GE O dutše o bala ditlhaloso tšeo tše pedi, ke efe yeo e hlalosago pono ya gago tabeng ye? Ba bantši ba hwetša mantšu a Saulo wa Tareso, yo gape a bitšwago moapostola Paulo, e le a homotšago le a ipiletšago. (Ditiro 17:26, 27) Le gona Beibele e bolela ka mantšu ao a neago kgonthišetšo ao a swanago le ao. Ka mohlala, Jesu o ile a rapela thapelo yeo e neago kgonthišetšo e borutho ya gore balatedi ba gagwe ba ka tseba Modimo le go hwetša ditšhegofatšo tša gagwe.—Johane 17:3.

Lega go le bjalo, boradifilosofi ba bjalo ka Philo ba be ba na le pono e fapanego. Ba be ba bolela gore re ka se tsoge re tsebile Modimo ka gobane ga a kwešišege ka mo go feletšego. Therešo ke efe ka taba ye?

Beibele e dumela ka go lebanya gore go na le dilo tše dingwe tša mabapi le Modimo tšeo batho ba thatafalelwago ke go di kwešiša. Ka mohlala, go ba gona ga Mmopi ka nako e telele, bohlale bja gagwe le go tsenelela ga bohlale bja gagwe di ka se elwe goba di ka se kwešišege. Dilo tše ka moka di feta kwešišo ya batho mabapi le Modimo. Lega go le bjalo, dilo tše ka moka ga di re thibele gore re mo tsebe. Ge e le gabotse, go naganišiša ka tšona dilo tše go ka re thuša gore re ‘batamele Modimo.’ (Jakobo 4:8) Anke re eleng hloko mehlala e sego kae ya mabapi le dilo tše bjalo tšeo di sa kwešišegego. Ke moka re tla hlahloba dilo tšeo re ka di kwešišago e le ka kgonthe ka Modimo.

GO BA GONA GA MODIMO GA KA MO GO SA FELEGO: Beibele e ruta gore Modimo o dula a le gona “go tloga mehleng ya neng le neng go iša mehleng ya neng le neng.” (Psalme 90:2) Ka mantšu a mangwe, Modimo ga a na mathomo e bile ga a na mafelelo. Go ya ka pono ya batho, “palo ya nywaga ya gagwe ga e latišege.”—Jobo 36:26.

Kamoo o holegago ka gona: Modimo o holofetša gore o tla go nea bophelo bjo bo sa felego ge e ba o ka mo tseba e le ka kgonthe. (Johane 17:3) Na kholofetšo yeo e ka botwa ge e ba Modimo ka boyena a be a sa phele ka mo sa felego? Ke “Kgoši ya bosafelego” feela yeo e ka phethagatšago kholofetšo e bjalo.—1 Timotheo 1:17.

MONAGANO WA MODIMO: Beibele e ruta gore “kwešišo ya [Modimo] ga e fihlelelwe” ka gobane menagano ya gagwe e phagametše ya rena. (Jesaya 40:28; 55:9) Ke mo go swanetšego ge Beibele e botšiša potšišo yeo e sa nyakego karabo yeo e rego: “Ke mang yo a kwešišitšego monagano wa Morena gore a mo rute?”—1 Bakorinthe 2:16, English Standard Version.

Kamoo o holegago ka gona: Modimo o kgona go theetša dithapelo tša batho ba dimilione ka nako e tee. (Psalme 65:2) E bile o kgona go bona thaga e nngwe le e nngwe yeo e welago fase. Na monagano wa Modimo o tla ka wa imelwa kudu gomme wa mo šitiša gore a go šetše le go go theetša ge o rapela? Aowa, ka gobane monagano wa gagwe ga o na tekanyo. Go feta moo, go yena o “bohlokwa go feta dithaga tše dintši.”—Mateo 10:29, 31.

DITSELA TŠA MODIMO: Beibele e ruta gore batho “le ka mohla ba [ka] se ke ba hlatha mathomo le mafelelo a modiro wo Modimo wa therešo a o dirilego.” (Mmoledi 3:11) Ka gona, re ka se tsoge re tsebile dilo ka moka mabapi le Modimo. Bohlale bjoo bo bonwago ditseleng tša Modimo ‘ga bo latišege.’ (Baroma 11:33) Lega go le bjalo, Modimo o ikemišeditše go utolla ditsela tša gagwe go bao ba nyakago go mo kgahla.—Amose 3:7.

Kamoo o holegago ka gona: Ge e ba o bala le go ithuta Beibele, o ka se fetše go ithuta dilo tše difsa ka Modimo le ditsela tša gagwe. Se se bolela gore re ka dula re batamela kgauswi le Tatago rena wa legodimong ka mo go sa felego.

