Kakula raalɛ ekyi bie nwunle kɛ esike vi gyima bie anu ɛlɛfinde, na ɔlɛtɛlɛ kɛ amungu la. Ɔhanle kɛ mbulalɛ gyima ne bodane a le kɛ ɔyɛ amungu dɔɔnwo. Debie ekyii zɛhae mɔɔ kakula ne ande ɔ bo la bahola ayɛ ɛzelekɛ. Noko akee, saa yɛande debie mɔɔ anwo hyia la abo a ɔbahola yeamaa yɛ ngoane nwo ara edwɛkɛ. Kɛ neazo la, saa yɛande edwɛkɛ bie mɔɔ wɔ ayile bie anwo la abo kpalɛ a ɔbahola yeava edwɛkɛ kpole yeara.

Saa yɛande sunsum nu ninyɛne bie mɔ abo a ɔkola ɔfa edwɛkɛ kpole ɔba. Kɛ neazo la, menli bie mɔ ande Gyisɛse ngilehilelɛ ne abo. (Dwɔn 6:48-68) Kɛ anrɛɛ bɛbazukoa dɔɔnwo bɛavi ye ɛkɛ la, bɛkpole debie biala mɔɔ Gyisɛse hilehilele bɛ la. Nea kɛzi bɛminlinle debie kpole a!

Asoo ɛdua Baebolo ɛgengalɛ zo ɛkpondɛ adehilelɛ ɔ? Saa ɔle zɔ a, ɛnee ɛfɛta nganvolɛ. Noko, asoo ɔkola ɔba ye kɛ wɔgenga debie mɔɔ wɔande ɔ bo ɔ? Ɔto menli dɔɔnwo. Suzu ninyɛne nsa mɔɔ menli ɛnde ɔ bo la anwo.

• Menli bie mɔ ɛnde Baebolo ne anu edwɛkɛ mɔɔ se “bɛzulo Nyamenle” la abo. Bɛsuzu kɛ Nyamenle mɔɔ anwo yɛ ɛzulolɛ la anwo edwɛkɛ a ɔlɛka a. (Nolobɔvo ne 12:13) Noko Nyamenle ɛngulo kɛ menli mɔɔ sonle ye la te nganeɛ kɛ kɛ ɔde la ɛne. Ɔka kɛ: “Bɛmmasulo, ɔluakɛ me nee bɛ lua; bɛmmamaa bɛ ahonle tu, medame a mele bɛ Nyamenle a. Mebamaa bɛ anwosesebɛ, mebaboa bɛ.” (Ayezaya 41:10) Nyamenle mɔɔ yɛsulo ye la kile kɛ yɛdi ye eni na yɛanyia ɛbulɛ kpole yɛamaa ye.

• Menli bie mɔ ɛnde Nyamenle edwɛkɛ ɛhye abo: “Debie biala lɛ ye ɛlobɔ, . . . mekɛ mɔɔ bɛwo sonla, yɛɛ mekɛ mɔɔ sonla wu.” Bɛka kɛ Nyamenle ɛhyehyɛ mekɛ mɔɔ dasanli ko biala bawu la ɛdo ɛkɛ. (Nolobɔvo ne 3:1, 2) Noko, edwɛkɛ ɛhye ɛlɛkile kɛzi ngoane di ahyimango la anu na ɔkile kɛ ewule a pɛ debie biala azo a. Eza Nyamenle Edwɛkɛ ne ka kɛ yɛ kpɔkɛzilɛ kola te yɛ ngoane mekɛ zo. Kɛ neazo la, yɛkenga kɛ: “Sonla mɔɔ sulo [Gyihova] la lɛ ngoane tendenle.” (Mrɛlɛbulɛ 10:27; Edwɛndolɛ 90:10; Ayezaya 55:3) Adenle boni azo? Kɛ neazo la, ɛbulɛ mɔɔ yɛlɛ yɛmaa Nyamenle Edwɛkɛ ne la bamaa yɛahoati nyɛleɛ ɛtane biala mɔɔ le kɛ nzabolɛ nee adwɔmane ɛbɛla la.​—1 Kɔlentema 6:9, 10.

