Say tepet ya walad tagey et sarag to met ya ibagan, Akin et wadia tayo? odino Kasin walay rason no akin ya manbibilay ak? Ipapanengneng na Biblia ya say rason no akin ya manbibilay tayo et pian makapikaaro ed Dios. Isipen pa irayan importantin katuaan ya walad Biblia.

•   Say Dios so nanggawa ed sikatayo. Ibabaga na Biblia: “[Say Dios] so nanggawad sikatayo, tan kayarian to tayo.”​—Salmo 100:3; Apocalipsis 4:11.

•   Walay rason na Dios no akin ya ginawa to so amin a bengatla, kaiba itayo.​—Isaias 45:18.

•   Ginawa itayo na Dios ya walay “espiritual a pankaukolan” tayo, kanian labay tayon naamtaan so rason no akin ya manbibilay tayo. (Mateo 5:3) Labay na Dios ya naamtaan tayo itan.​—Salmo 145:16.

•   No mikaaro tayo ed Dios, napenek so espiritual ya pankaukolan tayo. Anggano iisipen na arum ya imposiblin makapikaaro so too ed Dios, oniay ibabaga na Biblia ya sarag tayon gawaen: “Onapit kayo ed Dios, tan sikatoy onapit ed sikayo.”​—Santiago 4:8; 2:23.

•   Pian makapikaaro tayod Dios, dapat say paraan na panagbilay tayo et aliwan kontra ed samay labay to parad sikatayo. Nabasa itan ed Biblia diad Eclesiastes 12:13: “Takotan moy Dios, tan unor mo ray ganggan to, ta atan ya mismo so rason no akin ya ginawa to tayo.”​—Good News Translation.

•   Onsabi panaon, naeksperiensya tayo la imay klase na bilay ya talagan labay na Dios parad sikatayo nensaman ni. Nagawa itan no ekalen to lay kairapan tan ikdan to na bilay ya anggapoy anggaan iray kakaaro to, saramay mandadayew ed sikato.​—Salmo 37:10, 11.