“Manliket kayod ilalo. Mansungdo kayod kairapan. Manseet kayod pikakasi.”—Roma 12:12, Balon Mundo a Patalos.

 “Manliket kid paniilalo yo, mananos kayod saray kairapan yo, tan mampikasi kayo lawas.”—Roma 12:12, Maung a Balita.

 Diad sayan bersikulo, pinaseseg nen apostol Pablo iray Kristiano diad Roma ya gawaen so taloran paraan ya ontulong ed sikaran makapanmatoor no napapairap tan ondadalan irad mairap ya situasyon.

 “Manliket kayod ilalo.” Walay balibalin ilalo na saray Kristiano ya manbilay ya anggapoy anggaan—say arum et diad tawen balet dakel ed sikara et diad paraison dalin. (Salmo 37:29; Juan 3:16; Apocalipsis 14:1-4; 21:3, 4) Walay ilalo tayon nanengneng no panon ya ekalen na Panarian na Dios a so amin ya problema ya mamapairap ed saray totoo. (Daniel 2:44; Mateo 6:10) Anggano wala ray subok ya dadalanen na saray mandadayew ed Dios, sarag da nin siansia so magmaliw ya maliket, ta segurado ran nagawa so iilaloan da tan no mansungdo ira, napaliket day Dios.—Mateo 5:11, 12; Roma 5:3-5.

 “Mansungdo kayod kairapan.” Diad Biblia, say Griegon verb ya impatalos bilang “mansungdo” et maslak ya ontutukoy ed “pansiansia imbes ya ombatik; mantultuloy; mansiansian mapekder.” Lapud ‘agkabiangan na mundo’ b iray papatumbok nen Kristo, amta dan napairap ira kanian kaukolan day mansungdo odino mananos. (Juan 15:18-20; 2 Timoteo 3:12) No matoor ya mandayew ed Dios so sakey a Kristiano anggano wala ray aanosan ton subok, seguradon ombiskeg so pananisia to ya sikatoy bendisyonan na Dios. (Mateo 24:13) Tan lapud mabiskeg so pananisia to, sarasarag ton arapen iray subok ya walaay anos tan liket.—Colosas 1:11.

 “Manseet kayod pikakasi.” Pian makapanmatoor ed Dios iray Kristiano, kaukolan ya tuloytuloy iran manpikasi. (Lucas 11:9; 18:1) Tuloytuloy dan kerewen so panangigiya na Dios tan mantiwala ed sikato diad interon bilay da. (Colosas 4:2; 1 Tesalonica 5:17) Kombinsido ran ebatan na Dios so pikakasi da ta amta dan uunoren day ganggan to tan gagawaen day anggaay nayarian da pian napaliket da. (1 Juan 3:22; 5:14) Amta da met ya no lanang iran manpikasi ed Dios, iter tod sikara so biskeg ya kaukolan da pian makapanmatoor ira no wala ray subok ya arapen da.—Filipos 4:13.

 Sinulatan nen Pablo iray Kristianon manaayam diad Roma nen manga 56 C.E. Diad kapitulo 12 na sayan sulat to, angiter si Pablo na praktikal iran bilin no panon ya ipanengneng iray Kristianon kualidad, no panon so pantrato ed saray kaparan mandadayew ed Dios tan ed arum ya totoo, tan no panon ya napansiansiay kareenan anggano napapasegsegang. (Roma 12:9-21) Dugaruga irayan bilin ed saray Kristiano nensaman diad Roma ta asingsingger la ran onarap ed maruksan panamasegsegang.

 Kalabas na pigaran taon, nen 64 C.E., walay agawan baleg ya pool diad syudad na Roma. Dakel so mangibabaga ya si Emperador Nero so dapat ya natetel ed saman ya pool. Unong ed si Tacitus, sakey ya Romanon historian, pian naprotektaan nen Nero so sarili to, tinetel to ray Kristiano ed saman ya agawa. Mapatpatnag ya atan so rason no akin ya grabe so panamasegsegang tan panamairap ya naeksperiensya na saray Kristiano. Lapud inunor da may bilin nen Pablo no panon ya sungdoan so panamasegsegang, akatulong itan ed sikara pian makapanmatoor tan walaan ira na dignidad ya arapen iray mair-irap ya situasyon. (1 Tesalonica 5:15; 1 Pedro 3:9) Balibalin aligen na saray mandadayew ed Dios natan so alimbawa da.

 Bantayan iyan antikey a video pian naaruman ni antam ed libro na Roma.