Imagina bo e siguiente escena: David ta core rond den su auto, pero e no ta reconoce nada den e bisindario ey. E borchinan di trafico y e paisahe ta mustra cu e no ta caminda e mester ta. David ta realisa cu e no sa na unda e ta. Casi sigur el a drenta un caminda robes.

Si ta abo ta David, kico abo lo haci?

Bo tin varios opcion:

1. Puntra un hende pa yuda bo.

2. Uza un mapa of GPS.

3. Keda core rond y spera cu di un manera of otro lo bo haya sa unda bo tin cu bay.

Ta claro cu e opcion C ta esun cu ta duna bo menos chens di haya e caminda corecto bek.

Opcion B ta mas mihor cu e prome opcion. Al fin y al cabo, e mapa of e GPS t’ey pa yuda bo y guia bo durante henter e caminda.

Bijbel ta mescos cu un mapa of GPS.

E buki mas bendi aki por:

• Yuda bo trata cu problema di bida.

• Yuda bo siña conoce bo mes y bira un mihor persona.

• Mustra bo cu no tin un mihor bida cu esaki.

For di ora nos cuminsa papia, nos ta haci pregunta.

• Dicon cielo ta blauw?

• Di kico strea ta traha?

Despues nos ta cuminsa haci pregunta tocante e mundo cu nos ta biba aden.

• Pakico cos malo ta pasa?

• Dicon hende ta muri?

Kico si resulta cu semper e contestanan pa e preguntanan aki tabata den Bijbel?

Hopi hende ta bisa cu Bijbel ta yen di mito y leyenda, cu e ta un buki anticua of mucho dificil pa compronde. Pero esey ta berdad? Of e problema tin di haber cu loke hende ta pensa di Bijbel? E hendenan aki por ta mal informa?

Por ehempel, tin hende ta pensa cu Bijbel ta bisa cu ta Dios tin e mundo aki bou di su control. Pero, con esey por ta? E mundo aki ta bay di malo pa pio. Tur caminda tin dolor y sufrimento, maleza y morto, pobreza y calamidad. Con un Dios di amor por ta responsabel pa tur esaki?

Lo bo tin gana di haya sa e contesta? Loke Bijbel ta bisa tocante ken tin e mundo aki bou di su control kisas lo sorprende bo.

Sin duda, bo a ripara cu e conseho cu e foyeto aki ta duna ta basa riba Bijbel. Testigonan di Jehova ta convenci cu Bijbel ta un fuente confiabel cu por guia nos. Esey ta pasobra e ta “inspira di Dios y ta probechoso pa siña hende, pa reprende y pa corigi.” (2 Timoteo 3:16, 17) Ta bale la pena pa analisa e buki aki cu ta antiguo y a la bes moderno.