Awalaan Ak na Ilalo Nen Kakkaukolan Ko
Alikas kon akasubsob ak lad danum. Sinalik ya iyimwas so ulok balet agko naigalaw so tenger ko. Ataktakot ak, sinalik so ondiking balet agko met naigalaw iray limak tan salik. Akainum ak lay danum. Diad saman ya agew nen 1991, anguma-uman so bilay ko.
INYANAK ak ed syudad na Szerencs tan binmaleg ak ed Tiszaladány, diad Hungary. Nen Hunyo 1991, linma kami ray kakaarok ed agmi kabisadon parte na Tisza River. Abalang ko, aralem so danum kanian nan-dive ak. Alingolingo ak! Aputer so taloran pukel ed tenger ko tan naapektoan so spinal cord ko. Maong labat ta anengneng na kaarok ya agak la onggagalaw kanian kalkalna to ak ya insakbit.
Amtak iray nagagawa, tan alikas kon walay problema. Walay tinmawag na tulong tan sinmabi helikopter pian ibatik ak ed ospital. Insan da ak inoperaan ed spinal cord. Kayari to, inyalis da ak ed syudad na Budapest pian manpaabig. Taloy bulan ya akarukol ak labat. Naigalaw ko met so ulok, balet agko naigalaw so manlapud takeb ko anggad salik. Biente años ko ni labat ed saman, balet kaukolan ko lay ondepende ed arum. Maer-ermen ak tan labay ko lay ompatey.
Nen onsempet ak lad abung, imbangat iray ateng ko no panon ak ya asikasoen. Balet ta nakekesawan tan naiirapan ira. Kayari manga sakey taon et a-depress ak. Kanian inyakar da ak ed doktor parad saray nade-depress, ya akatulong pian manguman so pakanengneng kod situasyon ko.
Diad saman et itetepet kod sarilik: Wala kasi gagala na bilay? Akin et agawad siak ya? Inanap koy ebat ed saray magasin tan libro. Binasak met so Biblia, balet agko natalosan kanian intundak la. Akitongtong ak ni ingen ed sakey ya pari, balet agak kontentod saray imbaga to.
Insan nen 1994, walay duaran Tasi nen Jehova ya binmisitad tatay ko, tan imbaga tod sikaran katongtongen da ak. Dinmengel ak legan dan ipapaliwawa ya gawaen na Dios ya paraiso so dalin tan ekalen toy sakit tan paniirap. Balibali ibabaga ra pero singa imposible. Balet, inawat ko nin siansia so duaran libro ya uusaren ed panaral na Biblia. Kayarik ya binasa, inyopresi na saray Tasi ya iyaralan da ak na Biblia, tan pinmayag ak. Imbaga ra met ya mas marakep no manpikasi ak.
Apaneknekan ko ya talagan inaro ak na Dios
Diad panaaral mi, naebatan iray tepet ko diad mismon Biblia. Apaneknekan ko ya talagan inaro ak na Dios. Insan nen Setyembre 13, 1997, kayari duay taon ya impanaral koy Biblia, abautismoan ak ed abung mi diad sakey a bathtub. Sakey iman ed saray sankaliketan ya agew ed bilay ko.
Nen 2007, nanayam ak lad sakey ya abung parad saray disabled diad Budapest. Lapud satan et mas dakel lay pankanawnawak ya ibagad arum iray makapaliket ya nanaaralan ko. No balibali panaon, makakapaway ak pian mitongtong ed totoo, maong labat ta walay automatic ya wheelchair ya ida-drive ko panamegley na ulok.
Walay pamilya diad kongregasyon mi ya angiter ed siak na pinansyal a tulong kanian akasaliw ak na laptop computer ya kokontrolen ko diad pangigalaw koy ulok. Kanian makakapitongtong ak ed totoo diad Internet tan makakapansulat ak ed saramay agnasasabian na saray membro ed kongregasyon ko no manpupulong ira. Lapud sayan paraan na itutulong kod arum, baleg so inyaligwas na pitotongtong kod totoo tan akatulong met pian nalingwanan ko ray problemak.
Itotongtong koy mensahe na Biblia diad Internet diad tulong na gadyet ya kokontrolen ko diad pangigalaw koy ulok
Makakaatendi ak met ed saray Kristianon pantitipon. No onsasabi ak ed Kingdom Hall, aalsaen ak ed wheelchair na saray kaagian ko pasegep ed panaaralan mi. Legan na aral, no panagkomento la, itagey na kaabay ko so lima to no mankomento ak. Insan to bembenan so Bibliak o say publikasyon ya aaralen mi legan kon mankokomento.
Naynay ya walay ansakit ko tan kaukolan koy arum ed amin lawarin gawaen ko. Kanian no maminsan et maermen ak nin siansia. Balet napapabiskeg ak ta kaarok so Dios a Jehova, tan amtak ya dedengelen to ak no ibabagak so amin ya naliliknak ed sikato. Napapabiskeg ak met na inagew-agew ya pambabasak na Biblia tan na saray agagik ed espiritual. Say aro, suporta, tan pangipipikasi rad siak et ontutulong pian mansiansia ak ya positibo tan maliket.
Pinabiskeg ak nen Jehova no kapigan kakkaukolan ko. Inikdan to ak met na ilalo ya onabig diad balon mundo. Kanian, tatalaranan koy panaon ya sarag ko lay ‘onakar tan onlukso tan idaydayew so Dios’ lapud agaylan panangaro tan kaabigan to.
