LEBAKA LEO BA BANGWE BA BELAELAGO SE: Go ya ka nyakišišo e nngwe ya morago bjale, molalatladi wa rena feela o ka ba le dipolanete tše ka bago tše dibilione tše 100. Ge ba nagana ka bogolo bja legohle, batho ba bantši ba ipotšiša gore: ‘Ke ka baka’ng Mmopi ramatlaohle a tshwenyega ka seo batho ba go nyatšega ba se dirago polaneteng ye e nyenyane?’

SEO LENTŠU LA MODIMO LE SE RUTAGO: Modimo ga se a fo re nea Beibele gomme a se re kgahlegele. Go e na le moo, Jehofa o re kgonthišetša gore: “Ke tla nea keletšo leihlo la ka le le go wena.”—Psalme 32:8.

Nagana ka Hagara, mosadi wa Moegipita wa lekgolong la bo-20 la nywaga, B.C.E. Hagara o be a sa hlomphe Sarai, mong wa gagwe, ka gona, Sarai o ile a mo goboša gomme Hagara a tšhabela lešokeng. Ka ge Hagara a be a fošitše, na Modimo o ile a mo hlokomologa? Beibele e bega gore: “Morongwa wa Jehofa a mo hwetša.” Morongwa yoo o ile a kgonthišetša Hagara ka gore: “Jehofa o kwele ka mohlako wa gago.” Ke moka Hagara a re go Jehofa: “Wena o Modimo yo a bonago.”—Genesi 16:4-13.

“Modimo yo a bonago” le wena o a go šetša. Ka mohlala: Mma yo lerato o šetša kudu bana ba gagwe ba banyenyane, ka gobane ge ngwana e le yo monyenyane ke moo a nyakago tlhokomelo go tšwa go motswadi wa gagwe. Ka mo go swanago, Modimo o tloga a re bona ka ge re le babotlana e bile re fokola. Jehofa o re: “Ke dula lefelong le le phagamego le le lekgethwa, le gona ke dula le yo a setlegilego e bile a kokobetše moyeng, gore ke tsošološe moya wa babotlana le go tsoša pelo ya bao ba setlegilego.”—Jesaya 57:15.

Lega go le bjalo, o ka ipotšiša gore: ‘Modimo o ntšhetša bjang? Na o nkahlola ka ponagalo ya ka goba o lebelela modu wa taba gomme a leka go kwešiša seo ke lego sona?’