Mɔɔ Limoa Kɔmaa Kɔlentema 15:1-58
15 Mediema, akee mekakye bɛ edwɛkpa ne mɔɔ membɔle ye nolo mengilele bɛ,+ na bɛdabɛ noko bɛliele bɛdole nu, na bɛzɔ nu kpundii la.
2 Bieko, saa bɛsɔ edwɛkpa ne mɔɔ membɔle ye nolo mengilele bɛ la anu kpundii a, bɛbalua zo bɛalie bɛ ngoane, kyesɛ bie a bɛrayɛle diedima mgbane.
3 Na edwɛkɛ mɔɔ limoa mɔɔ medame noko menyianle mɔɔ menvale memaanle bɛ la a le kɛ yɛ ɛtane ti a Kelaese wule a, kɛ mɔɔ Ngɛlɛlera ne kile la;+
4 na bɛziele ye+ na ye kenle nsa ne azo+ bɛdwazole ye,+ kɛ mɔɔ Ngɛlɛlera ne kile la;+
5 na ɔyele ɔ nwo ɔhilele Sifase,*+ yɛɛ akee Bulu Nee Nwiɔ ne.+
6 Ɛhye anzi ɔyele ɔ nwo ɔhilele mediema mɔɔ bo 500 wɔ mekɛ ko anu,+ na bɛ nuhua dɔɔnwo tɛte aze, bie mɔ ɛla wɔ ewule nu bɔbɔ ɛdeɛ.
7 Ɛhye anzi ɔyele ɔ nwo ɔhilele Gyemise,+ yɛɛ akee ɛzoanvolɛma ne amuala.+
8 Awieleɛ ne, ɔyele ɔ nwo ɔhilele medame+ noko mɔɔ mele kɛ awie mɔɔ ye mekɛ andwu na bɛawo ye la.
9 Na medame a mele ekyi kpalɛ wɔ ɛzoanvolɛma ne anu a, na menfɛta kɛ bɛkɛvɛlɛ me ɛzoanvolɛ ɔluakɛ menyɛle Nyamenle asafo ne kpɔdekpɔde.+
10 Noko ɔlua Nyamenle ɛlolɛ kpole ne azo mele kɛ mɔɔ mede la. Na ye ɛlolɛ kpole ne mɔɔ ɔvale ɔlole me la anyɛ mgbane, emomu meyɛ gyima medɛla bɛ muala; noko tɛ medame ɔ, na Nyamenle ɛlolɛ kpole ne mɔɔ wɔ me nwo zo la ɔ.
11 Ɛhye ati saa medame o, anzɛɛ bɛdabɛ o, edwɛkɛ ko ne ala a yɛ muala yɛbɔ ye nolo a, yɛɛ yemɔ ala a bɛlie bɛli a.
12 Na saa yɛlɛka kɛ bɛdwazo Kelaese bɛvi mowuamra anu a,+ ɛnee kɛ ɔyɛ mɔɔ bɛ nuhua bie mɔ se bɛnrɛdwazo mowuamra ɛ?
13 Nɔhalɛ nu, saa bɛnrɛdwazo mowuamra a, ɛnee noko bɛandwazo Kelaese.
14 Na saa bɛandwazo Kelaese a, ɛnee yɛ edwɛkɛhanlɛ ne le mgbane, yɛɛ bɛ diedi ne noko le mgbane.
15 Eza noko bɛbabu yɛ kɛ yɛdi Nyamenle anwo daselɛ adalɛ,+ ɔluakɛ yɛli Nyamenle anwo daselɛ kɛ yedwazo Kelaese,+ mɔɔ saa bɛnrɛdwazo mowuamra a ɛnee ɔkile kɛ yeandwazo ye la.
