Megato e Šupago e ka Dirago Gore go Bala Beibele go Hole

“Ga se feela gore Beibele ke puku e rekwago kudu, ke puku e rekwago kudu ngwaga o mongwe le o mongwe.”—MAKASINE WA TIME.

“Ke bala Beibele ka dinako tše dingwe, eupša ke e sa kgahlišego le ganyenyane.”—KEITH, RAMMINO YO A TUMILEGO WA ENGELANE.

GO A makatša gore batho ba bantši ba na le Beibele, lega go le bjalo ga e ba hole ge ba e bala. Lega go le bjalo, ba bangwe ba tšeela godimo seo ba se balago ka Beibeleng. Ka mohlala, mosadi yo a bitšwago Nancy o anega ka gore: “Go tloga mola ke thomilego go bala Beibele le go naganišiša ka yona mesong e mengwe le e mengwe, ke kgona go lebeletšana le bothata bjo bongwe le bjo bongwe bjo bo tšwelelago. Mokgwa wo o nthušitše kudu go fokotša kgateletšego ya-ka go feta dilo tšeo ke lekilego go di diriša nywaga e 35 e fetilego.”

Gaešita le ge o sa ka wa bala Beibele, na o kgahlwa ke gore e thušitše batho ba bangwe? Ge e ba o šetše o bala Beibele, na o ka rata go holwa ke go e bala? Ge e ba go le bjalo, leka go latela megato e šupago yeo e hlaloswago sehlogong se.

Mogato 1—Bala ka Maikemišetšo a Swanetšego

▪ O ka bala Beibele feela ka gobane e le kgatišo e kgahlišago goba ka baka la go ikwa o gapeletšega goba ka kgopolo ya gore e go hlahle lefaseng le leo le dubegilego. Lega go le bjalo, o tla holega kudu ge e ba maikemišetšo a gago e le go ithuta therešo ka Modimo. Go tlaleletša moo, o tla holega kudu ge e ba maikemišetšo a gago e le go bona kamoo molaetša wa Beibele o ka kgomago bophelo bja gago.

Mangwalo a gatelela bohlokwa bja go bala Beibele ka maikemišetšo a mabotse ka go e swantšha le seipone, ge a re: “Gobane ge e ba motho e le mokwi wa lentšu, e se modiri, gona o swana  le motho yo a lebelelago sefahlego sa gagwe sa tlhago seiponeng. Gobane o a itebelela, a tloga a lebala ka bjako mohuta wa motho yo a lego yena. Eupša yo a nyankurelago molaong o phethagetšego wo e lego wa tokologo gomme a o phegelela, motho yo gobane a fetogile modiri wa modiro, e sego mokwi yo a lebalago, o tla thabišwa ke go o dira.”—Jakobo 1:23-25.

Monna yo mohlala wo o bolelago ka yena o ile a itebelela ka seiponeng eupša a palelwa ke go lokiša ponagalo ya gagwe. Mohlomongwe o ile a itebelela ka bjako, goba mohlomongwe o be a se na kganyogo ya go lokiša ponagalo ya gagwe. Ka mo go swanago, re tla holega ganyenyane ge re bala Beibele ka go e kga ka godimo goba re palelwa ke go diriša seo re se balago. Go fapana le moo, re ka hwetša lethabo ge re nyankurela ka Beibeleng ka kgopolo ya go ba “modiri,” re dumelela kgopolo ya Modimo e bopa dikgopolo tša rena le ditiro tša rena.

