“Ku muraabe nimushaba, murekye kushaba nimugarukagaruka omu bigambo.”​—Matayo 6:7.

Yehova tarikwenda ngu tugume nitushaba ebi tukwatsire omu mutwe nari ebihandiikirwe omu bitabo. Kureka, naayenda ngu tugambe kuruga aha mutima. Teebereza oku orikubaasa kushoberwa munywani waawe yaaguma naakugambira ebigambo nibyo bimwe buri izooba. Abanywani barungi tibarikusherekana. Twashaba Tataitwe ow’omu iguru omu bigambo ebyaitu, nituba nitugamba nawe nka munywani waitu.

‘Nimushaba timurikuheebwa, ahakuba nimushaba kubi.’​—Yakobo 4:3.

Titwine kuteekateeka ngu Ruhanga naija kugarukamu okushaba kwaitu twamushaba ebi turikumanya ngu tarikwenda tukore nari tugire. Nk’eky’okureeberaho, mbwenu shi Yehova naagarukamu omuteezi wa zaara yaamushaba kumuhwera kusinga, kandi obwo naarabura butunu aha mururu n’okwikiririza omu ngisha? (Isaaya 65:11; Luka 12:15) Ti ky’oburyo kuteekateeka ngu Yehova naagarukamu okushaba nk’okwo! Ruhanga kubaasa kugarukamu okushaba kwaitu, twine kuhamya ngu ebi turikushaba nibihikaana n’ebi arikwenda ebiri omu Baibuli.

 ‘Orikweita amatu ngu atahurira ebiragiro, okushaba kwe n’ekirikunugwa.’​—Enfumu 28:9.

Ira, Ruhanga akaba atarikugarukamu okushaba kw’abarikwanga ebiragiro bye ebihikiriire. (Isaaya 1:15, 16) Ruhanga tahindukire. (Malaki 3:6) Twaba nitwenda ngu agarukyemu okushaba kwaitu, twine kukora ebirikuhikaana n’ebiragiro bye. Kandi shi ku twakuba twakozire ebibi ira? Nikimanyisa ngu tarikubaasa kuhurira okushaba kwaitu? Ngaaha buzima! Twayoreka ngu tweteisize kandi tukateeraho kumushemeza, naija kutusaasira.​—Ebyakozirwe 3:19.