Tʼóóʼahayóígóó diné Jiihóvah Yá Dahalneʼé ániid oodląʼ hanáánákaiígíí átʼé danízin. Ákótʼé ndi tʼááʼaanínígíí God bá ndaasʼaʼ yę́ę 2,700 dóó baʼaan nááhai yę́ędą́ą́ʼ éí bá “ooʼíinii” dabidiʼníigo bá ndahasneʼ. (Isaiah 43:10-12) 1931jįʼ Diyin God Bizaad Yaa Daʼółtaʼii danihidiʼníí ńtʼééʼ. Áko kʼad éí haʼátʼíísh biniyé Jiihóvah Yá Dahalneʼé bee danihiʼdóojiʼ?

NihiDiyin God bee bééhoʼdílzin. Ałkʼidą́ą́ʼ Diyin God Bizaad yílá bee akʼedaʼashchínę́ę God bízhiʼ Jiihóvah tsostsʼidi mííl dóó baʼaan ánéelą́ąʼdi biiʼ daasdzoh. Tʼóóʼahayóígóó Diyin God Bizaad béénídaʼalyaago Jiihóvah bízhiʼ yę́ęgi Bóhólníihii doodaiiʼ God yiih dayiiznil. Ákondi, tʼááʼaanínígíí God bízhiʼ Jiihóvah yee Mózes dóó David yichʼįʼ ádééhoosįįd. Díí biniinaa díí átʼéego David akʼeʼashchı̨́: “Diyin God bichʼįʼ dahotaał; bízhiʼ baa dahohniihgo dahohtaał! . . . Bízhiʼ éí Jiihóvah wolyé, éí bidááhdóó nihił nidahoozhǫǫh leʼ!” (Psalm 68:4) God éí Mózes íidííniid: “Díí shízhiʼgo ahoolʼáa doo.” (Exodus 3:15) Áko Jiihóvah bízhiʼ yee, god tʼóó bedaʼalyaaígíí yitsʼąą łah átʼé. Díí éí baa nihił dahózhǫ́ǫgo God bízhiʼ dílzinígíí bee ndasiidzı̨́.

Bee nihiʼdójíhígíí nihindaanish yee ííshjání ííłʼı̨́. Ałkʼidą́ą́ʼ daʼíldeeʼígíí Jiihóvah dayoodlą́ągo yaa ndahasneʼ, Éíbel bee hahoolzhiizh éí tʼáá ákogi ájítʼéii ńtʼééʼ. Áádóó wóshdę́ę́ʼ hodeeshzhiizhgo Nóah, Éíbraham, Sárah, Mózes, David, dóó náádaałaʼ “daʼooʼíinii tʼáadoo bee néelą́ʼígóó” bá dahalneʼígíí yidiikai. (Hebrews 11:4–12:1) Tʼáadoo átʼéégóó łaʼ da bikʼí hodiitʼą́ągo, ooʼíinii aadahwiinítʼı̨́ı̨́ góneʼ bá hadoodzih. Tʼáá ákótʼéego nihí ałdóʼ doo neʼniidlı̨́ı̨́góó nihiGod tʼááʼaanínígíí bá ooʼíní niidlı̨́įgo bá nahwiilneʼ doo.

Jesus éí bidaʼiilʼı̨́. Diyin God Bizaad éí Jesus “baʼahódlíigo tʼáá aaníí halneʼii” yił níigo yee yiyíízhiʼ. (Revelation 3:14) Jesus éí kódííniid, ‘Nízhiʼ bee bił hweeshneʼgo ánítʼéii bił béédahózingo íishłaa,’ dóó God ‘tʼáá aaníinii baa hashneʼ doo.’ (John 17:26; 18:37) Áko tʼááʼaaníigo Christ yikééʼ deiyíkááhígíí tʼáá íiyisíí Jiihóvah bízhiʼ dazhdísin, dóó bééhózingo ádajiłʼı̨́į doo. Áko éí biniinaa Jiihóvah Yá Dahalneʼé haleebee God bízhiʼ deidísin dóó bééhózingo ádayósin.

• Haʼátʼíísh biniyé Diyin God Bizaad Yaa Daʼółtaʼii éí Jiihóvah Yá Dahalneʼé yee ádaʼdéijiʼ?

• Nahasdzáán bikáaʼgi Jiihóvah bá dahalneʼiishąʼ haa nízáádę́ę́ʼ hólǫ́ǫgo hahoolzhiizh?

• Háísh éí tsʼídá aláahdi Jiihóvah Yáhalneʼii nilı̨́?