• Menli bie mɔ fa Baebolo ne anu edwɛkɛ ne kɛ mɔɔ ɔde ala la wɔ mekɛ mɔɔ ɔhanle kɛ bɛhua anwuma nee aze anwo “senle bɛzie ɛkɛ” la, na bɛse Nyamenle bazɛkye azɛlɛ ɛhye. (2 Pita 3:7) Noko Nyamenle ɛbɔ ɛwɔkɛ kɛ ɔnrɛmaa bɛnrɛzɛkye azɛlɛ ne ɛlɛ. Nyamenle a ɛwula “azɛlɛ ye adiabo ne mɔ a, amaa bɛangola ye kpusu.” (Edwɛndolɛ 104:5; Ayezaya 45:18) Ewiade ngyehyɛleɛ ɛtane ɛhye a bɛbazɛkye ye bɔkɔɔ kɛ asɛɛ bɛva senle bɛzɛkye ye a na tɛ azɛlɛ ɛhye ɔ. Saa yɛfa edwɛkɛkpɔkɛ anwuma ne zɔhane ala a, bie a ɔbahile anwomanyunlu, aleɛabo anzɛɛ ɛleka mɔɔ Nyamenle de la. Bɛnrɛzɛkye ɛhye mɔ anu biala.

Kɛ mɔɔ neazo ɛhye mɔ kile la, menli ɛnda ɛnde Baebolo ne mɔɔ bɛkenga la abo. Noko nzɔne ati a Nyamenle maa ɔba ye zɔ a? Bie mɔ baha kɛ: ‘Saa Nyamenle ze nrɛlɛbɛ na ɔze debie biala a, anrɛɛ ɔbamaa yɛ buluku mɔɔ nuhua la ɛkɛ mɔɔ awie biala bahola ade ɔ bo a. Duzu ati a yeanyɛ ye zɔ a?’ Suzu ninyɛne nsa mɔɔ ɔti ɔyɛ a yɛnde Baebolo ne abo la anwo.

1. Bɛyɛ Baebolo ne mɔɔ menli mɔɔ bɛbɛlɛ bɛ nwo aze na bɛkulo kɛ bɛsukoa la ala a te ɔ bo a. Gyisɛse zele ɔ Ze kɛ: “Egya, anwuma nee aze Awulae, meyɛ wɔ mo kɛ ninyɛne ɛhye mɔ mɔɔ wɔva wɔvea nrɛlɛbɛvolɛma nee nwomama la wɔye wɔhile  menli mɔɔ ɛnze nwolɛ bie [anzɛɛ ngakula] la.” (Luku 10:21) Bɛhɛlɛle Baebolo ne wɔ adenle mɔɔ bɛdabɛ mɔɔ bɛlɛ subane kpalɛ la ala a bade nuhua edwɛkɛ ne abo a. Menli mɔɔ memaa bɛ nwo zo​—subane mɔɔ “nrɛlɛbɛvolɛma nee nwomama” da ye ali la​—ɛnde Baebolo ne abo. Noko menli mɔɔ da ‘ngakula’ subane ali le kɛ mɛlɛbɛnwoaze na bɛkulo kɛ bɛsukoa debie la nyia Nyamenle edwɛkɛ ne mɔɔ bɛkenga la anu ndelebɛbo kpalɛ. Nea kɛzi Nyamenle ɛvi nrɛlɛbɛ nu ɛyɛ Baebolo ne a!

2. Bɛyɛ Baebolo ne bɛmaa menli mɔɔ bɛkpondɛ Nyamenle moalɛ amaa bɛade ɔ bo la. Gyisɛse hilele kɛ menli bahyia moalɛ amaa bɛade mɔɔ ɔhilehilele bɛ la abo kpalɛ. Kɛ ɔkɛyɛ na bɛ sa aha ye ɛ? Gyisɛse hilehilele nu kɛ: “Boavolɛ ne, mɔɔ le Sunsum Nwuanzanwuanza ne, mɔɔ Selɛ ne bazoa ye wɔ me duma nu la, barahilehile bɛ debie biala.” (Dwɔn 14:26) Ɔti Nyamenle fa ye sunsum nwuanzanwuanza ne​—ye gyimayɛlɛ tumi ne​—boa menli maa bɛte Baebolo ne mɔɔ bɛkenga la abo. Noko, Nyamenle ɛnva ye sunsum ne ɛmmaa menli mɔɔ bɛnva bɛ nwo bɛndo ɔ nwo zo kɛ ɔboa bɛ la, ɔti ɔmmaa bɛnde ɔ bo. Eza sunsum nwuanzanwuanza ne ka Kilisienema mɔɔ bɛbɔ mɔdenle la maa bɛboa menli mɔɔ bɛkulo kɛ bɛnyia ndelebɛbo kpole la.​—Gyima ne 8:26-35.