Mogato 2—Kgetha Phetolelo e ka Botwago

▪ Go ka ba le Dibeibele tše dintši tša leleme la geno tšeo o swanetšego go kgetha go tšona. Gaešita le ge phetolelo e nngwe le e nngwe ya Lentšu la Modimo e ka go hola, tše dingwe di diriša polelo ya kgale goba ya diithuti yeo go lego thata go e kwešiša. (Ditiro 4:13) Diphetolelo tše dingwe di bile di fetola molaetša wa Beibele o sekilego ka go thekga ditlwaelo tša batho. Ka mohlala, bjalo ka ge re bone dihlogong tša mathomo tša makasine wo, diphetolelo tše dingwe di dirišitše direto tše bjalo ka “Modimo” goba “Morena” legatong la leina la Modimo la Jehofa. Ka gona, ge o kgetha Beibele, kgetha yeo e dirišago leleme leo le kwešišegago gabonolo yeo e tla dirago gore o rate go tšwela pele o e bala.

Babadi ba dimilione go dikologa lefase ba lemogile gore New World Translation e bjalo. * Ela hloko mohlala wa monna yo a tšofetšego wa Bulgaria. O ile a ba gona sebokeng sa Dihlatse tša Jehofa gomme a newa kopi ya New World Translation. Ka morago, o ile a re: “Ke badile Beibele ka nywaga e mentši, eupša ga se ka ka ka bala phetolelo e kwešišegago gabonolo le yeo e nkgomago pelo ka tsela ye.”

Mogato 3—Rapela

▪ O ka kwešiša Beibele kudu ge o kgopela Mongwadi wa yona gore a go thuše, bjalo ka ge go dirile mopsalme yo a itšego: “O mpudullê mahlô, ke bônê mehlôlô melaong ya xaxo.” (Psalme 119:18) Rapela Modimo nako le nako ge o bala Mangwalo, o mo kgopele gore a go thuše go kwešiša Lentšu la gagwe. Le gona o ka mo leboga bakeng sa go ba le Beibele, ka ge ka ntle le yona re ka se tsebe Modimo.—Psalme 119:62.

Na Modimo o kwa dithapelo tše bjalo tša go kgopela thušo? Ela hloko seo se ilego sa diragalela bana ba motho ba basetsana ba kua Uruguay. Ba ile ba makatšwa ke seo Beibele e se bolelago go Daniele 2:44, gomme ba ile ba rapela Modimo gore a romele motho gore a tle a ba thuše go kwešiša temana yeo. Ge Beibele ya basetsana bao e sa bulegile, Dihlatse tša Jehofa tše pedi di ile tša tla go bona, tša bala yona temana yeo ba bego ba rapetše mabapi le yona gomme tša hlalosa gore e šupa go mebušo ya batho yeo e tlago go tšeelwa legato ke Mmušo wa Modimo. * Basetsana ba babedi bao ba lego mahlalagading ba ile ba kgolwa gore Modimo o arabile thapelo ya bona.

Mogato 4—Bala ka Mehla

▪ Mogatiši yo mongwe wa dipuku o boletše gore, “batho ba bantši ba ile ba thoma go reka Dibeibele” ka morago ga tlhaselo ya botšhošetši kua United States ka September 11, 2001. Ba bantši ba retologela Lentšung la Modimo feela dinakong tša mathata. Lega go le bjalo, Beibele e re kgothaletša gore re e bale letšatši le lengwe le le lengwe, ka ge e re: “Puku yé ya melaô O se kê wa bá wa  lesa xo e bolêla; O e akanyê mosexare le bošexo, xore O kxônê xo hlôkômêla tšohle tše di ngwadilwexo mo xo yòna, ’me wa dira tšôna. Ké mo O tl’o xo ba le mahlatse ditseleng tša xaxo, ké mo O tl’o xo lêtlêxêlwa.”—Jošua 1:8.

Bohlokwa bja go bala Beibele bo ka swantšhwa ka monna yo a ilego a hlaselwa ke bolwetši bja pelo gomme a kgetha go ja dijo tšeo di nago le phepo kudu. Na mokgwa wo o tla mo thuša ge e ba a o latela feela ge a e-kwa sehlabi mafahleng a gagwe? Aowa. O swanetše go gomarela ka go tia mokgwa wa go ja dijo tša phepo ge e ba a nyaka go holega kudu. Ka mo go swanago, go bala Beibele letšatši le letšatši go tla go thuša “xo ba le mahlatse ditseleng tša xaxo.”

