Ga go pelaelo gore batho ba tla dula ba dira tšwelopele ka tša thutamahlale. Eupša na ba tla ka ba ikagela lekoko la batho bao ba tlogago ba hlokomelana? Aowa. Lehono, lefase le laolwa ke boithati le megabaru. Lega go le bjalo, Modimo o holofetša selo se sekaone bakeng sa batho.—Bala 2 Petro 3:13.

Lentšu la Modimo le hlalosa lekoko la batho la lefase ka bophara la nakong e tlago leo go lona batho ba tlago go ratana. Batho ba tla dula ka polokego gomme go ka se be le yoo a tlago go ba gobatša.—Bala Mika 4:3, 4.

Mathomong Modimo o bopile batho ba se na tshekamelo ya boithati. Eupša ka go kgetha go se kwe Modimo, motho wa pele o ile a lahlegelwa ke go phethagala ga gagwe. Re abetše tshekamelo ya boithati go yena. Lega go le bjalo, Modimo o tla diriša Jesu go bušetša batho phethagalong.—Bala Baroma 7:21, 24, 25.

Ka go dumelelana le thato ya Modimo, Jesu o ile a hwa e le sehlabelo gomme a tloša mafelelo a go se kwe ga motho wa pele. (Baroma 5:19) Ka gona Jesu o ile a dira gore go be le bokamoso bjo bo kgahlišago, nakong yeo batho ba tla bego ba se na tshekamelo ya boithati ya go dira se se fošagetšego.—Bala Psalme 37:9-11.