Siane biala, yɛ nye la kɛ yɛbanlea sunsum nu gyimalilɛ nee vidio ngakyile wɔ JW Broadcasting ne azo. Noko yɛ mediema dɔɔnwo mɔɔ wɔ Africa la ɛngola ɛnnea bie wɔ Yintanɛte ne azo. Duzu ati ɔ?

 Yintanɛte ɛnle Africa ɛleka dɔɔnwo. Wɔ ɛleka mɔɔ bɛlɛ bie noko la, fane dɔɔnwo ne ala ɔnyɛ gyima ndɛndɛ anzɛɛ ye bolɛ yɛ se kpalɛ. Kɛ neazo la, maangyebakyi zo neavolɛ bie mɔɔ wɔ Madagascar la hɔhwenle JW Broadcasting siane gyimalilɛ ko pɛ wɔ Yintanɛte café. Bɛliele ye $16, na ɔtɛla ezukoa mɔɔ menli bie mɔ nyia ye dapɛne biala la! *

 Wɔ ngyegyelɛ ɛhye mɔ amuala anu, kɛkala menli mgbe dɔɔnwo mɔɔ wɔ Africa mɔɔ bɛnlɛ Yintanɛte la kola nea JW Broadcasting. Adenle boni azo?

 Ɔvi 2017, menli dɔɔnwo mɔɔ wɔ Africa ɛleka bie mɔ la kola dua JW TV ne azo nea JW Broadcasting ne bie. Bɛkola bɛnea gyimalilɛ wɔ TV ɛhye azo mɔɔ bɛndua ɛhwee a, ɔgyi zo dɔnehwele 24 kenle ko biala wɔ aneɛ 16 anu.

 Amaa Gyihova Alasevolɛ ahola ayɛ ɛhye la, yɛduale ezukoa yɛmaanle menli mɔɔ nea TV gyimalilɛ zo la kɛ bɛva yɛ ninyɛne ne mɔ bɛgua satellite ne azo. Satellite ne mɔɔ yɛ ninyɛne ne mɔ gua zo la dwu Africa maanle kɛyɛ 35 azo. Siane biala, yɛtua ɛhye anwo kakɛ mɔɔ bo $12,000. Ɔvi mekɛ mɔɔ kɔ mekɛ la, eza yɛtua ezukoa gyɛne yɛmaa bɛnea gyimalilɛ bie mɔɔ bɛlɛyɛ la wɔ TV gyimalilɛleka fofolɛ. Ɛhye maa menli apenle dɔɔnwo kola nea nyianu ngakyile anzɛɛ gyimalilɛ titili mɔɔ gyima ne ati agyakɛnugyinlavolɛ ba a bɛyɛ la.

 Menli dɔɔnwo mɔɔ bie mɔ ɛnle Alasevolɛ la nea JW TV ne bie wɔ sua nu. Noko yɛ mediema dɔɔnwo ɛngola ɛntotɔ ninyɛne mɔɔ bamaa bɛahola bɛahye JW TV ne la. Amaa yɛaboa bɛ la, yɛmaa bɛhyehyɛ ninyɛne mɔɔ bamaa bɛahye JW TV ne la wɔ Belemgbunlililɛ Asalo mɔɔ bo 3,670 la anu amaa mediema ahola anlea JW Broadcasting ne wɔ ɛkɛ. Saa bɛlɛ TV anzɛɛ projector wɔ Belemgbunlililɛ Asalo ɛkɛ ne dɛba a, yemɔ ninyɛne ne mɔɔ bɛtotɔ na bɛava bɛahɔ la anwo kakɛ le $70. Saa bɛnlɛ ninyɛne ɛhye mɔ bie dɛba a, yemɔ nwolɛ kakɛ bahola ayɛ $530.

 Yɛ mediema anye die JW TV ne anwo kpalɛ. Asafo nu kpanyinli bie mɔɔ wɔ Cameroon la hanle kɛ: “Ɔle kɛ yɛ abusua ne lua ɛsɛlɛ zo na yɛnyia mana la.” Odebode, adiema nrenyia bie mɔɔ wɔ Nigeria la hanle kɛ: “Yɛ abusua ne bɔ nu nea JW TV ne fane nsa dapɛne biala. Dahuu me mra ne mɔ anye la mekɛ ɛhye mɔ ade. Saa ɔdwu mekɛ mɔɔ yɛnva yɛnnea JW TV bɔbɔ a, bɛka kɛ yɛhakyi yɛdo ɛkɛ.” Rose mɔɔ ɔdaye noko ɔwɔ Nigeria la hanle kɛ: “Mefa anyelielɛ meaha kɛ, kɛ anrɛɛ mebanlea TV meadie ewiade edwɛkɛ ala la, kɛkala JW TV ne a menea a. Saa metie mɔɔ ɛlɛkɔ zo wɔ ewiade la a, ɔka me ɛya kpole na ɔmaa me mogya fo. Noko JW Broadcasting ne maa anwosesebɛ yɛɛ bɛnyɛ dede wɔ zolɛ! Me nye die nwolɛ kpalɛ. Ɔle nyilalɛ kpole mɔɔ vi Gyihova ɛkɛ.”

 Maangyebakyi zo neavolɛ bie mɔɔ wɔ Mozambique la hanle kɛ wɔ ye maangyebakyi ne anu, saa bɛlɛsi Belemgbunlililɛ Asalo a, bɛfa ninyɛne mɔɔ ɔbamaa bɛahye JW TV la bɛboka nwo. Mediema mɔɔ wɔ asafo ɛhye mɔ anu la ba debiezukoalɛ ndɛ, bie a ɔka dɔnehwele ko anzɛɛ mɔɔ bo zɔ la, amaa bɛanlea JW Broadcasting ne bie.

 Wɔ 2019 maanle maanle avinli nyianu ne mɔɔ bɛyɛle ye wɔ Johannesburg, South Africa la anu, bɛluale JW TV ne azo bɛmaanle mediema mɔɔ wɔ ɛleka ngakyile ngɔnla la diele ɛdendɛlɛ titili ne mɔ mɔɔ ɛnee Neazo Eku ne anu sonla bie ɛdeɛ boka nwo. Sphumelele mɔɔ yɛ gyima wɔ South Africa Bɛtɛle Broadcasting Gyimalilɛleka ne la hanle kɛ: “Saa dɛba ne a, anrɛɛ ɔwɔ kɛ yɛdua Yintanɛte zo yɛmaa mediema tie ɛdendɛlɛ ne mɔ. Noko kyesɛ Yintanɛte ne le kpalɛ yɛɛ ɔwɔ kɛ yɛtɔ data. Noko ɛnee JW TV ne bolɛ ka aze yɛɛ ɔnde ɔngɔ.”

 Kɛmɔ bɛvile bɛ ahonle nu bɛyele ndoboa bɛboale ewiade amuala gyima ne la ati, yɛ mediema dɔɔnwo mɔɔ wɔ Africa la kola nea JW Broadcasting ne bie wɔ JW TV azo. Yɛ nye sɔ ndenle ngakyile mɔɔ bɛdua zo bɛye ndoboa wɔ donate.dan124.com azo la kpalɛ.