On, wala ray mauges ya anghel. Iner so nanlapuan da? Tandaan ya ginawa na Dios iray anghel ya walaan na abilidad ya mandesisyon parad sarili da. Kayarin ginawa na Dios so unonan laki tan bii​—si Adan tan Eva—​walay anghel ya aliway impangusar tod satan ya abilidad to tan inggapo toy rebelyon diad dalin. Akombinse toy Adan tan Eva ya manrebelde ed Dios. (Genesis 3:1-7; Apocalipsis 12:9) Ag-ibabaga na Biblia no antoy ngaran na saman ya anghel odino antoy rangko tod tawen antis ya nanrebelde. Pero kayari ton nanrebelde, dugarugay impanawag na Biblia ed sikato ya Satanas, ya mankabaliksay “Sumusumpa,” tan Diablo ya mankabaliksay “Managpauges.”​—Mateo 4:8-11.

Makapaermen ta aliwan satan labat so agawan impanrebelde ed Dios. Diad panaon nen Noe, wala ray anghel ya “tinaynan da so manepeg ya ayaman da” ed tawen bilang kabiangan na pamilyay Dios. Linma ra diad dalin tan pinagmaliw day sarili da ya too pian makagawa ray mauges tan imoral. Kontra itan ed gagala na Dios parad sikara.—Judas 6; Genesis 6:1-4; 1 Pedro 3:19, 20.

Antoy agawa ed saraman ya mauges ya anghel? Nen dinelap na Dios so interon dalin pian deralen iray mauges, pinmawil ed tawen iraman ya mauges ya anghel bilang espiritu. Balet agla inyabuloy na Dios ya ompawil irad “orihinal a pasen da.” Imbes, imbasileng to rad “makapal [ya espiritual] a kabilungetan,” a say tawag et Tartaro. (Judas 6; 2 Pedro 2:4) Unor-unor irayan demonyo ed si Satanas a Diablo, “say manuley na saray demonyo,” ya “mankunkunwarin sakey ya anghel na liwawa.”​—Mateo 12:24; 2 Corinto 11:14.

Ibabangat na Biblia ya say Mesianikon Panarian na Dios, ya gobierno ed tawen, et niletneg nen 1914. * Kayari na satan, pinalayas ed tawen si Satanas tan saray demonyo to tan imbasileng irad dalin. Say graben kaugsan tan imoralidad natan et ebidensya ya talagan mamapasya iran impluensyaan so totoo.​—Apocalipsis 12:9-12.

Balet say iloloor na kaugsan tan imoralidad et prueba met ya asingger lan napatunda so mauges tan makapataktakot ya uley na saray demonyo. Magano lan patundaen na Dios so impluensya na sarayan mauges ya espiritu. Kayari na 1,000 taon ya panuley na Panarian na Dios, saraman ya mauges ya espiritu et naabuloyan a magano ya suboken iray totoo. Insan la ra sigpot ya naderal.—Mateo 25:41; Apocalipsis 20:1-3, 7-10.