Sephiri 1

Rata Batho, e Sego Tšhelete le Dilo tše o Nago le Tšona

KE ENG SEO BEIBELE E SE RUTAGO? “Lerato la tšhelete ke modu wa mehuta ka moka ya dilo tše di gobatšago.”—1 Timotheo 6:10.

GO NA LE TLHOHLO EFE? Babapatši ba re tutueletša gore re se ke ra kgotsofatšwa ke seo re nago le sona. Ba nyaka gore re katanele go hwetša tšhelete e le gore re ka reka dilo tše difsa, tše dikaone le tše dikgolo. Tšhelete e a goketša, gomme go ka ba bonolo gore re e rate. Lega go le bjalo, Beibele e lemoša gore motho yo a ratago mahumo a ka se kgotsofale le ka mohla. Kgoši Solomone o ngwadile gore: “E a rataxo mahumô xa a hore ka ôna; mo-lla-boati xa a holexe selô.”—Mmoledi 5:9.

O KA DIRA’NG? Ekiša Jesu, gomme o ithute go rata batho kudu go feta dilo tše di bonagalago. Jesu o be a ikemišeditše go gafa dilo tšohle tšeo a bego a e-na le tšona—gaešita le bophelo bja gagwe—ka gobane a rata batho. (Johane 15:13) O boletše gore: “Go na le lethabo le legolo go neeng go feta go amogeleng.” (Ditiro 20:35) Ge e ba re tlwaela go nea ba bangwe nako le dilo tša rena, batho ba tla arabela ka tsela e swanago. Jesu o itše: “Tlwaelang go fa, gomme batho ba tla le fa.” (Luka 6:38) Bao ba phegelelago tšhelete le dilo tše di bonagalago ba ipakela dihlabi le mahloko. (1 Timotheo 6:9, 10) Ka lehlakoreng le lengwe, kgotsofalo ya kgonthe e tlišwa ke go rata batho le go ratwa ke bona.

Ke ka baka la’ng o sa hlahlobe bophelo bja gago go bona ge e ba o ka bo nolofatša? Na o ka fokotša dilo tšeo o nago le tšona goba tšeo o nyakago go ba le tšona? Ge e ba o dira bjalo, o ka hwetša gore o na le nako e oketšegilego le matla bakeng sa dilo tše bohlokwa kudu bophelong—go thuša batho le go hlankela Modimo, yo a go neilego tšohle tšeo o nago le tšona.—Mateo 6:24; Ditiro 17:28.

[Seswantšho go letlakala 4]

“Tlwaelang go fa, gomme batho ba tla le fa”