3. Kyesɛ ye mekɛ kpalɛ nu na menli ahola ade Baebolo nu edwɛkɛ bie mɔ abo. Kɛ neazo la, bɛzele ngapezonli Daneɛle kɛ ɔhɛlɛ edwɛkɛ mɔɔ bazi kenle bie la ɔdo ɛkɛ. Anwumabɔvolɛ bie zele ye kɛ: “Daneɛle, to buluku ne anu na sɔ ɔ nloa, yɛɛ mɔɔ wɔde la maa ɔha ɛ ti anu, kɔkpula awieleɛ mekɛ ne.” Wɔ ɛvoya dɔɔnwo anu, menli dɔɔnwo ɛgenga Daneɛle edwɛkɛ ne mɔɔ wɔ Baebolo ne anu la noko bɛande ɔ bo kpalɛ. Nɔhalɛ nu, Daneɛle bɔbɔ ande edwɛkɛ bie mɔ mɔɔ ɔhɛlɛle la abo. Ɔliele ɔdole nu kɛ: “Mendele edwɛkɛ ɛhye, na meande ɔ bo.” Awieleɛ ne, menli bade Nyamenle ngapezo edwɛkɛ ne mɔɔ Daneɛle hɛlɛle la abo, noko kyesɛ mekɛ kpalɛ ne mɔɔ Nyamenle ɛva ɛzie ɛkɛ la dwu. Anwumabɔvolɛ ne hilehilele nu kɛ: “Daneɛle, suzu ɛ nwo na bɛzɔ edwɛkɛ ne anloa, ɔnle kɛ bɛbɔ zolɛ kɔkpula awieleɛ mekɛ ne.” Nwane a bade Nyamenle edwɛkɛ ne abo a? “Na amumuyɛma ɛdeɛ, . . . bɛ biala ɛnrɛde ɔ bo. Nrɛlɛbɛvolɛma mɔɔ wɔ nu la ala a bade ɔ bo a.” (Daneɛle 12:4, 8-10) Ɔti Nyamenle ɛmmaa bɛnde Baebolo ne anu edwɛkɛ bie mɔ abo kɔkpula kɛ mekɛ kpalɛ ne kɛdwu la.

Asoo mekɛ bie ɛnee Gyihova Alasevolɛ ɛnde Baebolo ne abo ɔ? Ɛhɛe. Noko Nyamenle mekɛ ne dwule kɛ ɔmaa ninyɛne nu ala ɛkɛ la, Alasevolɛ ne mɔ hakyile bɛ ndelebɛbo ne ndɛndɛ. Bɛdie bɛdi kɛ bɛlɛsukoa Kelaese ɛzoanvolɛma ne, mɔɔ bɛbɛlɛle bɛ nwo aze bɛhakyile bɛ nzuzulɛ wɔ mekɛ biala mɔɔ Gyisɛse kɛdenrɛ bɛ la.​—Gyima ne 1:6, 7.

Kakula raalɛ ekyii bie edwɛkɛ mɔɔ bɔle ɔ ti anu ɔhanle ɔvanenle amungu nwo la bahola ayɛ edwɛkɛ ekyii bie mɔɔ yeande ɔ bo a. Noko, mɔɔ Baebolo ne kilehile la le debie mɔɔ anwo hyia maa wɔ. Baebolo nu edwɛkɛ ne anwo hyia kpalɛ, ɔti ɔbayɛ se kɛ awie biala babɔ mɔdenle kɛ ɔdua ɔ ti anwo Baebolo ɛgengalɛ zo yeade ɔ bo. Ɔti kpondɛ moalɛ amaa wɔade mɔɔ ɛlɛkenga la abo. Kpondɛ menli mɔɔ fa mɛlɛbɛnwoaze sukoa Baebolo ne, menli mɔɔ fa bɛ nwo to Nyamenle sunsum nwuanzanwuanza ne azo amaa bɛade Baebolo ne abo, menli mɔɔ bɛdie bɛdi bɔkɔɔ kɛ yɛde mekɛ mɔɔ Nyamenle kulo kɛ yɛte Baebolo ne abo yɛtɛla mekɛ biala la anu la abo zo. Mmatwehwenle ɛ bo aze kɛ ɛ nee Gyihova Alasevolɛ badendɛ anzɛɛ ɛbagenga bɛ edwɛkɛ mɔɔ bɛyɛ nwolɛ neɛnleanu kpalɛ mɔɔ wɔ jw.org/nzi wɛbsaete ne azo la. Baebolo ne bɔ ɛwɔkɛ kɛ: ‘Saa ɛsu kɛ ɛkpondɛ ndelebɛbo a, ɛbanyia Nyamenle anwo adwenlenubukelɛ.’​—Mrɛlɛbulɛ 2:3-5.