Si Ong-Li et sakey ya Tasi nen Jehova diad Bulgaria. Sakey ed saray iyaaralan to na Biblia et si Zlatka, pero agmanaaral na Biblia so asawa nen Zlatka. Imbaga nen Ong-Li: “Nen aaralen mi lay nipaakar ed pamilya, indanet ko ya importantin ibaga tayo ed asawa tan ananak tayo ya inar-aro tayo ira. Ninmengneng ed siak tan maermen ton imbaga ya anggad kapigan et agto nin balot asali ya imbaga ed asawa tan ed siameran taon ya anak to ya inaro to ira!”

 Inkuan nen Zlatka, “Sarag kon gawaen so anggan anto parad sikara, pero atan labat so agko nasarag ya ibaga.” Intuloy to ni, “Agbalot imbaga nen nanay ko ya inaro to ak, tan anggan si baik et agton balot imbaga ya inaro toy nanay ko.” Kanian impanengneng nen Ong-Li ed si Zlatka diad Biblia ya mismon si Jehova et imbaga ton inaro to si Jesus. (Mateo 3:17) Pinaseseg toy Zlatka ya ipikasi to itan ed si Jehova tan pansagpotan ton ibaga ed si mister to tan ed anak to ya inar-aro to ira.

 Imbaga nen Ong-Li: “Kalabas na duaran agew, malikeliket ya inistorya nen Zlatka ya impikasi to itan ed si Jehova. Nen sinmabi si mister to, imbaga to iray nanaaralan tod Biblia ya importantin respetoen tan aroen na asawan bii so mister to. Insan, imbaga tod si mister to ya inar-aro to! Nen sinmabi so anak da, nilakap nen Zlatka tan imbaga ton inar-aro to! Inkuan nen Zlatka ed siak: ‘Alemlemew so liknaan ko. Abaybayag kon ag-ibabalikas so liknaan kod sikara, balet diad tulong nen Jehova, nibagak a siansia ya inar-arok so pamilyak.”

 “Kayari na sakey simba,” so imbaga nen Ong-Li, “akabat koy mister nen Zlatka, tan inkuan to: ‘Amayamay so mangibabaga ed siak ya patundaen ko lay Zlatka ya manaral na Biblia, pero baleg so tulong na panaaral toy Biblia diad pamilya mi. Mas maapit kami la tan mas maliket lay pamilya mi.’”