OMUTWE OGURI AHA MUNAARA | OKWETEGYEREZA OKWOREKWA KW’OMU IGURU
Ebibuuzo Ebirikukwata aha Bari omu Iguru
Orayebuurize oku eiguru riri n’abo abarikutuurayo? Waaba oreebuurize, tiiwe wenka. Okumara emyaka mingi, abantu batwire nibateebereza aha nshonga egi. Abamwe nibagira ngu omu iguru hariyo baatatenkuriitwe abashemereire kuheebwa ekitiinisa. Abamwe nibagira ngu n’omwanya ogurimu obusingye, baamaraika n’abantu barungi abaafiire. Kandi abandi nibagira ngu n’omwanya ogurikutuurwamu baaruhanga baingi munonga.
Abantu baingi nibagira ngu titurikubaasa kumanya ebiri omu iguru ahabw’okuba tihaine oraarugireyo kutugambira ebiriyo. Kwonka ekyo buzima tikihikire. Yesu obu yaabaire atakaizire omu nsi akaba naatuura omu iguru. Akagambira abeebembezi b’ediini butunu ati: “Ahakuba tindarugire mu iguru kukora ebi ndikweyendera, kureka okukora ebi Owantumire akunda.” N’ahabw’ekyo Yesu akaba naagamba ebi yaayereebiire omu iguru obu yaagira entumwa ze ati: “Omu nju ya Tata harimu emyanya mingi ey’okutuuramu.”—Yohaana 6:38; 14:2.
Ruhanga Ishe Yesu, naayetwa Yehova, kandi ‘enju’ ye ni iguru. (Zaaburi 83:18) N’ahabw’ekyo, tihariho owaabaire naabaasa kushoboorora gye ekiri omu iguru kukira Yehova Ruhanga na Yesu Kristo. Batumanyiise ebintu bingi ebirikukwata aha by’omu iguru barikukoresa okworekwa oku baahaire abeesigwa.
Ekicweka ekirikukurataho nikishoboorora ahari bimwe ebiri omu Baibuli ebirikworeka ebi abantu baareebire omu kworekwa kutarikushushana. Waaba nooshoma aha birikukwata aha kworekwa oku, ijuka ngu eiguru eri turikugambaho tihariho ebintu ebi turikubaasa kureeba nari kukwata. N’ahabw’ekyo, Ruhanga omu mwanya gw’okushoboorora ebintu omu muringo ogurikwetegyerezibwa ebihangirwe eby’omwoyo byonka, akakoresa okworekwa kushoboorora oku iguru ery’omwoyo ririkushusha. Okworekwa oku nikwija kukuhwera kwetegyereza abo abarikutuura omu iguru, nari “emyanya mingi ey’okutuuramu.”
