Sesenyi seo re ka ithutago go sona ke seo o bonago Jesu a bolela le sona mo seswantšhong. Sesenyi seo se itsholela bosenyi bja sona. Se kgopela Jesu gore: “O nkgopole ge o tsena Mmušong wa gago.” Ga bjale ka ge o bona mo seswantšhong, Jesu o bolela le sesenyi seo. Na o tseba gore Jesu o re’ng go sona?— * Jesu o se holofetša gore: “Ruri ke go botša lehono, o tla ba le nna Paradeiseng.”

O nagana gore Paradeise e tla ba bjang?— Go kgonthišetša gore re hwetša karabo e nepagetšego, anke re bolele ka Paradeise yeo Modimo a bego a e diretše monna le mosadi ba pele, e lego Adama le Efa. Paradeise yeo e be e le kae? Na e be e le legodimong goba e le lefaseng?—

O nepile ge e ba o re e be e le lefaseng. Ka gona ge e ba re nagana ka sesenyi se le “Paradeiseng,” re swanetše go nagana ka sona se phela gona mo lefaseng ge le fetošwa paradeise. Paradeise yeo e tla ba bjang?— Anke re bone.

Ka morago ga gore Jehofa Modimo a bope batho ba babedi ba mathomo, Adama le Efa, Beibele e re o ile a ba bea paradeiseng gona mo lefaseng. E be e bitšwa “serapa [sa] kua Edene.” Na o kgona go nagana kamoo “serapa [sa] kua Edene” se bego se le botse ka gona?— Ruri, e be e le lefelo le le kgahlišago le le lebotse kudu leo go ka phelwago go lona leo lehono go sego yo a kilego a le bona!

O nagana eng? Na Jesu o tla ba lefaseng le sesenyi seo se ilego sa itsholela dibe tša sona?— Aowa, Jesu o tla ba a le legodimong a buša bjalo ka Kgoši godimo ga lefase la Paradeise. Ka gona Jesu o tla ba le sesenyi ka gore a se tsoše bahung le go bona gore se hlokometšwe Paradeiseng mo lefaseng. Eupša ke ka baka la’ng Jesu a tla dumelela monna yo e bego e le sesenyi gore a phele Paradeiseng?— Anke re bolele ka se.

 Ke therešo gore sesenyi se se dirile dilo tše mpe kudu. Eupša le batho ba bangwe ba dimilione bao ba ilego ba phela lefaseng ba dirile dilo tše mpe. Lega go le bjalo, ba bantši ba bona ba dirile dilo tše mpe ka ge ba se ba ka ba rutwa ka Jehofa le seo a bego a nyaka ba se dira.

Ka gona batho ba bjalo, ba tla tsošetšwa bophelong Paradeise gona mo lefaseng, go akaretša le sesenyi seo Jesu a boletšego le sona ge ba be ba fegilwe koteng. Ba tla rutwa seo thato ya Modimo e lego sona. Ka gona ba tla ipontšha ge e ba ba rata Jehofa.

Na o tseba gore ba ka bontšha seo bjang?— Ka go dira seo Modimo a nyakago ba se dira. Ka gona, e tla ba mo go thabišago gakaakang go phela Paradeiseng le go ba le batho bao ba ratago Jehofa e bile ba ratana seng sa bona!