Smita, * raalɛ mɔɔ ɛnyia ɛvolɛ 35 mɔɔ wɔ Dhaka, Bangladesh la, le mɔɔ ɛnee bɛze ye kɛ ɔle sonla mɔɔ lɛ ɛlɔlɛ na ɔdwenle sonla nwo a. Ɛnee menli ze ye kɛ agyalɛ raalɛ mɔɔ bɔ mɔdenle na ɔ nye die kɛ ɔbaboa awie mɔ yeamaa bɛanwu Nyamenle anwo debie mɔɔ yezukoa la. Nea kɛzi ɔzinle ye abusua ne nee ɔ gɔnwo mɔ anwo kɛ Smita anwo dole ye arɛlevilɛ nu na ɔwule wɔ dapɛne ne anu la!

James nee ɔ ye, agyalɛma mɔɔ ɛbo ɛvolɛ 30 la, ɛnee bɛlie duma kɛ Smita la. Kenle ko bie, bɛhɔle kɛ bɛkakpɔla bɛ gɔnwo mɔ wɔ United States, Adɔleɛ Ɛnweanloa. Bɛanzia bɛamba sua nu wɔ New York bieko. Mekɛ mɔɔ bɛhɔle la, bɛyiale kale esiane na bɛwule, ɛhye manle bɛ alɔvolɛ nee bɛ gɔnwo mɔ gyimayɛvoma minlinle debie mɔɔ sonle bolɛ.

Ɔngyia kɛ ɛnea moa na wɔanwu kɛzi ɛtane nee amaneɛnwunlɛ ɛbu zo ɛnɛ la. Konle maa maanlema nee sogyama wu. Bɛdi ɛtane bɛtia menli mɔɔ ɛnze nwolɛ ɛhwee la na bɛyɛ bɛ basabasa. Esiane mɔɔ yɛ ɛzulolɛ nee anwodolɛ mɔɔ maa menli bubu la to awie biala ɔnva nwo kɛzi bɛde la. Esiane sɛkye maanlema dɔɔnwo mɔɔ ɔmkpa nu a. Adwenletane nee nzisi ɛbu zo. Bie a ɛhye bie ɛdo wɔ ɛlɛ.

Yɛbahola yɛabiza kpuyia ɛhye mɔ yɛamaa yɛafɛta kɛ:

• Kɛmɔti a esiane to kpalɛma ɛ?

• Asoo Nyamenle di ninyɛne zɛhae mɔ anwo ɛzonle ɔ?

• Asoo esiane si ala, anzɛɛ sonla a yɛ a?

• Asoo ɔbahola yeayɛ Karma, kile kɛ, mɔɔ awie yɛle ye dɛba ne la a maa ɔnwu amaneɛ ɔ?

• Saa tumivolɛ Nyamenle bie wɔ ɛkɛ a, kɛmɔti a ɔmbɔ kpalɛma anwo bane ɔnvi esiane nwo ɛ?

• Asoo ɛtane nee amaneɛnwunlɛ ɛnrɛra ɛbɛlabɔlɛ nu ɛlɛ ɔ?

Amaa yɛabua kpuyia ɛhye mɔ la, ɔwɔ kɛ yɛte kpuyia nwiɔ ɛhye mɔɔ hyia la mualɛ ne abo: Kɛmɔti a esiane si ɛ, na duzu a Nyamenle bayɛ ye wɔ nwolɛ a?