Nantutulongan iray branch office ed Rwanda tan Zimbabwe, kaiba iray elder ed saray lokal ya kongregasyon pian naseguron nitarya so manunan pankaukolan na saray agagin naiirapan ed pinansyal lapud sayay pandemic.

Nen Abril 2, 2020, angipawit so Branch Committee na Rwanda na anunsio diad saray elder ed kongregasyon pian amtaen no siopa ray agagi ya naiirapan ed pinansyal lapud sayay pandemic tan pian natulongan ira ed praktikal ya paraan. Lapud sayan anunsio, nanggawan tampol iray elder ed interon bansa na uksoyan pian nitarya ed saray agagi iray naakan tan arum nin pankaukolan da.

Diad kapegleyan na bulan na Abril, akabuo so Rwanda branch na 31 ya Disaster Relief Committee (DRC). Akapangibunog irayan DRC na saray arina, belas, beans, asin, asukar, tan taba ed saray pamilya ya mankaukolan. Diad kaplesan, masulok ya 7,000 ya pamilya so akaawat la na saray suplay ya naakan.

Oniay imbaga nen Sister Nizeyimana Charlote tan saray taloran ananak to nen naawat da iray suplay ya naakan: “Balbaleg ya salamat ed tuloytuloy ya pangitatarya yo na espiritual tan materyal a tulong legan na sayay mair-irap ya panaon lapud coronavirus pandemic. Talagan agmi nasabaan so liket mi.”

Insalaysay na sakey a brother so eksperiensya to nen naamtaan ton sikato tan say pamilya to et makaawat na suplay ya naakan. Impaliwawa to: “Diad saman ya agew et kinmapuy si asawak ta anggapo lay naakan mi. Balet agko ilaloan, tinawagan ak na sakey ya brother ya walay naawat min suplay ya naakan parad pamilya mi. Agak makapanisia. Sanlabi ak ya nampikasi tan akisalamat ed si Jehova.”

Lapud COVID-19 pandemic, lalon inmirap so situasyon ed Zimbabwe ta dati lan kulang so naakan ed satan ya bansa.

Nambuo so Zimbabwe branch office na limaran DRC pian mangasikaso ed relief effort. Ontan met, nanggaway uksoyan so branch pian makapandonasyon iray agagi na naakan tan arum nin suplay parad saray agagin mankaukolan. Imbunog na DRC irayan inter na agagi.

Diad kaplesan, akapangibunog so DRC ed saray 7,319 ya manangipalapag na 62,669 kilo na giniling ya mais, 6,269 litro na taba, 3,337 kilo na kapenta (daing), tan 5,139 kilo na beans.

Walay sanasawa ya iyaaralan na Biblia tan regular ya mimiaral so talagan mankaukolan na naakan. Malikeliket ira tan apaseseg ira nen akaawat iray naakan manlapud samay brother ya mangiyaaral ed sikara. Antis to man, kinontak ira na pastor na datin relihyon da. Onkekerew na donasyon imay pastor ed sikara pian walay pan-grocery da nen asawa to. Lapud anengneng na sanasawan iyaaralan na Biblia so baleg a pandumaan na saray Tasi nen Jehova tan samay pastor, nandesisyon ira ya onekal la ed relihyon da.

Prueba itan ya tuloytuloy ya bebendisyonan nen Jehova so relief effort tayo, tan seseguroen ton nitarya so manunan pankaukolan na saray agagi tayo ed Rwanda tan Zimbabwe.​—Gawa 11:29.