Чырыстӕттӕн дохтыртӕм цӕуӕн ис, ӕмӕ уый бӕрӕг у Йесо Чырыстийы ныхӕстӕй: «Дохтыр рынчынты хъӕуы, ӕнӕниз чи у, уыдоны нӕ, фӕлӕ» (Матфейы 9:12). Кӕд Библи медицинӕйы чиныг нӕу, уӕддӕр дзы цы уагӕвӕрдтӕ ис, уыдон стыр ӕххуыс уыдзысты, Хуыцауы зӕрдӕ рухс кӕнын кӕй фӕнды, уыдонӕн.

Ахъуыды кӕн ацы фарстатыл

 1. Цавӕр мадзалӕй мӕ дзӕбӕх кӕндзысты, уый ӕмбарын? Библи нын дзуры, цӕмӕй «алы ныхасыл дӕр» ма ӕууӕндӕм, фӕлӕ, хабар ӕцӕгдӕр куыд у, уый-иу сбӕлвырд кӕнӕм (Ӕмбисӕндтӕ 14:15).

 2. Мыййаг мӕ ӕндӕр дохтырты хъуыды дӕр нӕ хъӕудзӕн базонын? «Бирӕ уынаффӕгӕнджытӕ» дын куы уа, уӕд дын уый, чи зоны, стыр ӕххуыс фӕуа, уӕлдайдӕр та, уӕззау низӕй рынчын куы уай, уӕд (Ӕмбисӕндтӕ 15:22).

 3. Цы мадзалӕй мӕ дзӕбӕх кӕндзысты, уый, мыййаг, Библийы цы фӕдзӕхст ис, уӕхи хизут тугӕй, зӕгъгӕ, уый ныхмӕ нӕу? (Хъуыддӕгтӕ 15:20).

 4. Мыййаг, диагностикӕ кӕнӕ хос кӕныны мадзал спиритизмимӕ, ома хинтӕ-кӕлӕнтимӕ, баст нӕу? Библи уыцы хъуыддаджы ныхмӕ у (Галатӕгтӕм 5:19–21). Цӕмӕй йӕ базонай, ахӕмӕй дзы исты ис ӕви нӕ, уый тыххӕй ахъуыды кӕн ацы фарстатыл:

•   Чи дӕ дзӕбӕх кӕны, уыцы адӕймаг хинтӕ-кӕлӕнтӕ кӕны?

•   Мыййаг дӕ чи дзӕбӕх кӕны, уыцы адӕймаг афтӕ хъуыды кӕны, ӕмӕ дӕ хуыцӕутты фыдӕх баййӕфта кӕнӕ та дын чидӕр хинтӕ скодта, ӕмӕ дын хос кӕныны мадзал дӕр уымӕ гӕсгӕ равзӕрста?

•   Чи дӕ дзӕбӕх кӕндзӕн, уый, мыййаг, хос цӕттӕ кӕнгӕйӕ кӕнӕ дзӕбӕх кӕнгӕйӕ дӕсны фӕрсӕгау фӕдзуры, нывӕндтӕ фӕхӕссы йе та дӕсныфӕрсӕн дзауматӕй фӕпайда кӕны?

 5. Мыййаг, ме ’нӕниздзинадыл ӕгӕр нӕ мӕт кӕнын? Библи нын дӕтты ахӕм уынаффӕ: «Уе ’мбаргӕдзинадӕй уӕ зонӕд алчидӕр» (Филиппӕгтӕм 4:5). Ӕмбаргӕйӕ куы архайай, уӕд фылдӕр хъуыды кӕндзынӕ, ахсджиагдӕр цы у, ууыл, зӕгъӕм, Хуыцауы хъуыддӕгтыл (Филиппӕгтӕм 1:10; Матфейы 5:3).