Maa Baebolo Ne Ɛhilehile Wɔ

Kɛ Ɔkɛyɛ Na Wɔabikye Nyamenle Ɛ?

Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Asoo Nyamenle tie nzɛlɛlɛ kɔsɔɔti?

Gyihova se maanle biala anu amra ɛbikye ye wɔ asɔneyɛlɛ nu. (Edwɛndolɛ 65:2) Noko tɛ nzɛlɛlɛ kɔsɔɔti a ɔtie a. Kɛ neazo la, mekɛ mɔɔ Yizilayɛma hɔle zo yɛle ɛtane la, Nyamenle andie bɛ asɔneyɛlɛ. (Ayezaya 1:15) Bieko, nrenya mɔɔ yɛ ɔ ye basabasa la asɔneyɛlɛ nwo adenle kola tua. (1 Pita 3:7) Noko akee, saa ɛtanevolɛma nu bɛ nwo a Nyamenle tie bɛ asɔneyɛlɛ.—Kenga 2 Edwɛkɛsisilɛ 33:9-13.

2. Kɛzi ɔwɔ kɛ yɛsɛlɛ ɛ?

Asɔneyɛlɛ le nwolɛ adenle kpole yɛɛ ɔle yɛ ɛzonlenlɛ ne foa, yemɔti Gyihova angomekye ɔwɔ kɛ yɛsɛlɛ ye ɛkɛ debie a. (Mateyu 4:10; 6:9) Kɛmɔ yɛnli munli la ati, ɔwɔ kɛ yɛdua Gyisɛse duma nu yɛsɛlɛ ɔluakɛ yemɔ a ɔle “adenle ne” a. (Dwɔn 14:6) Gyihova ɛmkpondɛ kɛ yɛti asɔne mɔɔ yɛhwi yɛgua yɛ ti anu anzɛɛ yɛhɛlɛ la anu, ɔkulo kɛ yɛfi yɛ ahonle nu yɛsɛlɛ.—Kenga Mateyu 6:7; Felepaema 4:6, 7.

Yɛ Bɔvolɛ ne kola tie asɔne mɔɔ yɛyɛ ye yɛ ti anu la bɔbɔ. (1 Samoɛle 1:12, 13) Ɔse yɛyɛ asɔne dahuu, wɔ alehyenlɛ ne mɔlebɛbo nee ye awieleɛ, aleɛlilɛ mekɛ, nee mekɛ mɔɔ yɛlɛyia ngyegyelɛ la.—Kenga Edwɛndolɛ 55:22; Mateyu 15:36.

3. Duzu ati a Keleseɛnema yia nu ɛ?

Ɔnla aze kɛ yɛbabikye Nyamenle ɔluakɛ yɛde menli mɔɔ ɛnlie Nyamenle nee ye azɛlɛ ye azo anzondwolɛ nwo ɛwɔkɛ ne bɛnli la avinli. (2 Temɔte 3:1, 4; 2 Pita 3:3, 13) Yemɔti, ɔwɔ kɛ yɛ nee yɛ mediema diedima yia.—Kenga Hibuluma 10:24, 25.

Saa ɛkpondɛ kɛ ɛbikye Nyamenle a, fa bɛdabɛ mɔɔ bɛkulo Nyamenle la agɔnwolɛ. Ayia mɔɔ Gyihova Alasevolɛ yɛ la maa yɛnyia anwosesebɛ yɛfi yɛ gɔnwo mɔ diedi nu.—Kenga Wulomuma 1:11, 12.

 4. Kɛ ɔkɛyɛ na wɔabikye Nyamenle ɛ?

Ɛbahola wɔabikye Gyihova ɔlua mɔɔ wɔzukoa wɔvi ye Edwɛkɛ ne anu mɔɔ ɛbadwenledwenle nwolɛ la azo. Dwenledwenle ye gyimalilɛ, ye adehilelɛ nee ye ɛwɔkɛ ne mɔ anwo. Asɔneyɛlɛ mɔɔ yɛfa yɛdwenledwenle ninyɛne nwo la maa yɛnyia anyezɔlɛ yɛmaa Nyamenle ɛlɔlɛ nee ye nrɛlɛbɛ ne.—Kenga Dwɔhyua 1:8; Edwɛndolɛ 1:1-3.

Saa ɛbahola wɔabikye Nyamenle a, ɛnee kyesɛ ɛfa ɛ nwo ɛto ɔ nwo zo na ɛnyia diedi wɔ ye nu. Noko diedi le kɛ debie mɔɔ ngoane wɔ nu mɔɔ ɔhyia aleɛ la. Ɔwɔ kɛ ɛmaa wɔ diedi ne aleɛ dahuu ɔlua mɔɔ wɔ diedi ne gyi zo mɔɔ ɛbahɔ zo wɔadwenledwenle nwo la azo.—Kenga 1 Tɛsalonaekama 5:21; Hibuluma 11:1, 6.

5. Nvasoɛ boni a wɔ Nyamenle mɔɔ ɛbabikye ye la azo a?

Gyihova dwenle bɛdabɛ mɔɔ bɛkulo ye la anwo. Ɔbɔ bɛ nwo bane wɔ debie biala mɔɔ bahola azɛkye bɛ diedi nee bɛ dahuu ngoane anyelazo ne la anwo. (Edwɛndolɛ 91:1, 2, 7-10) Ɔbɔ yɛ kɔkɔ wɔ ninyɛne mɔɔ kola fa yɛ kpɔkɛdelɛ nee anyelielɛ to esiane nu la anwo. Gyihova kilehile yɛ asetɛnla adenle kpalɛ ne.—Kenga Edwɛndolɛ 73:27, 28; Gyemise 4:4, 8.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la tile 17.