1, 2. Antoy pantongtongan tayo nipaakar ed saray kombension ed sayan artikulo?

DIAD loob na dakel ya taon, mantitipon iray Tasi nen Jehova diad saray internasyonal tan distriton kombension. Dakel ed sikatayo et akaatendi lad onia ran kombension, nayarin aminpigapiga la diad loob na pigaran dekada.

² Nilibon taon lay apalabas, awalaan met iray totoo na Dios na onia ran kombension. Pantongtongan tayo natan so impantitipon na saray totoo na Dios nensaman ya akarekord ed Biblia tan no antoy piparaan na saratan ed saray kombension tayo natan. Aralen tayo met no akin ya kaukolan tayoy onatendi ed saratan.​—Sal. 44:1; Roma 15:4.

3. (a) Antoy agnalinglingwanan ya agawa ed unonan baleg a pantitipon na totoo nen Jehova ya abitlad Biblia? (b) Panon ya naamtaan na saray Israelita a walay pantitipon?

³ Say unonan baleg a pantitipon ya abitlad Biblia et sanen nantitipon iray Israelita diad leksab na Palandey Sinai pian mangawat na saray instruksion nen Jehova. Talagan importante itan ya ebento ed awaran na dugan panagdayew. Diad satan a makapaliket ya okasyon ya agnalingwanan na saray Israelita, impanengneng nen Jehova ed sikara so pakayari to sanen inter toy Ganggan to. (Exo. 19:2-9, 16-19; basaen so Exodo 20:18; Deuteronomio 4:9, 10.) Gapoan itan na nantutumbokan ya impideneng na Dios ed Israel. Ag-abayag, angiletneg si Jehova na paraan pian pantitiponen iray totoo to. Ingganggan toy Moises a manggawa na duaran trumpetan gawad pilak ya usaren pian tawagen so “amin a duypo” pian mantitipon irad “pinto na  abung-abung na duypo.” (Num. 10:1-4) Nonot yo pa labat so liket ed saratan a pantitipon!

4, 5. Akin ya importante iray pantitipon ya indaulo di Moises tan Josue?

⁴ Sanen manga 40 taon la na saray Israelita ed kalawakan, angorganisa si Moises na kombension parad interon nasyon. Importantin panaon iya ed awaran na balon nasyon na Israel. Akaparaan la ran onloob ed Insipan a Dalin, kanian saya so dugan panaon pian ipanonot nen Moises ed saray agagi to so amin a ginawa tan gawaen ni nen Jehova parad sikara.​—Deu. 29:1-15; 30:15-20; 31:30.

⁵ Diad satan met a pantitipon, imbaga nen Moises ya nawalaan la ray regular a pantitipon tan panagbangat ed totoo na Dios. Kada taon na Sabaton, legan na Piesta na Kobongkobong, saray lalaki, bibii, ugugaw, tan sangkaili na saray Israelita so mantitipon ed lugar a pinili nen Jehova ‘pian narengel, natumbok, tan ontakot ira ed Jehova a Dios, tan sumpalen da a gawaen so amin a salita na kaptekan.’ (Basaen so Deuteronomio 31:1, 10-12.) Kanian labay nen Jehova ya mantitipon iray totoo to pian aralen so ganggan tan linawa to. Sanen asakop la na saray Israelita so Insipan a Dalin, siansia nin apaliberan ira na saray paganon nasyon, kanian tinipon ira nen Josue pian pabiskegen so determinasyon dan mansiansian matoor ed si Jehova. Diad satan a mismon pantitipon, insamba na saray Israelita a manlingkor irad Dios.​—Jos. 23:1, 2; 24:1, 15, 21-24.

6, 7. Akin a makatantanda iray modernon panaon a kombension na saray totoo nen Jehova?

