Noomanya Abajurizi ba Yehova bangahi? Bamwe aharibo nibabaasa kuba nibatuura haihi naiwe, nibakora naiwe, nari nibashoma naiwe. Obundi nibabaasa kuba baragaaniireho naiwe ebirikukwata ahari Baibuli. Turi bantu ba muringo ki kandi ahabw’enki nitubuurira abandi aha bi turikwikiriza?

Turi abantu ba butoosha. Nituruga omu myanya n’omu nganda zitarikushushana. Bamwe ahariitwe tukaba turi omu madiini gatarikushushana, n’abandi batarikwikiriza ngu hariho Ruhanga. Kwonka buri omwe ahariitwe atakahindukire Omujurizi wa Yehova, akabanza yaatwara obwire yaayega eki Baibuli erikwegyesa. (Ebyakozirwe 17:11) Akaikiriza ebi yaayegire, reero yaayecweramu kuheereza Yehova Ruhanga.

Nitugasirwa omu kwega Baibuli. Naitwe twine obweremwa kandi nituhikwaho oburemeezi nk’abandi. Kwonka ahabw’okuteeraho kugyendera aha misingye ya Baibuli butoosha, tubaasize kugira okushemererwa. (Zaaburi 128:1, 2) Egi n’enshonga emwe ahabw’enki nitugaaniira n’abandi aha bintu birungi ebi twegire omu Baibuli.

Nitugyendera aha mitindo ya Ruhanga. Emitindo y’omu Baibuli neetuhwera kuha abandi ekitiinisa n’okugira emitwarize mirungi nk’obwesigwa n’embabazi. Neehwera abantu kuba ab’obujunaanizibwa n’okugira obumwe n’emitwarize mirungi omu ka. Ahabw’okumanya ngu ‘Ruhanga tashoroora mu bantu,’ omu nsi yoona twine obumwe omu bi turikwikiriza, titurikushoroora mu rangi kandi titurikwejwanzya omu by’obutegyeki. N’obu turaabe turi nk’abandi bantu, enyikiriza yaitu neetureetera kuba ab’omutaano.​—Ebyakozirwe 4:13; 10:34, 35.

• Abajurizi ba Yehova bari nk’abandi mu miringo ki?

• Ni mitindo ki erikukwata aha mitwarize ei Abajurizi ba Yehova beegire omu Baibuli?