Nyamenle ɛmbua asɔneyɛlɛ bie mɔ. Suzu ninyɛne nwiɔ mɔɔ ɔnrɛmaa Nyamenle ɛnrɛdie awie asɔneyɛlɛ la anwo.

1. Saa asɔneyɛlɛ ne nee Nyamenle ɛhulolɛdeɛ ɛnyia a

 Nyamenle ɛmbua asɔneyɛlɛ mɔɔ ɔ nee ye ɛhulolɛdeɛ anzɛɛ ye ngyinlazo ne mɔ mɔɔ wɔ Baebolo ne anu la ɛnyia la. (1 Dwɔn 5:14) Kɛ neazo la, Baebolo ne se ɔnle kɛ yɛyɛ anyebolo. Kyakyadolɛ maa bɛyɛ anyebolo. (1 Kɔlentema 6:9, 10) Yemɔti saa ɛyɛ asɔne kɛ Nyamenle ɛmaa ɛli loto a, ɔnrɛdie. Nyamenle ɛnle awie mɔɔ ɛkola ɛmaa ɔyɛ debie biala mɔɔ ɛkulo la ɔmaa wɔ a. Nɔhalɛ nu, ɔwɔ kɛ ɛhye maa ɛ nye die. Anrɛɛ mɔɔ menli baha ahile Nyamenle kɛ ɔyɛ la bamaa wɔazulo.​—Gyemise 4:3.

2. Saa ahenle mɔɔ ɔlɛyɛ asɔne ne la ɛnyɛ tieyɛ a

 Nyamenle ɛndie menli mɔɔ ɛzi pi kɛ bɛfa bɛ nyɛleɛ bɛaha ye ɛya la asɔneyɛlɛ. Kɛ neazo la, Nyamenle hanle hilele menli mɔɔ bɛse bɛsonle ye noko bɛndie ye la kɛ: “Bɛyɛ nzɛlɛlɛ dɔɔnwo kɛyɛ nyɛ bɔbɔ a, menrɛdie. Bɛ sa anwo le mogya ngome.” (Ayezaya 1:15) Noko saa bɛhakyile bɛ ndenle ne mɔ na bɛ nee Nyamenle ‘bɔle bɛ avinli a,’ anrɛɛ ɔbadie bɛ asɔneyɛlɛ.​—Ayezaya 1:18.