⁶ Diad modernon panaon tayo, saray totoo nen Jehova et walaan met na saray makatantandan kombension. Diad sarayan kombension, iyaanunsio iray pananguman a gagawaen na organisasyon ontan met ed onliliwawan pakatalos ed Kasulatan. (Uli. 4:18) Agawa so sankaunaan a baleg a kombension na Saray Estudyante na Biblia kayari Sankamundoan a Guerra I nen 1919 diad Cedar Point, Ohio, U.S.A. Satan a kombension ya inatendian na manga 7,000 et makatantanda lapud niyanunsio ditan ya kaukolan so pampulong diad interon mundo. Nen 1922, diad satan met lanlamang a lugar, legan na siameran agew a kombension, angiter na mapuersan paliwawa si Joseph F. Rutherford tan pinaseseg to ray inmatendi ya mantultuloy a manpulong anggad naderal so Makapanyarin Babilonia. Oniay inkuan to: “Manmatoor kayo tan magmaliw a tuan tasi parad Katawan. Onlan milaban anggad naderal so amin a kabiangan na Babilonia. Ipulong so mensahe ed inerman a pasen. Kaukolan a naamtaan na mundo a si Jehova et Dios tan si Jesu-Kristo et Ari na saray arari tan Katawan na saray kakatawan. Saya la so panaon ed amin a panaon. Nia, say Ari so manuuley la! Sikayo ray manangiyabawag to. Kanian iyabawag, iyabawag, iyabawag so Ari tan say panarian to.” Saray wadman tan amin a totoo na Dios ed interon mundo et malikeliket ya angawat ed satan ya imbitasyon.

⁷ Nen 1931, diad sakey a kombension ed Columbus, Ohio, malikeliket ya inawat na Saray Estudyante na Biblia so ngaran ya Saray Tasi nen Jehova. Insan nen 1935, diad Washington, D.C., impaliwawa nen Brother Rutherford no siopa ray kabiangan na “baleg ya ulop” ya adeskribe ed Apocalipsis ya ‘akaalagey diad arap na trono tan arap na Kordero.’ (Apo. 7:9-17) Nen 1942, legan na Sankamundoan a Guerra II, maligsan impaliwawa nen Nathan H. Knorr so teman “Peace​—Can It Last?” Impaliwawa to ditan so nipaakar ed “ambalbalangan atap ya ayep” a walad Apocalipsis 17 tan imbaga ton wala ni nagawan malaknab a panagpulong kayari na guerra.

8, 9. Akin a makapaseseg iray kombension?

⁸ Nen 1946, diad “Glad Nations” a kombension ya agawad Cleveland, Ohio, impaliwawa nen Brother Knorr so teman “The Problems of Reconstruction and Expansion.” Oniay imbaga na sakey ya brother nipaakar ed liket na saray inmatendi: “Wala ak ed benegan to nen manpapaliwawa, tan legan ton ibabaga iray plano nipaakar ed pamaawang ed home tan pabrika na Brooklyn Bethel, agmanunday tipak na saray inmatendi. Anggan wala kad arawi et nanengneng moy liket na balang sakey ed sikara.” Diad sakey ya internasyonal a kombension diad New York City nen 1950, maliket ya inawat na saray delegado so New World Translation of the Christian Greek Scriptures, say unonan kabiangan na modernon lenguahe a patalos na Biblia ya angipawil ed ngaran a Jehova diad nepeg a pasen to.​—Jer. 16:21.

⁹ Saray kombension ya inorganisa kayari na panamasegsegang odino pananebel et talagan makapaseseg. Singa bilang, imbaga nen Hitler a pateyen ton amin iray Tasi nen Jehova diad Germany. Balet nen 1955, 107,000 a Tasi so inmatendid kombension diad Nuremberg, say mismon lugar ya angiyanunsioan nen Hitler ed satan kaiba iray manusuportad sikato. Agnapokpokan na dakel a wadman so lua da lapud liket! Maslak ed saray 166,518 a delegado diad taloran “Godly Devotion” a kombension diad Poland nen 1989 et nanlapud Soviet Union tan Czechoslovakia, tan arum ni ran bansa ed Eastern Europe. Parad arum, satan so sankaunaan a pantitipon a masulok ya 15 anggad 20 ya agagi so inmatendi. Tan imadyin yo pay liket ed 1993 a “Divine Teaching” International Convention diad Kiev, Ukraine ya 7,402 so nampabautismo​—say sankatageyan a bilang na impanbautismo na Saray Tasi nen Jehova.​—Isa. 60:22; Ag. 2:7.