Ka ge re ka se kgone go kwešiša dilo tše itšego ka Modimo ga go bolele gore re ka se kgone go mo tseba le gatee. Beibele e na le tsebišo e ntši kudu yeo e re thušago go tseba Modimo gakaone. Ela hloko mehlala e mengwe:

LEINA LA MODIMO: Beibele e re ruta gore Modimo o iphile leina. O re: “Ke nna Jehofa. Ke lona leina la ka.” Ka Beibeleng, leina la Modimo le tšwelela ka makga a ka bago a 7 000, go feta leina le ge e le lefe.—Jesaya 42:8.

Kamoo o holegago ka gona: Thapelong ya gagwe ya mohlala, Jesu o itše: “Tatago rena wa magodimong, leina la gago a le kgethagatšwe.” (Mateo 6:9) Na le wena o ka diriša leina la Modimo dithapelong tša gago? Jehofa o ikemišeditše go phološa motho yo mongwe le yo mongwe yo a hlomphago leina la gagwe.—Baroma 10:13.

LEFELO LA BODULO LA MODIMO: Beibele e ruta gore go na le mafelo a mabedi, e lego lefelo la moya moo go dulago dibopiwa tša moya le lefelo la kgonthe leo le nago le lefase gotee le legohle. (Johane 8:23; 1 Bakorinthe 15:44) Ka Beibeleng, lentšu ‘magodimo’ gantši le šupa lefelo la dibopiwa tša moya. ‘Lefelo la bodulo’ la Mmopi le “magodimong” ao.—1 Dikgoši 8:43.

 Kamoo o holegago ka gona: O ka tseba Modimo gabotse. Mmopi ga se moya woo o sa bonagalego woo o lego gohle le dilong ka moka. Jehofa ke Motho wa kgonthe yo a dulago lefelong la kgonthe. Lega go le bjalo, “ga go na sebopiwa se se utamego mahlong a gagwe.”—Baheberu 4:13.

SEMELO SA MODIMO: Beibele e ruta gore Jehofa o na le dika tše di rategago. E bile e re: “Modimo ke lerato.” (1 Johane 4:8) Le ka mohla ga a aketše. (Tito 1:2) Ga a bebe sefahlego, o a gaugela, o na le kwelobohloko e bile o diega go galefa. (Ekisodo 34:6; Ditiro 10:34) Seo se makatšago batho ba bantši ke gore Mmopi o nyaka go ba le “tswalano ya kgauswi” le bao ba mo hlomphago.—Psalme 25:14.

Kamoo o holegago ka gona: Le wena o ka ba mogwera wa Jehofa. (Jakobo 2:23) Ka gona ge o dutše o ithuta ka semelo sa Jehofa, o ka kgona go kwešiša dipego tša Beibele gabotse.

Beibele e hlalosa Jehofa Modimo gabotse. Ga se Modimo yo a sa kwešišegego. Ge e le gabotse, Mmopi o nyaka gore o mo tsebe. Lentšu la gagwe, e lego Beibele, le holofetša ka gore: “Ge e ba o ka mo tsoma, yena o tla dira gore o mo hwetše.” (1 Dikoronika 28:9) Go re’ng o sa ithute ka Modimo gore o mo tsebe ka go bala le go naganišiša ka dipego tša Beibele? Ge e ba o dira bjalo, Beibele e holofetša gore Modimo ‘o tla go batamela.’—Jakobo 4:8.

Mo gongwe o ka ipotšiša gore: ‘Ka ge nka se kwešiše dilo ka moka ka Mmopi, nka ba bjang mogwera wa gagwe?’ Ela hloko se: Na gore motho e be mogwera wa kgonthe wa ngaka o swanetše go ba a ithutetše tša kalafo? Le gatee! Mogwera wa ngaka a ka ba a ithutetše selo se se fapanego. Lega go le bjalo, e ka ba mogwera wa kgauswi wa ngaka. Seo e tlogago e le sa bohlokwa ke gore mogwera wa ngaka o tseba semelo sa yona gotee le seo ngaka e se ratago le seo e sa se ratego. Ka mo go swanago, o ka ithuta ka Beibeleng mohuta wa motho yoo Jehofa a lego yena, e lego seo o swanetšego go se tseba gore o be mogwera wa gagwe.

Go e na le gore Beibele e bolele ka Mmopi ka tsela yeo e sa hlalosegego, e swere mohuta wa tsebišo yeo re e nyakago gore re tsebe Modimo. Na o ka rata go ithuta ka mo go oketšegilego ka Jehofa Modimo? Dihlatse tša Jehofa di na le lenaneo la mahala la go ithuta Beibele le batho. Re go laletša gore o ikgokaganye le Dihlatse tša tikologong ya geno goba o ye Wepesaeteng ya rena go www.dan124.com/nso.