Mogato 5—Diriša Mekgwa e sa Swanego ya go Bala

▪ Go bala Beibele go tloga go Genesi go ya go Kutollo go ka go thuša, eupša o ka hwetša mekgwa e mengwe e lapološa. Mo ke ditšhišinyo tše mmalwa.

Bala ka moanegwa yo a itšego. Bala dikgaolo ka moka goba dipuku tšeo di ahla-ahlago morapedi yo a itšego wa Modimo, bjalo ka ba latelago:

• Josefa: Genesi 37-50.

• Ruthe: Ruthe 1-3.

• Jesu: Mateo 1-28; Mareka 1-16; Luka 1-24; Johane 1-21. *

Šetša kgwekgwe ya taba. Bala mangwalo ao a tswalanego le yona. Ka mohlala, dira nyakišišo ka thapelo, ke moka o bale keletšo ya Beibele mabapi le thapelo gotee le dithapelo tše dingwe tše dintši tšeo di begilwego ka Beibeleng. *

Bala ka go hlaboša. O tla holega kudu ge o bala Beibele ka go hlaboša. (Kutollo 1:3) Le ka ba la bala ka go hlaboša le le lapa, le bala dirapa ka go šielana goba go abelana baanegwa le le ditho tša lapa. Ba bangwe ba thabela go theetša mmalo wa Beibele o gatišitšwego. Mosadi yo mongwe o boletše gore: “Ke be ke thatafalelwa ke go thoma, ka gona ke ile ka thoma ka go theetša mmalo wa Beibele o gatišitšwego. Ga bjale ke lemoga gore go bala Beibele go kgahliša go feta padi e ngwadilwego gabotse.”

Mogato 6—Naganišiša

▪ Leema-ema le ditšhitišo tša bophelo bja lehono di dira gore go naganišiša go se be bonolo. Lega go le bjalo, bjalo ka ge re swanetše go šila dijo tšeo re di jelego gore re hwetše phepo, re swanetše go naganišiša ka seo re se balago Beibeleng gore se re hole. Re dira bjalo ka go bušeletša ka monagano seo re se balago le ka go ipotšiša dipotšišo tše bjalo ka tše rego: ‘Ke ithutile’ng ka Jehofa Modimo? Se se šoma bjang go nna? Nka se diriša bjang go thuša ba bangwe?’

Kgopolo e bjalo e dumelela molaetša wa Beibele go kgoma dipelo tša rena le go oketša lethabo leo re le hwetšago ge re bala Lentšu la Modimo. Psalme 119:97 e re: “Melaô ya xaxo ke e rata xakaka’ng! Ke eleletša yôna mehla yohle.” Ka go naganišiša, mopsalme o be a kgona go eleletša ka Mangwalo letšatši ka moka. Go dira bjalo go mo thušitše go rata seo a bego a ithuta sona.

Mogato 7—Kgopela Thušo Gore o e Kwešiše

▪ Modimo ga se a letela gore re kwešiše Lentšu la gagwe ka borena. Le yona Beibele e a dumela gore e na le “dilo tše dingwe tše thata go kwešišwa.” (2 Petro 3:16) Puku ya Ditiro e hlalosa tona ya Ethiopia yeo e bego e sa kwešiše temana ya Beibele yeo e bego e e bala. Modimo o ile a romela yo mongwe wa bahlanka ba Gagwe gore a ye go mo thuša, moo mafelelong monna wa Ethiopia a ilego “a sepela a thabile.”—Ditiro 8:26-39.

Le wena o ka holwa kudu ke go bala Beibele ge o thušwa gore o kwešiše seo o se balago. Ikgokaganye le Dihlatse tša Jehofa tša motseng wa geno, goba o ngwalele atereseng yeo e lego go letlakala 4 la makasine wo bakeng sa thuto e sa lefelelwego ya legae ya Beibele.

[Mengwalo ya tlase]