16 Na saa bɛnrɛdwazo mowuamra a, ɛnee noko bɛandwazo Kelaese.
17 Bieko, saa bɛandwazo Kelaese a ɛnee bɛ diedi ne le mgbane; na bɛtɛte bɛ ɛtane ne mɔ anu.+
18 Eza noko bɛdabɛ mɔɔ bɛla wɔ ewule nu kɛ Kelaese ɛdoavolɛma la ɛminli bɔkɔɔ.+
19 Saa ngoane ɛhye anu ala a yɛnyia anyelazo wɔ Kelaese anu a, ɛnee noko yɛ nwo yɛ anwunvɔne tɛla awie biala.
20 Noko kɛkala, bɛdwazo Kelaese bɛvi mowuamra anu kɛ bɛdabɛ mɔɔ bɛla wɔ ewule nu la anu ma mɔɔ limoa.+
21 Na kɛ mɔɔ ewule luale sonla ko anwo zo a rale la,+ zɔhane ala a ewudwazo ɛlua sonla ko anwo zo ɛra a.+
22 Na kɛ mɔɔ Adam ati menli kɔsɔɔti wu la,+ zɔhane ala a Kelaese ati menli kɔsɔɔti banyia ngoane a.+
23 Noko awie biala ɛdeɛ bara wɔ ye mekɛ nloa: Kelaese a le ma mɔɔ limoa a,+ ɛhye anzi bɛdabɛ mɔɔ bɛle Kelaese ɛdeɛ la, na bɛbadwazo ɛhye mɔ wɔ Kelaese ɛralɛ ne anu.+
24 Akee awieleɛ ne, ɔbava Belemgbunlililɛ ne yeamaa ye Nyamenle nee ɔ Ze ne, wɔ mekɛ mɔɔ yezɛkye arane kɔsɔɔti nee tumivolɛma yɛɛ tumi kɔsɔɔti la.+
25 Na ɔwɔ kɛ ɔdi belemgbunli kɔkpula kɛ Nyamenle kɛva agbɔvolɛ kɔsɔɔti kɛwula ɔ gyakɛ abo la.+
26 Na kpɔvolɛ mɔɔ li amozi mɔɔ bɛbazɛkye ye la a le ewule.+
27 Ɔluakɛ Nyamenle “ɛva ninyɛne kɔsɔɔti ɛwula ɔ gyakɛ abo.”+ Noko saa ɔka kɛ ‘bɛva ninyɛne kɔsɔɔti bɛwula ɔ bo’ a,+ ɔda ali wienyi kɛ Mɔɔ vale ninyɛne kɔsɔɔti wulale ɔ bo la ɛmboka nwo.+
28 Na saa bɛfa ninyɛne kɔsɔɔti bɛwula ɔ gyakɛ abo a, akee Ralɛ mumua ne noko bava ɔ nwo awula Mɔɔ vale ninyɛne kɔsɔɔti wulale ɔ gyakɛ abo la abo,+ na Nyamenle ali ninyɛne kɔsɔɔti azo tumi.+
29 Saa tɛ ye zɔhane a, ɛnee duzu a bɛdabɛ mɔɔ bɛlɛsɔne* bɛ bɛahɔ ewule nu la bayɛ a?+ Saa bɛnrɛdwazo mowuamra fee a, ɛnee kɛmɔti a bɛsɔne bɛdabɛ noko bɛkɔ ewule nu ɛ?
30 Kɛmɔti a yɛdayɛ noko yɛwɔ esiane nu dɔnehwele* biala ɛ?+
31 Dahuu me nee ewule yia. Mediema, ɛhye le kɛ me nwo mɔɔ metu ye wɔ yɛ Awulae Kelaese Gyisɛse anu wɔ bɛdabɛ ti ala la.
32 Saa me nee nane anwo ɛzulolɛ ɛho wɔ Ɛfɛsɛse+ kɛ mɔɔ menli bie mɔ yɛ ye la a, ɛnee duzu nvasoɛ a menyia ye a? Saa bɛnrɛdwazo mowuamra a, ɛnee “bɛmaa yɛli na yɛnlo, ɔluakɛ ɛhyema ɛnee yɛwu.”+
33 Bɛmmamaa bɛbɛlɛbɛla bɛ. Agɔnwolɛ ɛtane sɛkye ɛbɛla* kpalɛ.+
34 Bɛmaa bɛ nye ɛla ɛkɛ na bɛyɛ mɔɔ le kpalɛ la na bɛmmayɛ ɛtane, ɔluakɛ bɛ nuhua bie mɔ ɛnlɛ Nyamenle anwo ndelebɛbo fee. Melɛka ɛhye meamaa bɛabɔ anyiemgba.
35 Noko akee, awie babiza kɛ: “Kɛzi bɛbadwazo mowuamra ɛ? Na sonlabaka boni a bɛbava bɛara a?”+
36 Wɔmɔ mɔɔ ɛnlɛ adwenle a! Mɔɔ ɛdua la ɛnfifi* kyesɛ ɔdimoa ɔkpɔlɔ.*
37 Na mɔɔ ɛdua la, tɛ baka ne mɔɔ bafifi la a ɛdua a, emomu ma ne ala, bie a hwiiti anzɛɛ ma gyɛne bie ɔ;
38 noko Nyamenle maa ye baka kɛ mɔɔ ɔkulo la, na ɔmaa ma ko biala nyia ɔ ti anwo baka.
39 Nwonane kɔsɔɔti ɛnle ko, asolo sonla nwonane, asolo nane nwonane, asolo nloma nwonane yɛɛ asolo fɛlɛ nwonane.
40 Na anwomanyunlu abɔdeɛ wɔ ɛkɛ+ yɛɛ azɛlɛ ye azo abɔdeɛ wɔ ɛkɛ;+ noko asolo anwomanyunlu abɔdeɛ anyunlunyia yɛɛ asolo azɛlɛ ye azo abɔdeɛ noko ɛdeɛ.
41 Asolo sɛnzɛne ne anyunlunyia yɛɛ asolo siane ne anyunlunyia,+ yɛɛ asolo nwɔlɔra ne mɔ anyunlunyia; na nwɔlɔra ne mɔ bɔbɔ, asolo ko biala anyunlunyia.
