Maapresyan Mangawat​—Mabulos a Mangiter

SAY maaron mangatatawen ya Ama tayon si Jehova et interesado ed balang sakey ed sikatayo. Ipapaseguroy Salita na Dios ya iyaansakit toy amin a lingkor to. (1 Ped. 5:7) Say sakey a paraan ya ipapatnag iya nen Jehova et diad pangiiter toy tulong ed nanduruman paraan pian makapanlingkor itayon matoor. (Isa. 48:17) Lautla no makakasagmak tayoy ambelat a problema, labay nen Jehova a makapinabang tayo ed saray itatarya ton tulong. Mabitabitar iya ed samay Mosaikon Ganggan.

Diad satan a Ganggan, walay tulong a maaron inyuksoy nen Jehova parad saray “duruka,” a singa saray ulila, balo, tan sankaili. (Lev. 19:9, 10; Deu. 14:29) Amta ton arum ed saray lingkor to et nayarin mankaukolan na tulong ed saray kapananisiaan da. (Sant. 1:27) Kanian, agkomon ombabaing iray lingkor to a mangawat na tulong ed saramay tinenyeg nen Jehova ya ontulong. Anggaman ontan, no mangawat itayoy tulong, nepeg a dugay awawey tayo.

Balet, ipapabitar na Salitay Dios a wala met so pankanawnawa na saray totoo na Dios a mangiter. Nonoten pa imay salaysay nipaakar ed “dukan balo” a naobserbaan nen Jesus diad templo ed Jerusalem. (Luc. 21:1-4) Maseguron sikatoy agunggonaan ed saramay probisyon nen Jehova parad saray balo, unong a nidatak ed Ganggan. Balet sayan balon bii, anggaman mairap-bilay et anodnonotan aliwan lapud impangawat to, noagta lapud impangiter to. Say inkamaiter to et maseguron angitarok ed sikato na liket lapud singa inkuan la nen Jesus, “lalo a mapalar so mangiter nen say mangawat.” (Gawa 20:35) No ontan sirin, panon tayon niyugali so ‘pangiter’ pian magmaliw tayon maliket?​—Luc. 6:38.

‘Anto Kasi Ibales Ko ed si Jehova?’

Intepet na salmista: “Anto kasi manepeg ya ibales ko ed Jehova a nipaakar ed amin na saray panamainawa to ed siak?” (Sal. 116:12) Antora kasi naawat ton tulong? Sikatoy pinabiskeg nen Jehova sanen ‘nagogonigon tan maneermen.’ Ontan met, ‘inliktar nen Jehova so kamarerwa to ed ipapatey.’ Natan et labay toy ‘makabales’ ed si Jehova anggan panon. Anto kasi nayarin gawaen na salmista? Inkuan to: “Sumpalen ko so malet a sipasipan ko ed Jehova.” (Sal. 116:3, 4, 8, 10-14) Ginawa ton determinasyon a sumpalen ya amin iray sipan tan obligasyon to ed si Jehova.

Nagawaan mo met itan. Panon? Diad lawas pambilay unong ed saray ganggan tan prinsipyo na Dios. Kanian, seguroen mo a mansiansian sankaimportantian ed bilay mo so panagdayew ed si Jehova tan paigiya ka ed espiritu na Dios ed amin a gagawaen mo. (Ecl. 12:13; Gal. 5:16-18) Siempre, agmon talaga nabayaran so ami-amin a ginawa nen Jehova parad sika. Ingen, ‘napapaliket moy puso nen Jehova’ no nanenengneng ton sigpot-pusom ya iiter so inkasika ed serbisyo. (Uli. 27:11) Baleg a pribilehyo a napaliket si Jehova ed onian paraan!

 Mibiang ed Panamabiskeg ed Kongregasyon

Maseguron onabobon ka a sikan mismo et agunggonaan ed Kristianon kongregasyon ed dakel a paraan. Panamegley na kongregasyon, itatarya nen Jehova so daakan ya espiritual a tagano. Tan naamtaan moy katuaan ya angibulos ed sika manlapud saray lingon doktrina tan espiritual a kabilungetan. (Juan 8:32) Diad saray aral, asemblea, tan kombension ya inyuksoy na “matoor tan makabat ya aripen,” agamoran moy pikakabat a mangitonton ed sika diad bilay ya andi-anggaan ed paraiso, ya anggapo lay ot-ot tan irap. (Mat. 24:45-47) Diad tua, agtayo anggan nabilang iray agunggona tayo tan saray nagunggona tayo ni manlapud kongregasyon. Pian makabales tayo met, anto kasi niiter tayo ed kongregasyon?

Oniay insulat nen apostol Pablo: “Mauk-uksoy ya amin iray kabiangay laman, tan say interon laman et impanpepeketan na saray langolangoan. No balang kabiangay laman et mankikimey unong ed kanepegan ton gawaen, ombaleg tan ombiskeg so interon laman diad panamegley na aro.” (Efe. 4:15, 16, Maung a Balita) Anggaman manunan onaplika iyan teksto ed saray alanaan a Kristiano bilang grupo, onaaplika met so prinsipyo na satan ed amin a Kristiano natan. On, balang membro na kongregasyon et makatulong ed ibiskeg tan ibulaslas na kongregasyon. Panon?

