Ab’oruganda rwa Leevi abatari banyamurwa bakaba nibakora emirimo erikushushana n’ey’abaserukare abaporiisi. Bakaba baine omuserukare omukuru owaabaire naabakurira aha hekalu. Omuhandiiki omwe Omuyudaaya Philo, naagamba aha mirimo y’abaserukare aba ati: “Bamwe aharibo [Abaleevi] bakaba nibeemerera aha miryango nk’abarinzi, abandi bakaba bari omunda [ya hekalu] haihi n’omwanya ogurikwera kugira ngu abahenzi b’ebiragiro batahikayo, bakigyendereire nari batakigyendereire. Bakaba baguma nibaihaihana nyomushana na ny’ekiro barikwetoorora omwanya ogwo kugurinda.”

Abaserukare aba bakaba bahwera ab’eishengyero obwire bwona. Kandi nibo Bayudaaya bonka abaabaire baikiriziibwe Abarooma kukwata ebirwaniso.

Kurugiirira aha mucondooza omwe Joachim Jeremias, “Yesu akabuuza abaserukare ahabw’enki bataramukwatsire obu yaabaire naayegyesa omu hekalu. Akaba atarikwija kubabuuza atyo, ku ogire ngu bakaba batari barinzi b’aha hekalu.” (Mat. 26:55) Omuhandiiki niwe omwe naikiriza ngu abaayohereziibwe kukwata Yesu enyimaho bakaba bari abaserukare b’aha hekalu. (Yoh. 7:32, 45, 46) Abaserukare aba na mukama waabo bakatumwa kureeta abeegi ba Yesu omu maisho g’eishengyero, kandi nibabaasa kuba nibo baashohoize Paulo aheeru ya hekalu.​—Byak. 4:1-3; 5:17-27; 21:27-30.