Ga go na selo seo se re hlaolago kudu go swana le modiro wa rena wa boboledi, wo o dirwago ka ntlo le ntlo, mafelong a batho bohle le gohle moo batho ba hwetšagalago gona. Ke ka baka la’ng re dira modiro wo?

Dihlatse tša Jehofa di dira boboledi e le gore di tagafatše Modimo le go tsebatša leina la gagwe. (Baheberu 13:15) Le gona re nyaka go kwa taelo ya Kriste Jesu, yo a itšego: “Ka gona, eyang le dire batho ba ditšhaba ka moka barutiwa, . . . le ba ruta go boloka dilo tšohle tšeo ke le laetšego tšona.”—Mateo 28:19, 20.

Go feta moo, re rata baagišani ba rena. (Mateo 22:39) Ke therešo gore re lemoga gore batho ba bantši ba na le ditumelo tša bona tša bodumedi le gore ga se batho bohle ba thabelago molaetša wa rena. Lega go le bjalo, re nagana gore dithuto tša Beibele di phološa maphelo. Ke ka baka leo re tšwelago pele re ‘sa kgaotše go ba ruta e bile re tsebatša ditaba tše dibotse ka Kriste,’ go etša ge Bakriste ba lekgolong la pele la nywaga ba be ba dira bjalo.—Ditiro 5:41, 42.

Babadi ba bantši ba dikgatišo tša rena ga se Dihlatse tša Jehofa. Le gona ba dimilione bao ba ithutago Beibele le rena ke ditho tša madumedi a mangwe. Lega go le bjalo, ba thabela gore Dihlatse tša Jehofa di a ba etela.

Ke therešo gore o ka ba o na le dipotšišo tše dingwe tšeo o ipotšišago tšona ka Dihlatse tša Jehofa. Re go laletša gore o ikhweletše dikarabo ka

• Go botšiša yo mongwe wa Dihlatse tša Jehofa.

• Go ya Wepesaeteng ya rena ya www.dan124.com/nso.

• Go ba gona dibokeng tša rena, tšeo go tsenwago mahala le tšeo go tšona go amogelwago batho bohle.