Rerespetoen na saray Tasi nen Jehova iray gobierno tan saray simbolo ya mangirerepresenta ed saratan. Rerespetoen mi met iray totoon labay day mibiang ed pledge of allegiance, mansaludo ed bandira, odino mangansion na national anthem.

 Balet aglabay na saray Tasi nen Jehova so mibiang ed ontan iran seremonya ta manisia kami ya kontra iratan ed saray bangat na Biblia. Misalamat kamin maong no respetoen met na arum iray papanisiaan mi, a singa panrerespeto mi ed saramay dumay pananisia ra.

Diad sayan artikulo

•  Anto ran bangat na Biblia so nalalanor?

•  Panon to no igaganggan na batas so pibiang?

•  Kasin walay papanigan na saray Tasi nen Jehova ya isyu ed social odino politika?

 Niay duaran importantin bangat na Biblia ya akaapekto ed desisyon mi:

•   Say Dios labat so makanepegan ed panagdayew tayo. Ibabaga na Biblia: “Si Jehova a Dios mo so nepeg mon dayewen, tan sikato labat so nepeg mon panlingkoran.” (Lucas 4:8) Diad saray pledge of allegiance tan national anthem, kaslakan et wala ray salitan bibitlaen ya ipropromisa na sakey ya mas iyuna ton suportaan odino aroen so bansa nen say antokaman. Kanian agnaako na konsiensia na saray Tasi nen Jehova so pibiang ed ontan iran seremonya.

   Ontan met, parad saray Tasi nen Jehova, say pansaludo ed bandira et sakey a klase na panagdayew, odino idolatriya, ya ibabawal na Biblia. (1 Corinto 10:14) Bibidbiren na arum ya historian ya diad tua, saray bandira na bansa et singa met simbolo na relihyon. “Say nasyonalismo et singa relihyon ya say manunan simbolo na pananisia to tan say sentro na panagdayew to et say bandira,” so insulat na historian ya si Carlton J. H. Hayes. a Oniay naobserbaan na autor ya si Daniel P. Mannix ed saray akaunan Kristiano nensaman: “Aglabay na saray Kristiano . . . so manbagat ed guardian angel na [Romanon] emperador—mipara itan ed agpansaludo ed bandira natan.” b

  Anggano agmansasaludo ed bandira iray Tasi nen Jehova, agmi itan dederalen, popoolan, odino manggawa na antokaman ya agpanrespeto ed satan odino ed arum nin simbolo na bansa.

•   Amin ya totoo et pantay-pantay ed arap na Dios. (Gawa 10:34, 35) Ibabaga na Biblia ya “manlapud sakey a too et ginawa toy amin a nasyon na totoo.” (Gawa 17:26) Lapud satan, manisia iray Tasi nen Jehova ya agnepeg ya ipasen a mas atagey so antokaman ya etnikon grupo odino nasyonalidad nen say arum. Papagalangan mi amin ya totoo, inerman so nanlapuan da odino panaayaman da.—1 Pedro 2:17.

 Saray Tasi nen Jehova et aliwan kontra ed gobierno. Manisia kami ya saray gobierno et kaiba ed “uksoyan na Dios” ya aabuloyan ton niwala. (Roma 13:1-7) Manisia kami met ya nepeg ya unoren na saray Kristiano iray sekular ya autoridad.—Lucas 20:25.

 Panon to balet no mankontraan so batas na gobierno tan say ganggan na Dios? Wala ray situasyon ya nayarin pormal ya kerewen ed gobierno ya umanen da ray batas. c Balet no aliwan posible so pananguman, marespeto ya pipilien na saray Tasi nen Jehova ya “unoren so Dios bilang manuley imbes a saray totoo.”—Gawa 5:29.

 Anggapo. Ag-ompapanig ed saray isyu ed social tan ed politika iray Tasi nen Jehova. No agkami mibibiang ed saray pledge of allegiance, pansaludo ed bandira, odino pangansion na national anthem, aliwan lapud aktibista kami na politika. Noagta, uunoren mi labat iray nibased Biblia iran papanisiaan mi nipaakar ed saratan ya seremonya.