GE José wa nywaga e 11 a hudugetše Santo Domingo, o ile a iphediša ka go phadimiša dieta, go rekiša shaved ice le dinamune. Ge e be e sa le lesogana o be a tsebja ka go šoma ka thata. Nywaga e itšego ka morago, mogolo’agwe yo e bego e le yo mongwe wa Dihlatse tša Jehofa o ile a mo kgopela gore a hlokomele ntlo ya gagwe. José o ile a bona puku ya O ka Phela ka mo go sa Felego Paradeiseng mo Lefaseng godimo ga tafola ka phaphošing ya go jela, ke moka a fetša bošego ka moka a e bala. O ile a lemoga gore o hweditše selo seo se mo neilego morero bophelong.

Mafelobekeng a latetšego, José o ile a ya Holong ya Mmušo ya kgauswi gomme a ipolela gore ke yo mongwe wa Dihlatse tša Jehofa. O ile a botša bana babo rena gore o ithutile gore o swanetše go tla dibokeng le go bolela ditaba tše dibotse. Le gona o ile a ba botša gore ka ge a badile puku ya O ka Phela ka mo go sa Felego, o ithutile ka dilo tšeo Bakriste ba sa swanelago go di  dira, gomme a ba kgonthišetša gore o be a sa dire dilo tša mohuta woo. Ka morago ga matšatši a lesomehlano, José o ile a ba mogoeledi. O ile a kolobetšwa ka morago ga dikgwedi tše tshela, ge a na le nywaga e 21.

José o ile a tlogela mošomo wa gagwe ka ge o be o šitišana le diboka, gomme a tšea mošomo woo o bego o mo lefa kotara ya mogolo wa gagwe wa nakong e fetilego. Ga bjale o ile a ba le lenaneo leo le mo dumelelago go ya dibokeng le go ba mmulamadibogo wa ka mehla. Eupša ka morago ga gore a nyale le go ba le barwa ba babedi, o ile a swanela ke go kgaotša go ba mmulamadibogo.

José o be a ikemišeditše go ruta barwa ba gagwe go tloga boseeng. Ka gona, ge mosadi wa gagwe Josefina, a be a na le dikgwedi tše tharo a imile morwa wa bona wa mathomo, e lego Noé, José o ile a bala Puku ya ka ya Ditaba tša Beibele ka go hlaboša a holofetše gore ngwana yo a lego ka popelong o a mo kwa. Nakong ya ge Noé a belegwa, José o be a feditše go mmalela puku yeo. O ile a dira se se swanago le ka morwa wa bona wa bobedi, e lego Neftalí.

Ge nako e dutše e eya, José o ile a ba mookamedi wa kgwebo moo a ilego a hwetša mogolo woo o bego o feta ga lesome mogolo wa mošomo wa gagwe wa nakong e fetilego. Lega go le bjalo, ka 2008, ge barwa ba gagwe ba na le nywaga e 10 le 13, o ile a tlogela go ba mookamedi gomme a ba mmulamadibogo gape—mo nakong ye, a na le mosadi gotee le bana. Ka ge mogolo wa gagwe o be o fokotšegile, go ile gwa nyakega gore ditho ka moka tša lapa di dirišane e le gore di fokotše ditshenyagalelo. Ka moka ga bona e le ba bane ba swara dithuto tša Beibele tše e ka bago tše 30 kgwedi le kgwedi. Jesu o re kgonthišetša gore ge e ba re etiša Mmušo pele, Jehofa o tla re šegofatša. (Mat. 6:33) José le lapa la gagwe ba botile kholofetšo yeo gomme ba iponetše ka noši gore Jehofa o phethagatša lentšu la gagwe.