10. Anton kombension so agmo nalinglingwanan, tan akin?

¹⁰ Nayarin wala ray distrito odino internasyonal a kombension ya agmo nalinglingwanan. Kasin nanonotan mo ni imay unaan a kombension ya inatendian mo odino sanen nampabautismo ka? Makatantanda irayan espiritual ya ebento parad sika. Kanian, pablim iratan!​—Sal. 42:4.

11. Anto ran piesta so ingganggan na Dios ya atendian na saray Israelita?

¹¹ Ingganggan nen Jehova a mamitlon mantitipon iray Israelita ed Jerusalem kada taon parad Piesta na Andi-lebaduran Tinapay, Piesta na Simsimba (a tinawag met ya Pentecostes), tan Piesta na Kobongkobong. Nipaakar ed saraya oniay ingganggan na Dios: “Mamitlo ed sakey taon a nepeg na lalaki a totoom so ompatnag ed Katawan a Jehova.” (Exo. 23:14-17) Lapud panamablid sarayan espiritual a piesta, onaatendi iray kaamaan kaibay interon pamilya ra.​—1 Sam. 1:1-7; Luc. 2:41, 42.

12, 13. Antoy kaukolan a gawaen na saray Israelita pian makaatendi rad tinaon a piesta?

 ¹² Nonot yo pa labat so sakripisyon kaukolan a gawaen na sakey ya Israelitan pamilya pian makaonlad Jerusalem. Singa bilang, kaukolan di Jose tan Maria so manbiahe na 100 kilometro manlapud Nazaret anggad Jerusalem. Naisip mo ta la no panon karukey itan ya biahe, lalo la ta kaiba iray ugugaw? Say salaysay nipaakar ed imbisita nen Jesus ed Jerusalem sanen sikatoy ugaw ni et mangipapanengneng a saray kakanayon tan kakaaro to et manbabansag a manbiabiahe. Talagan mairap itan ed sikara ta kaukolan day panaon parad pambiahe, pangiparaan na naakan, tan pananap na natuloyan diad sananey a lugar. Balet, amta tayon aliwan delikado so pambiahe ed saratan a lugar ta si Jesus ya 12 años ni labat et naabuloyan a manakar-akar. Talagan ag-itan nalinglingwanan, lalo na saray ugugaw!​—Luc. 2:44-46.

¹³ Sanen nanayam la ray arum ya Israelita ed sananey a lugar, saray onaatendi ed sarayan piesta et manlalapu lad nanduruman bansa. Nen Pentecostes 33 C.E., saray Judio tan proselitan linma ed Jerusalem et nanlalapud Italya, Libya, Creta, Asia Minor, tan Mesopotamia.​—Gawa 2:5-11; 20:16.

14. Panon ya agunggonaan iray Israelita diad iyaatendi rad saray tinaon a piesta?

¹⁴ Parad saray matoor ya Israelita, say sankaimportantian tan makapaliket ed saratan a panagbiahe et say pandayew ed si Jehova kaibay nilibon mangaarod sikato. Antoy alikna na saramay inmatendi? Naamtaan so ebat ed imbaga nen Jehova ed saray totoo to nipaakar ed Piesta na Kobongkobong: “Manliket ka naani ed piestam, sika tan say laki ya anak mo, tan say bii ya anak mo, tan say laki ya aripen mo, tan say bii ya aripen mo, tan say Levita, tan say sangkaili, tan saray ulila, tan say bii ya balo ya wala ed loob na saray pulongpintom. Pitoy agew mo naani a ngilinan so sakey a piesta nen Jehova a Dios mo ed pasen a pilien naani nen Jehova, ta si Jehova a Dios mo bendisyonan to ka naani ed saray amin ya anien mo, tan amin a pansagpotan na saray limam, et masayaksak ka naani ed amin.”​—Deu. 16:14, 15; basaen so Mateo 5:3.