42 Zɔhane ala a mowuamra ɛdwazolɛ ne de a. Mɔɔ bɛdua la kpɔlɔ; mɔɔ bɛdwazo ye la ɛmkpɔlɔ.+
43 Bɛdua ye anyiemgba nu; bɛdwazo ye anyunlunyia nu.+ Bɛdua ye bɛtɛɛyɛlɛ nu; bɛdwazo ye tumi nu.+
44 Bɛdua ye wɔ nwonane sonlabaka nu; bɛdwazo ye wɔ sunsum sonlabaka nu. Saa nwonane nu sonlabaka wɔ ɛkɛ a, ɛnee sunsum nu sonlabaka noko wɔ ɛkɛ.
45 Ɔti bɛhɛlɛ kɛ: “Sonla mɔɔ limoa, mɔɔ le Adam la rayɛle sonla* mɔɔ de aze.”+ Adam ne mɔɔ li amozi la rayɛle sunsum mɔɔ maa ngoane.+
46 Noko tɛ sunsum nu ɛdeɛ ne a limoa a. Nwonane nu ɛdeɛ ne a limoa a, na akee sunsum nu ɛdeɛ ne adoa ye.
47 Sonla ne mɔɔ limoa la vi azɛlɛ ye azo yɛɛ bɛvale ndɛtɛlɛ a bɛbɔle ye a;+ sonla ne mɔɔ tɔ zo nwiɔ la vi anwuma.+
48 Kɛ mɔɔ sonla ne mɔɔ bɛvale ndɛtɛlɛ bɛbɔle ye la de la, zɔhane ala a menli mɔɔ wɔ azɛlɛ ye azo la de a; na bɛdabɛ mɔɔ bɛwɔ anwuma la le kɛ mɔɔ vi anwuma rale la.+
49 Na kɛ mɔɔ yɛle mɔɔ bɛvale ndɛtɛlɛ bɛbɔle ye la ɛsaso la,+ zɔhane ala a yɛbayɛ mɔɔ vi anwuma la ɛsaso a.+
50 Noko mediema, meka ɛhye meahile bɛ kɛ nwonane nee mogya ɛnrɛhola ɛnrɛnyia Nyamenle Belemgbunlililɛ ne, yɛɛ mɔɔ kpɔlɔ la ɛnrɛnyia mɔɔ ɛmkpɔlɔ la.
51 Nea! Meka fealeranu edwɛkɛ nwuanzanwuanza bie meahile bɛ: Yɛ muala yɛnrɛla wɔ ewule nu, emomu yɛ muala yɛbahakyi,+
52 ndɛndɛ ne ala, bɛkabɔ bɛ nye bɛade la, wɔ mekɛ mɔɔ bɛbabɔ aweɛne tendenle ne mɔɔ li amozi la. Ɔluakɛ aweɛne ne babɔ,+ na bɛbadwazo mowuamra kɛ menli mɔɔ ɛmkpɔlɔ la, na yɛbahakyi.
53 Na ɔwɔ kɛ ɛhye mɔɔ kpɔlɔ la kakyi yɛ mɔɔ ɛmkpɔlɔ,+ na ɛhye mɔɔ wu la kakyi yɛ mɔɔ ɛnwu ɛlɛ.+
54 Na saa ɛhye mɔɔ kpɔlɔ la kakyi yɛ mɔɔ ɛmkpɔlɔ, na ɛhye mɔɔ wu la kakyi yɛ mɔɔ ɛnwu ɛlɛ la a, akee edwɛkɛ ne mɔɔ bɛhɛlɛ la bara nu kɛ: “Bɛme ewule bɔkɔɔ.”+
55 “Ewule, wɔ konimlilɛ ne wɔ ni? Ewule, wɔ bɔlɔ ne wɔ ni?”+
56 Bɔlɔ ne mɔɔ fa ewule ba la a le ɛtane,+ yɛɛ ɛtane tumi a le Mɛla ne.*+
57 Noko yɛyɛ Nyamenle mo kɛ ɔdua yɛ Awulae Gyisɛse Kelaese anwo zo ɔmaa yɛdi konim a!+
58 Yemɔti me mediema alɔvolɛ, bɛgyinla kpundii,+ bɛzi pi, dahuu bɛyɛ dɔɔnwo+ wɔ Awulae gyima ne anu, ɔluakɛ bɛze kɛ Awulae ati bɛ ɛvɛlɛ ɛnrɛyɛ gyɛne.+
Ɔbodwɛkɛ
^ Eza bɛfɛlɛ ye Pita.
^ Anzɛɛ “bɛlɛnoma.”
^ Anzɛɛ “mekɛ.”
^ Anzɛɛ “subane.”
^ Giliki aneɛ nu, “ɛnnyia ngoane.”
^ Giliki aneɛ nu, “ɔwu.”
^ Anzɛɛ “ɛkɛla.”
^ Anzɛɛ “yɛɛ Mɛla ne maa ɛtane nyia tumi.”
