Saray arum ya Levita et agmanlilingkor bilang saserdote, balet inikdan iray kimey ya mipara ed saray pulis. Say komander da et say kapitan na templo. Deniskribe na Judion writer ya si Philo no anto ray gagawaen da: “Arum ed sarayan [Levita] et akapuesto ed saray puerta diad saray lolooban, saray arum et walad [templo] diad arap na santuaryo pian agmakaloob ditan iray magulon totoo, anggan saramay agda met gagagalaen so onloob. Saray arum et mansusublayan ya manronda, walay parad agew tan parad labi.”

Sarayan pulis et nayarin iganggan na saray membro na Sanhedrin. Sikara labat so inabuloyan na gobierno na Roma ya manbemben na armas.

Imbaga na iskolar ya si Joachim Jeremias ya nen inaresto na saray pulis si Jesus, tinepetan ira nen Jesus no akin ya agda inaresto nen manbabangat ed templo. Agto iman itepet no saramay angaresto ed sikato et aliwan pulis ed templo. (Mat. 26:55) Panisiaan met nen Joachim ya saramay akaunan imbaki ya mangaresto ed si Jesus et pulis met ed templo. (Juan 7:32, 45, 46) Saray pulis tan say kapitan da so imbaki met ya mangawit ed saray disipulo nen Jesus diad Sanhedrin, tan posible ya sikara so angigayugoy ed si apostol Pablo pian ipaway ed templo.​—Gawa 4:1-3; 5:17-27; 21:27-30.