Tepetepet Manlapud Saray Managbasa

Diad 2 Corinto 6:14, siopa so tutukoyen nen Pablo sanen inusar to so terminon “saray agmananisia”?

Oniay nabasa tayo ed 2 Corinto 6:14: “Agkayo miulop ed pako a duma na saray agmananisia.” No imanoen tayo so konteksto, mabitar a tutukoyen nen Pablo iray indibidual ya aliwan kabiangan na Kristianon kongregasyon. Sayan pakatalos et susuportaan na arum a bersikulo na Biblia a si Pablo so angusar ed terminon “agmananisia” odino “saray agmananisia.”

Alimbawa, pirmin binaat nen Pablo iray Kristiano lapud pangisesegep day demanda ed korte “dia ed arap na saray agmanisia.” (1 Corinto 6:6) Dia et saray agmananisia so manseserbi bilang ukom diad korte na Corinto. Diad komaduan sulat to, inkuan nen Pablo a si Satanas so ‘amulag ed kaisipan na saray agmananisia.’ ‘Asakbongan’ so mata na saratan ya agmananisia manlapud maong a balita. Sarayan agmananisia so ag-interesadon manlingkor ed si Jehova, lapud oniay impaliwawa nen Pablo ed akadkauna: “Kapiganman ya ipawil na too ed Katawan, say sakbong naekal.”​—2 Corinto 3:16; 4:4.

Saray arum ya agmananisia so nalalanor ed kaugsan odino idolatriya. (2 Corinto 6:15, 16) Balet, aliwan amin et onsusumpa ed saray lingkor nen Jehova. Walaray mangipapatnag na interes diad katuaan. Dakel so walaan na Kristianon kaasawaan tan maliket a mansiansia ed sikara. (1 Corinto 7:12-14; 10:27; 14:22-25; 1 Pedro 3:1, 2) Balet, unong ya asalambit ed tagey, si Pablo so mabetbet ya angiyaplika ed terminon “agmananisia” ed saray indibidual ya agkabiangan na Kristianon kongregasyon, a tugyopen na saray “mananisia ed Katawan.”​—Gawa 2:41; 5:14; 8:12, 13.

Say prinsipyon naromog diad 2 Corinto 6:14 so makanan giya parad saray Kristiano ed amin a kipapasen na bilay tan mabetbet ya aaonen bilang makabat a simbawa parad saray Kristianon manaanap na kapareha. (Mateo 19:4-6) Makabat so sakey a dedikado tan bautismadon Kristiano ya agmanaanap na kapareha diad limog na saramay agmananisia, lapud saray prinsipyo, kalat, tan sisiaen na saray agmananisia so duman tuloy ed saramay tuan Kristiano.

Balet, panon iramay indibidual a manaaral na Biblia tan mililimog ed Kristianon kongregasyon? Saramay agbautismadon manangipalapag? Kasin nibilang ira ya agmananisia? Andi. Saray indibidual a mangaawat ed katuaan na maong a balita tan tuloytuloy ya onaaligwas anggad bautismo so agnepeg a tawagen ya agmananisia. (Roma 10:10; 2 Corinto 4:13) Sakbay ya abautismoan si Cornelio, sikatoy atawag a “masimpit tan maitatakot ed Dios.”​—Gawa 10:2.

Sirin, kasin makabat parad sakey a dedikadon Kristiano a miinaroan tan miasawa ed sakey a naabobonan lan agbautismadon manangipalapag, lapud diad estrikton panangibaga et ag-onaplika ed satan a kipapasen so simbawa nen Pablo a nikurit diad 2 Corinto 6:14? Andi, aliwa itan a makabat. Akin? Lapu ed direktan simbawa ya inter nen Pablo ed saray abalon Kristiano. Oniay insulat nen Pablo: “Sikato so bulos a miasawa ed labay to; dia ed linawa na Katawan lambengat.” (1 Corinto 7:39) Mitunosan ed satan a simbawa, papasesegen iray dedikadon Kristiano a mananap na kapareha diad limog lambengat na saramay wala ‘ed Katawan.’

