba la gagwe? (b) Go ka ba le mafelelo afe ge e ba re arabela ka boleta ge motho a re rumola?

¹³ Go ka ba le dinako tšeo o bonago gore o ka thuša motho yo a ilego a go fošetša e le gore a bone bohlokwa bja ditekanyetšo tša Bokriste. Moapostola Paulo o ngwadile gore: “‘Ge e ba lenaba la gago le swerwe ke tlala, le fepe; ge e ba le nyorilwe, le nee sa go nwa; gobane ka go dira se o tla kgobelela magala a mollo hlogong ya lona.’ O se ke wa itesa o fenywa ke bobe, eupša tšwela pele o fenya bobe ka botse.” (Baroma 12:20, 21) Ka go bontšha botho ge o rumolwa, o ka dira gore motho yo a go swarago gampe a okobale gomme a bontšhe dika tše dibotse. Ka go ba yo a kwešišago le yo a nago le kwelobohloko—gaešita le lešoko—go motho yo a go swerego gampe, o ka mo thuša gore a ithute ditherešo tša Beibele. Go sa šetšwe gore boemo ke bofe, tsela ya gago ya go arabela ka boleta e nea motho yoo sebaka sa gore a naganišiše ka boitshwaro bja gago bjo bobotse.—1 Pet. 2:12; 3:16.

14. Go sa šetšwe gore motho o go swere gampe gakaakang, ke ka baka la’ng o swanetše go phema go boloka sekgopi?

¹⁴ Maemong a mangwe, e ka se be mo go swanetšego gore re thabele bogwera le batho ba itšego. Batho bao ba akaretša bao e kilego ya ba ditho tša phuthego eupša ba ile ba dira sebe, ba se itshole gomme ba kgaolwa. Ge e ba motho yo bjalo a go kwešitše bohloko, go ka ba thata kudu go mo lebalela gaešita le ge a itshotše, ka gobane dintho tša maikwelo di tšea nako e telele go fola. Maemong a bjalo, o ka tšwela pele o kgopela Jehofa go go thuša go hlagolela moya wa go lebalela motho yoo a go senyeditšego eupša a itshola. Ge e le gabotse, wena o ka tseba bjang seo se lego ka pelong ya motho yo mongwe? Jehofa ke yena a tsebago. O hlahloba seo se lego ka garegare ga pelo ya motho gomme ga a felele badiradibe pelo. (Ps. 7:9; Die. 17:3) Ke ka baka leo Mangwalo a rego: “Le se ke la bušetša bobe ka bobe go motho. Lekang go dira se sebotse go ya ka pono ya batho bohle. Ge e ba go kgonega, go fihla moo go ithekgilego ka lena, ebang le khutšo le batho bohle. Baratiwa, le se ke la itefeletša, eupša šuthelelang kgalefo ya Modimo; gobane go ngwadilwe gwa thwe: ‘Tefetšo ke ya ka, ke tla lefetša, go re’alo Jehofa.’” (Baroma  12:17-19) Na wena o ka ahlola motho yo mongwe ka tsela ya maleba? Aowa. (Mat. 7:1, 2) Eupša o ka kgodišega gore Modimo o kgona go phethagatša toka.

15. Ke selo sefe seo re swanetšego go se gopola seo se ka fetošago boemo bja rena bja kgopolo ka bao ba re fošeditšego?

¹⁵ Ge e ba o nagana gore o ile wa swarwa ka go hloka toka gomme o thatafalelwa ke go lebalela mofoši yo a itshotšego, o swanetše go gopola gore motho yo a go fošeditšego le yena o lebeletšane le boemo bjo boima kudu. Le yena o kgongwa ke ditlamorago tša sebe sa leabela. (Baroma 3:23) Jehofa o šokela batho ka moka ba sa phethagalago. Ka gona, ke mo gobotse gore re rapelele motho yo a re fošeditšego. Gantši re ka se tšwele pele re galefetše motho yoo re mo rapelelago. Le gona taba ya gore ga se ra swanela go boloka sekgopi gaešita le go batho bao ba re swarago gampe e gatelelwa ke mantšu a Jesu a rego: “Tšwelang pele le rata manaba a lena le go rapelela bao ba le tlaišago.”—Mat. 5:44.

16, 17. O swanetše go arabela bjang ge bagolo ba phuthego ya Bokriste ba dira phetho ya gore modiradibe o a itshola, gona ka baka la’ng?

¹⁶ Ka go dumelelana le thato ya Jehofa, bagolo ba Bakriste ba neilwe boikarabelo bja go swaragana le ditaba tša go dirwa ga bobe ka phuthegong. Bana ba babo rena ga ba na temogo e feletšego go swana le Modimo, eupša ba katanela go dira gore diphetho tša bona di dumelelane le tlhahlo yeo e neilwego ka Lentšung la Modimo ka go hlahlwa ke moya o mokgethwa. Ka baka leo, diphetho tšeo ba di dirago ditabeng tše bjalo ka morago ga gore ba tsome thušo ya Jehofa ka thapelo, di tla bonagatša pono ya gagwe ka ditaba.—Mat. 18:18.

¹⁷ Maemong a bjalo ke gabohlokwa gore re botege. Na o tla lebalela bao komiti e phethilego ka gore ba itshotše gomme wa ba tiišetša gore o a ba rata? (2 Bakor. 2:5-8) Seo se ka no se be bonolo, kudukudu ge e ba bobe bja motho yoo bo go kgoma ka go lebanya goba bo kgoma motho yo o tswalanego le yena. Lega go le bjalo, ge e ba o holofela Jehofa le tsela ya gagwe ya go dira dilo a diriša phuthego, o tla gata megato e bohlale. O tla bontšha gore o tloga o lebalela ka bolokologi.—Die. 3:5, 6.

18. O tla holega ka ditsela dife ge e ba o lebalela ba bangwe ka bolokologi?

¹⁸ Ditsebi tša monagano di re go na le mehola e tlišwago ke go ikemišetša go lebalela ba bangwe. Go lebalela go dira gore motho a se ke a tlalelana e bile go fediša maikwelo a gateletšago ao a mmakelago bolwetši, e bile go tiiša ditswalano le go dira gore e be tše thabilego. Nagana ka seo ge se bapetšwa le ditlamorago tša go gana go lebalela ba bangwe—go babja, ditswalano tše di senyegilego, kgateletšego le bothata bja go se kgone go phedišana le ba bangwe. Tšhegofatšo e kgolokgolo ya go ikemišetša go lebalela ba bangwe ke gore re tla ba le tswalano e botse le Tatago rena wa legodimong, Jehofa.—Bala Bakolose 3:12-14.