Na o fela o gopola dinako tšeo o di thabetšego le batho ba Jehofa, e ka ba e le sebokeng sa phuthego seo se kgothatšago goba kopanong? Go thwe’ng ka phihlelo e kgahlišago yeo o bilego le yona bodireding goba mohlomongwe poledišano e agago le modumedigotee? Se se bontšha gore ga se wa lebala Jehofa; le yena ga se a go lebala. Jehofa o gopola kamoo o mo hlanketšego ka potego. Le gona o fagahletše go go thuša gore o boele go yena.

Jehofa o re: “Ke tla tsoma dinku tša ka gomme ka di hlokomela. Ke tla hlokomela dinku tša ka ka tlhokomelo ya yo a fepago mohlape wa gagwe mohlang a le gare ga dinku tša gagwe tšeo di bego di gašantšwe gohle; ke tla di hlakodiša mafelong ka moka ao di gašanyeditšwego.”—Hesekiele 34:11, 12.