Kenle ko bie mɔɔ ɛnee ɛyɛlɛ wɔ nu na ahumu ɛlɛtu kpalɛ wɔ Alberta, Canada la, ɛnee kale ne mɔɔ Bob ɛlɛka la ɛlɛtia kpalɛ, arɛlevilɛ nu ala yɛɛ ye kale ne anzi taye ne mɔɔ wɔ bɛne zo la dele a. Alimoa ne, ɛnee Bob ɛnze mɔɔ ɛzi a, na ɔyɛle ye adwenle kɛ ɔpɛ Kilomita nnu (mi 3) mɔɔ la ɔ nyunlu la yeahɔ sua nu.

Wɔ kɛlata mɔɔ Bob hɛlɛle hɔmaanle Gyihova Alasevolɛ mɔɔ wɔ ye ɛkɛ la anu, ɔhanle mɔɔ zile nzinlii la anwo edwɛkɛ kɛ: “Mgbavolɛ nee mbɛlɛra nnu bie hanle bɛ kale ne bikyele me na bɛmaanle menwunle kɛ, me kale ne taye ɛde. Yɛgyinlanle ahane na bɛhanle kɛ bɛyɛ ye boɛ bɛamaa me. Ɛnee mengola menwu ye saa melɛ taye bieko yɛɛ jack mɔɔ bɛbava bɛayɛ ye boɛ a. Mendɛnlanle me abuburama ebia ne anu wɔ adenle ne foa ko, na bɛhotole kale ne abo bɛdule taye ne na bɛvale fofolɛ bɛwulale. Ɛnee maanle nu le weɛlɛkɔkɔ kpalɛ. Yɛɛ ɛnee bɛziezie bɛ nwo kɛnlɛma, noko bɛyɛle me kale ne boɛ bɛmaanle me. Ɔhale me ngome a, anrɛɛ menrɛhola ye yɛ.

“Meda Alasevolɛ ngakula nnu zɔhane ase kɛ bɛboale me la. Ɛnee Alasevolɛ zɔhane lua adenle zo ɛlɛkabɔ edwɛkpa ne nolo. Ngakula ɛhye mɔ yɛ mɔɔ bɛkilehile la. Bɛboale me kpalɛ, bɛamaa me nwo angyele me, na me nye sɔ ye kpole. Meanzuzu nwolɛ ɛlɛ kɛ mebayia menli mgbalɛ zɛhae wɔ adenle ne azo kenle zɔhane!”