Loke Nos Mester Haci pa Ta Feliz y Satisfecho
Nos tur—sea cu nos ta soltero of casa, jong of di edad—kier ta feliz y satisfecho den bida. Nos Creador tambe kier esey pa nos. Pesey, el a duna nos bon conseho.
Nos Mester Ta Balente
“Lag’e traha duro, haciendo trabou honrado cu su mannan, pa e por tin algo di comparti cu esun cu ta den necesidad.”—EFESIONAN 4:28.
Nos Creador kier pa nos tin un punto di bista positivo di trabou. Dicon? Un persona balente ta contento pasobra e por percura pa su mes y pa su famia. E lo por hasta yuda un persona den necesidad. Ademas, su doño di trabou lo ta contento cu ne. Pues, un bon trahador tin mas chens di mantene su empleo. Bijbel tin rason, anto, di yama e beneficionan di nos trabou duro un “regalo di Dios.”—Eclesiastes 3:13.
Nos Mester Ta Honesto
“Nos tin e confianza cu nos tin un consenshi limpi, y nos kier comporta nos mes na un manera honesto den tur cos.”—HEBREONAN 13:18.
Si nos ta honesto, nos lo sinti nos bon, nos lo tin paz mental y nos lo drumi mihor anochi. Ademas, otro hende lo confia nos y respeta nos. Hende deshonesto no ta disfruta di ningun di e cosnan ey. De echo, nan consenshi por molestia nan y kisas nan ta biba cu e miedo cu un dia hende lo por gara nan.
Nos Mester Tin un Punto di Bista Balansa di Placa
“Laga boso manera di biba ta liber di amor pa placa, y keda contento cu loke boso tin.”—HEBREONAN 13:5.
Nos mester di placa pa cumpra cuminda y otro cos necesario. Sinembargo, “amor pa placa” ta masha peligroso. E por pone un hende uza mayoria di su tempo y energia pa core tras di placa. Ora un hende ta core tras di placa, su relacion cu su casa por sufri, kisas e no tin suficiente tempo pa pasa cu su yiunan y e por hasta bira malo. (1 Timoteo 6:9, 10) Ademas, un persona cu ta stima placa por cay facil den e tentacion pa ta deshonesto. Un homber sabi a bisa: “Un hende fiel lo ta yen di bendicion, ma esun cu ta pura pa bira rico lo no keda sin castigo.”—Proverbionan 28:20.
Nos Tin Cu Scoge e Mihor Educacion
“Retene sabiduria sano y discrecion.”—PROVERBIONAN 3:21.
Un bon educacion por yuda nos bira un adulto y mayor responsabel. Pero un enseñanza superior so lo no garantisa cu semper nos lo tin loke nos mester ni cu nos lo ta feliz. Si nos kier tin exito den tur loke nos ta haci, nos mester di e educacion cu Dios ta duna nos. Bijbel ta bisa lo siguiente di un persona cu ta scucha loke Dios ta bisa: “Tur loke cu e haci ta prospera.”—Salmo 1:1-3.
You May Also Like
E TOREN DI VIGILANCIA
Abo Ta Gusta Bo Trabou?
Wak algun conseho practico di Bijbel cu por yuda bo haya goso y satisfaccion den bo trabou.
SPIERTA!
Bo Ta Mucho Druk?
Hopi hende ta haya cu ta dificil pa parti nan mes entre trabou y famia. Kico ta e problema? Con por solucion’e?
SPIERTA!
E Caminda Cu Ta Hiba na Felicidad—Keda Contento Cu Loke Bo Tin y Sea Generoso
Hopi hende ta midi felicidad y exito a base di placa y cos material? Pero acaso placa y cos material ta haci hende berdaderamente feliz? Wak si esey ta berdad of no.