Nagawaan tayo iya no lawas tayon panggunaetan a pasesegen tan pabiskegen so arum diad panaglingkor da. (Roma 14:19) Makatulong tayo met ed ‘ibaleg na laman’ no ipatnag tayo so bungay espiritu na Dios diad pidedeneng ed saray agagi. (Gal. 5:22, 23) Ontan met, mananap tayoy paraan pian ‘makapanggawa na maabig ed amin, nagkalalo la ed saray kapananisiaan.’ (Gal. 6:10; Heb. 13:16) Amin a membroy kongregasyon, bii man o laki, ugaw man o matatken et makapibiang ed ‘ibaleg na laman ed aro.’

Kaaruman ni, nausar tayo iray abilidad, biskeg, tan kaykayarian tayo diad pibiang ed manangisalbay-bilay a kimey na kongregasyon. “Andi bayar ya inawat yo,” so inkuan nen Jesus. Antoy nepeg ya ikiwas tayo ey? “Andi bayar met ya iter yo,” so kuan to. (Mat. 10:8) Sirin, sigpot a mibiang ed importantin kimey a panangipulong na Panarian tan panaggaway babangatan. (Mat. 24:14; 28:19, 20) Limitado kasi pakasarag mon manggawa’d saya? Nonoten pa imay dukan balo a tinukoy nen Jesus. Melmelag so balor na inter to. Balet inkuan nen Jesus a mas dakel ni niiter to nen saramay arum. Inter ton amin so unong ed nasarag ton iter.​—2 Cor. 8:1-5, 12.

Mangawat Tekep na Dugan Awawey

Anggaman ontan, walaray pankanawnawa a nayarin nakaukolan moy tulong na kongregasyon. Agka nababaingan a mangawat na tulong a nayarin niiter na kongregasyon sano nabebelatan ka la ed saray probleman itatarok na sayan sistema. Wadtan iray inter nen Jehova a kualipikado tan mangiyaansakit a “managpastol ed kongregasyon” pian ontulong ed sika sano makakasagmak kay subsubok tan kairapan. (Gawa 20:28) Akaparaan iray elder tan arum nira ed kongregasyon a manligliwa, manuporta, tan manalimbeng ed sika diad mairap iran panaon.​—Gal. 6:2; 1 Tes. 5:14.

Anggaman ontan, sano mangawat kay tulong a nakaukolan mo, gawam itan ed dugan awawey. Apresyam lawas so naaawat mon tulong. Ipasen mon saray tulong na kapananisiaan et panangipatnag na Dios ed agnaparaan a kaabigan to. (1 Ped. 4:10) Akin et importante itan? Lapud agtayo labay ya aligen so kagagawa na maslak a taga mundo, ya andiay apresasyon ed saray naaawat da.

Magmaliw a Balanse tan Makatunongan

Diad samay sulat nen Pablo ed kongregasyon diad Filipos, oniay insulat to nipaakar ed si Timoteo: “Anggapo so took a kaparay kalakal  ko, a mangisakit a peteg ed kipapasen yo.” Balet oniay inyarum to: “[Saramay arum] anapen da so kayarian dan dili, ya aliwan saray bengatlan kayarian nen Jesu-Kristo.” (Fil. 2:20, 21) Lapud sayan mapuersan balikas nen Pablo, panon tayon napaliisan so awawey a say pinonot et say ‘kayarian a dili’ labat?

No kekerewen tayo’d saray kakongregasyon ya ikdan da tayoy panaon tan atension pian nasolbar iray problema tayo, agtayon balot ipapaliknan obligado iran gawaen itan. Akin? Nonoten pa iya: Siempre, talagan misalsalamat tayo no walay agin angiter na materyal a tulong pian nilabas tayoy biglaan a pankaukolan. Balet kasin inobliga tayo imay agi pian ontulong? Siempre andi. Mipadpara, anggaman lawas maliket ya ontulong iray maaron agagi, nepeg a magmaliw tayon balanse tan makatunongan ed iilaloan tayon panaon a niiter da. Tutal, antokamay gawaen na saray agagi pian natulongan itayon makatalona ed saray problema, labay tayon gawaen da itan a mabulbulos.

Makaseguro kan lawas ya akaparaan tan mabulos ya ontulong iray agagi ed sika. Balet, walaray panaon a talagan agda met sarag ya iter so nakaukolan mon tulong. No nagawa man itan, tandaan ya agka paulyan nen Jehova diad antokaman a subok a nadalan mo, a singa ginawa to ed salmista.​—Sal. 116:1, 2; Fil. 4:10-13.

Kanian, apresyam so antokaman a probisyon nen Jehova parad sika tan agka ombabaing a mangawat ed satan, lalo la ed panaoy irap tan problema. (Sal. 55:22) Labay ton ontan so gawaen mo. Anggaman ontan, labay ton magmaliw ka met a “sililiket a mangiter.” Sirin, ‘igetmam ed pusom’ a mangiter parad tuan panagdayew unong ed amin ya iyabuloy na sirkumstansyam. (2 Cor. 9:6, 7) Diad ontan et parehom a nagawaan so maapresyan pangawat tan mabulos a pangiter.

[Kahon/Saray litrato ed pahina 31]

“Anto kasi manepeg ya ibales ko ed Jehova a nipaakar ed amin na saray panamainawa to ed siak?”​—Sal. 116:12

▪ Mananap na paraan pian ‘makapanggawa na maabig ed amin’

▪ Pasesegen tan pabiskegen ed espiritual iray agagi

▪ Sigpot a mibiang ed panaggaway babangatan unong ed iyabuloy na sirkumstansyam