Anto so kabaliksan na balikas a wala ‘ed Katawan’ tan say misiglaotan a balikas a wala “ed Kristo”? Si Pablo so analambit ed saray indibidual wala a “ed Kristo” odino wala ‘ed Katawan’ diad Roma 16:8-10 tan Colosas 4:7. No basaen yo iratan a bersikulo, naimano yo a sikara so “kakimeyan,” “asali (odino naabobonan),”  ‘inad-aron agagi,’ ‘matoor a ministros,’ tan ‘kaiban managlingkor.’

Kapigan magmaliw a “managlingkor ed Katawan” so sakey ya indibidual? Nagawa itan sano mabulos ton gagawaen iray kaukolan a gawaen na managlingkor tan iburi toy inkasikato. Oniay impaliwawa nen Jesus: “No say siopaman a too et labay toy ontumbok ed siak benegan toy dili ya inkasikato, et alaen toy krus to, tan tumboken to ak.” (Mateo 16:24) Sano idedika la na sakey a too so inkasikato ed Dios, gapoan to lan tumboken si Kristo tan sigpot lan manpasakop ed linawa na Dios. Kayari na satan, italaga toy inkasikato parad bautismo tan magmaliw lan ordinadon ministro a walaan na naabobonan a talindeg ed imaton nen Jehova a Dios. * Kanian say kabaliksan, sirin, na ‘miasawa dia ed linawa na Katawan’ et piasawa ed sakey a pinaneknekan to lay inkasikato a peteg a mananisia, sakey a dedikadon “aripen na Dios tan Katawan a Jesu-Kristo.”​—Santiago 1:1.

Say sakey a toon papaiyaralan na Biblia ed saray Tasi nen Jehova tan manggagawa na maabig ya iyaaligwas ed espiritual so nakomendaan. Balet, agto ni indedika so inkasikato ed si Jehova tan agto ni intalaga so bilay to diad panaglingkor tan panagsakripisyo. Sikato so peles nin manggagawa na nakaukolan iran pananguman. Kaukolan ton sumpalen iray baleg a pananguman a nalalanor ed pagmaliw a dedikado tan bautismadon Kristiano sakbay ton nonoten so sananey nin baleg a pananguman ed bilay, a singa say pangasawa.

Kasin manepeg parad sakey a Kristiano so piinaroan ed sakey ya ompatnag a maabig so iyaaligwas to ed panagaral na Biblia​—a nayarin say getma to et alagaren labat so pakabautismoan to insan la mikasal ed sikato? Andi. Nawetwet la ingen iray motibo na iyaaralan na Biblia no amta ton agmikasal ed sikato so sakey a dedikadon Kristiano no sikatoy agni abautismoan.

Kaslakan et antiktikey labat a panaon so pagmamaliw na indibidual bilang agbautismadon manangipalapag, anggad sikato so onaligwas insan manpabautismo. Kanian makatunongan so simbawan asalambit ed tagey a miasawa labat unong ed Katawan. Balet, panon to no say sakey et wala la’d suston edad a mangasawa odino miasawa, pinabaleg ed Kristianon pamilya, pigay taon lan aktibo diad kongregasyon, tan manlilingkor la bilang agbautismadon manangipalapag? Bueno, anto so mamupuger ed sikato ya idedika so bilay to ed si Jehova? Akin a sikatoy manpapaleen? Kasin walaray panduaruwaan to? Anggaman sikatoy aliwan agmananisia, agnibaga a sikatoy wala ‘ed Katawan.’

Say simbawa nen Pablo nipaakar ed panangasawa so parad pankaabigan tayo. (Isaias 48:17) Sano say mankasal et pareho iran dedikado ed si Jehova, say determinasyon tan pilalek dan dua ed panangasawa so walaan na malet tan maespiritual a pundasyon. Walaan ira na pareho iran estandarte tan pareho iran kalat. Saya so baleg a makatulong ed maliket a panamaley. Niarum ni, diad ‘piasawa dia ed linawa na Katawan,’ nipatnag na sakey so katooran to ed si Jehova, tan mangitonton itan ed magnayon iran bendisyon, lapud “matoor ka, [Jehova] ed saray matoor ed sika.”​—Salmo 18:25, Maung a Balita.

[Paimano ed leksab]

[Litrato ed pahina 31]

“Matoor ka, [Jehova] ed saray matoor ed sika”