15, 16. Anto la ran sakripisyoy ginawa yo pian makaatendi ed saray kombension, tan akin ya abawbawi sagpot yo?

¹⁵ Sarayan piesta ed Jerusalem et maabig ya alimbawa parad totoo na Dios natan. Anggan dakel lay angumanan, agnin siansia asalatan so manunan gagala na saray kombension. Singa saray totoo na Dios nensaman, amin tayo et kaukolan a mansakripisyo pian makaatendi. Balet, talagan nabawbawi sagpot tayo. Sarayan pantitipon et importantid panagdayew tayo. Ditan et naaawat tayo iray impormasyon tan pakatalos a kakkaukolan pian mansiansian maapit so relasyon tayod Dios. Napakiwas itayo na sarayan kombension ya iyaplika iray naaralan tayo, ontulong a napaliisan iray problema, tan mamaseseg ed sikatayon iyuna iray bengatlan peteg mamaliket ed sikatayo.​—Sal. 122:1-4.

¹⁶ Talagan makapaliket so onatendi ed sarayan kombension. Oniay report nipaakar ed baleg a kombension ya agawa nen 1946: “Makapalikliket a nanengneng iray dakerakel ya agagin nantitipon ed saksakey a pasen, lalo la no narengel moy orkestran mantogtog na saray Kingdom song a babansagan na saray inmatendi pian idayew si Jehova.” Intuloy ni na report a dakel iray namboluntaryo ed saray departamento tan malikeliket dan panlilingkoran iray agagi. Kasin aliknam met lay ontan a liket  diad saray distrito odino internasyonal a kombension?​—Sal. 110:3; Isa. 42:10-12.

17. Anto ray pananguman diad pangoorganisa ed saray kombension?

¹⁷ Wala ray pananguman diad pangoorganisa ed saray kombension. Singa bilang, nanonotan ni na saramay lingkor na Dios nensaman so waloy agew a kombension! Walay kabuasan, ngarem, tan labin sesyon. Kabiangan na programa so panagpulong. Pigaran parte so onggagapod alas-nuebe ed kabuasan, tan wala ray sesyon ya anggad alas-nuebe ed labi. Mansasagpot a maong iray boluntaryo pian iparaan so almusal, ugto, tan pangdem na saray onatendi. Natan et aliwa lan andukdukey iray kombension a singa nensaman, ipaparaan lan masakbay na kada pamilya tan indibidual so naakan da pian nisentro day imano rad saray programa.

18, 19. Anto ran parte na kombension so tatalaranan mo, tan akin?

¹⁸ Wala ray parte na programa a talagan tatalaranan tayo. Singa bilang, naawat tayoy ‘naakan diad dugan panaon’ panamegley na saray paliwawa tan balon release a publikasyon ya ontutulong ed sikatayon lalon natalosan iray propesiya tan bangat na Biblia. (Mat. 24:45) Sarayan ni-release a literatura et ontutulong ed saray mapaabeban totoo a naamtaay katuaan. Saray marakdakep a drama a base ed Biblia so mamapaseseg ed sikatayon amin ya usisaey motibo tayo diad panlilingkor ed si Jehova tan mamoprotektad sikatayo manlapud saray pananesdes na sayan mundo. Ontulong met ed sikatayo so paliwawad bautismo ya nonoten no anton talagay prayuridad tayo. Tan makapalikliket ya nanengneng so arum diad pangidedika ray bilay dad si Jehova diad bautismo.

¹⁹ Diad nilibo lan taon, kabiangan na dugan panagdayew iray kombension ya ontutulong ed sikatayon maliket a manlingkor anggan diad mairap iran situasyon. Sarayan pantitipon so mamapaseseg ed sikatayo, mangiiter na pankanawnawan nawalaay balon kakaaro, naapresyay sankamundoan ya impanaagi tayo, tan manunan paraan ya uusaren nen Jehova pian bendisyonan tan asikasoey totoo to. Seguradon labay tayoy manplano lan masakbay pian naatendian so amin ya sesyon na kada kombension.​—Uli. 10:22.