Eiziina rya Ruhanga ni Riiha? Ruhanga naagira ati: “Niinye Yehova.” (Okuruga 6:2) Eiziina rya Ruhanga riri omu Baibuli emirundi nka 7,000. Envunuura za Baibuli enyingi zikaihamu eiziina eri kandi omu mwanya gwaryo baatamu ebitiinisa nka “Mukama.” Ruhanga naayenda ngu obe munywani we, n’ahabw’ekyo naakuhiga kukoresa “eiziina rye.”​—Zaaburi 105:1.

Ebitiinisa bya Yehova. Baibuli ku erikuba neegamba ahari Yehova neekoresa ebitiinisa nka “Ruhanga,” “ow’Obushoboorozi Bwona,” “Omuhangi,” “Tataitwe,” “Mukama,” nari “Rukira-boona.” Baibuli erimu okushaba kwingi kw’abaheereza be abaakoreise ebitiinisa n’eiziina rye, Yehova.​—Danieli 9:4.

 Oku Ruhanga Ari. Ruhanga n’omwoyo ogutarikureebwa. (Yohaana 4:24) Baibuli neegira ngu “tihariho orareebire Ruhanga.” (Yohaana 1:18) Baibuli neeyoreka enyehurira ze. Abantu nibabaasa kumugwisa kubi, nari ‘kumushemeza.’​—Enfumu 11:20; Zaaburi 78:40, 41.

Emitwarize ya Ruhanga ey’Omuhendo. Ruhanga tarikushoroora abantu b’amahanga goona n’embeera zoona. (Ebyakozirwe 10:34, 35) Kandi ‘n’ow’okusaasira n’embabazi, otarikurahuka kugira ekiniga, oijwire embabazi n’amazima.’ (Okuruga 34:6, 7) Kwonka, Ruhanga aine emitwarize ena emikuru erikukira kushemeza.

Amaani. Ahabw’okugira ngu ni “Ruhanga ow’Obushoboorozi Bwona,” aine amaani agataine bugarukiro agarikumubaasisa kuhikiiriza buri kimwe eki arikuraganisa.​—Okutandika 17:1.

Obwengye. Obwengye bwa Ruhanga nibukirira kimwe obw’omuntu weena. Eki nikyo Baibuli erikuba neemanyisa ku erikugira ngu niwe ‘wenka oine obwengye.’​—Abarooma 16:27.

Oburingaaniza. Butoosha Ruhanga naakora ekihikire. Ebi arikukora ‘bihikiriire,’ kandi tarikubaasa kugira obutari buringaaniza.​—Eky’Ebiragiro 32:4.

Rukundo. Baibuli neegira ngu ‘Ruhanga ni rukundo.’ (1 Yohaana 4:8) Yehova taine rukundo kyonka, beitu we wenyini ni rukundo. Omutwarize gwe omukuru ogwa rukundo nigukwata ahari buri kimwe eki arikukora, kandi nigutugasira omu miringo mingi.

Omukago Ogu Ruhanga Aine n’Abantu. Ruhanga ni Tataitwe omu iguru orikutukunda. (Matayo 6:9) Twamwikiririzamu, nituba banywani be. (Zaaburi 25:14) Nangwa, Ruhanga naakweta kumwirira haihi kurabira omu kushaba, n’okumwegyekyera “okushoberwa kwawe kwona, ahabw’okuba naakutaho omutima.”​—1 Petero 5:7; Yakobo 4:8.

Yesu Tarikwingana na Ruhanga. Yesu n’ow’omutaano, ahakuba niwe wenka ou Ruhanga yaayehangiire. Niyo nshonga ahabw’enki Baibuli neemweta Omwana wa Ruhanga. (Yohaana 1:14) Yehova bwanyima y’okuhanga Yesu, akamuhindura “omukozi mukuru,” kandi yaamukoresa kuhanga buri kimwe na buri omwe.​—Enfumu 8:30, 31; Abakolosai 1:15, 16.

 Yesu Kristo taragizire ngu niwe Ruhanga. Kureka akagira ati: “Kwonka nyowe nimmumanya, ahabw’okuba nkaruga ahari [Ruhanga], kandi niwe yantumire.” (Yohaana 7:29) Ku yaabaire naagamba n’abeegi be akeeta Yehova “Ishe kandi Shoimwe,” na “Ruhanga we, kandi Ruhanga waanyu.” (Yohaana 20:17) Yesu ku yaaherize kuzooka, Yehova akamutwara omu iguru yaamuha obushoboorozi aha rubaju rwe rwa buryo.​—Matayo 28:18; Ebyakozirwe 2:32, 33.

Yesu Kristo Naabaasa Kukuhwera Kwirira Haihi Ruhanga

Yesu akaija omu nsi kutwegyesa ebirikukwata ahari Ishe. Yehova akeegambira butunu ahari Yesu ati: ‘Ogu n’Omwana wangye ou ndikukunda. Mumuhurire.’ (Mako 9:7) Yesu naamanya gye Ruhanga okukira omuntu ondiijo weena. Akagira ati: “Tihariho orikumanya Omwana oku ari kureka Ishe, n’obu yaakuba orikumanya Ishe oku ari kureka Omwana, n’omuntu weena ou Omwana aikiriza kumumushuuruurira.”​—Luka 10:22.

Yesu naayoreka gye emitwarize ya Ruhanga. Yesu akooreka gye emitwarize nk’eya Ishe, yaahika n’aha kugira ati: “Ondeebire, biri areebire Isheboona.” (Yohaana 14:9) Yesu akahwera abantu kwirira haihi na Ruhanga arikuteeraho kugira rukundo nk’eya Ishe omu bigambo n’omu bikorwa. Akagira ati: ‘Niinye muhanda, n’amazima, n’amagara; tihariho orikwija ahari Isheboona, atarabire muriinye.’ (Yohaana 14:6) Kandi akagaruka yaagira ngu abaheereza ba Ruhanga ab’amazima nibaija ‘kuramya Isheboona omu mwoyo n’omu mazima; ahakuba Isheboona naasherura abari nk’abo kumuramya.’ (Yohaana 4:23) Kiteekateekyeho! Yehova ariyo naasherura abantu abari nkaiwe abarikwenda kumanya amazima agarikumukwataho.