Emirundi mingi, abantu ba Yuda bakaruga ahari Yehova baatandika kuramya baaruhanga b’ebishuba. Kumara emyaka mingi, Yehova akateeraho kubahwera. Akoohereza baanabi baingi kubarabura, kwonka bakanga kuhurikiza. Omu mwanya gw’ekyo, bakaba nibashungisa baanabi abo. Mbwenu shi Yehova akamaraho ata okuramya ebishushani?

Omugabe wa Babulooni, Nebukadeneeza, akaba naasingura ihanga aha rindi. Omurundi gw’okubanza obu yaasingura Yerusaalemu, akakwata Omugabe Yehoyakimu, abanyiginya, abarwani b’amaani, n’abaheesi, yaabatwara Babulooni. Akatwara n’eby’obugaiga byona eby’omu hekalu ya Yehova. Bwanyima Nebukadeneeza akataho Zedekia kuba omugabe wa Yuda.

Omu kubanza, Zedekia akoorobera Nebukadeneeza. Kwonka amahanga agaabaire gari haihi na baanabi b’ebishuba bakaha Zedekia obuhabuzi ngu agomere Babulooni. Yeremia akamurabura ati: ‘Waaba omugomi, nihaija kubaho okufa, enjara, n’endwara omuri Yuda.’

Bwanyima ya Zedekia kutegyeka emyaka munaana, akacwamu kugomera Babulooni. Akashaba eihe rya Misri kumuhwera. Nebukadeneeza akoohereza eihe rye kutaahirira Yerusaalemu, baayehinguririza orurembo rwona. Yeremia akagambira Zedekia ati: ‘Yehova naagira ngu waayehayo omu mikono ya Babulooni, iwe n’ab’omu rurembo nimwija kuhonokaho. Kwonka ku oraayangye, Abababulooni nibaija kwotsya Yerusaalemu kandi babatware nk’enkwatwa.’ Zedekia akagira ati: ‘Tindikwija kwehayo!’

 Bwanyima y’omwaka gumwe n’ekicweka, eihe rya Babulooni rikashenyagura ebisiika bya Yerusaalemu kandi baayotsya orurembo. Bakootsya hekalu, baita abantu baingi, kandi baatwara baingi nk’enkwatwa.

Zedekia akahunga yaaruga Yerusaalemu, kwonka nabwo Abababulooni bakamukurata bamukwata. Bakamukwatira haihi na Yeriko kandi baamureetera Nebukadeneeza. Omugabe wa Babulooni akareetera Zedekia kureeba abaana be barikwitwa. Kandi akaihamu Zedekia amaisho, reero yaamuta omu kihome, ahu yaafeereire. Kwonka Yehova akaraganisa abantu ba Yuda ati: ‘Bwanyima y’emyaka 70, niinyija kubagarura omu ka Yerusaalemu.’

Niki ekyabaire nikiija kuba aha bato abaabaire batwirwe nk’enkwatwa omuri Babulooni? Bakaba nibaija kuguma bari abeesigwa ahari Yehova?