Nos universo semper a existi?

Genesis 1:1 ta bisa: “Na principio Dios a crea e cielonan y Tera.”

Te cu rond di añanan ‘50, hopi cientifico conoci tabata kere cu nos universo semper a existi. Pero a base di loke nan a descubri recientemente, mayoria di cientifico ta reconoce awor cu nos universo tabatin un comienso.

Con Tera tabata originalmente?

Genesis 1:2 y 9 ta bisa cu ora Tera a ser crea, e tabata “sin forma y bashi”, tapa cu awa.

Cientificonan ta di acuerdo cu e descripcion ey. Biologo Patrick Shih a bisa cu nos planeta a cuminsa cu “un atmosfera sin oxigeno pa por a hala rosea ... E tabata parce un escena di un pelicula di ciencia ficcion.” E revista Astronomy a bisa: “Investigacion recien ta mustra cu na principio planeta Tera tabata cubri cu awa, casi bo no por a mira tera seco.”

 Con nos atmosfera a cambia a traves di tempo?

Genesis 1:3-5 ta indica cu ora luz a cuminsa penetra door di e atmosfera, e fuente di e luz no tabata visibel for di superficie di Tera. Ta mas despues numa solo y luna a bira visibel for di riba Tera.—Genesis 1:14-18.

Smithsonian Environmental Research Center a bisa cu na principio nos atmosfera a permiti solamente luz dof yega riba Tera. El a sigui bisa: “Druppel di metano den aire a cubri henter e Tera recien crea cu un neblina.” Despues, “e neblina di metano a kita y cielo a bira blauw.”

Den ki orden sernan bibo a cuminsa aparece riba Tera?

Genesis 1:20-27 ta bisa cu pisca a ser crea prome, despues para, despues bestia cu ta biba riba tera y finalmente hende. Cientificonan ta kere cu pisca tabat’ey hopi prome cu e prome mamiferonan y cu hende a bin mucho mas despues.

Algun hende ta bisa cu Bijbel no ta na harmonia cu loke cientificonan a descubri. Sinembargo, hopi bes hende ta bisa e cosnan ey debi na un malcomprendemento di loke Bijbel realmente ta bisa.

Bijbel no ta bisa cu nos universo of Tera ta existi pa solamente 6.000 aña. Mas bien, e ta djis bisa cu nos universo y Tera a ser crea “na principio.” (Genesis 1:1) Bijbel no ta bisa exactamente cuanto tempo pasa esey tabata.

Bijbel no ta bisa cu tur bida riba Tera a ser crea den seis dia di 24 ora. Mas bien, e ta uza e palabra “dia” pa referi na un periodo di tempo. Por ehempel, Genesis capitulo 1 ta papia di seis periodo di tempo cu ta ser yama “dia.” Bijbel ta bisa cu e creacion di nos planeta i di bida riba nos planera—cu a sosose durante e seis periodonan di tempo menciona na Genesis capitulo 1—a tuma luga den e periodo di tempo cu Bijbel ta yama “e dia cu SEÑOR Dios a traha Tera y cielo.” (Genesis 2:4) Pues, cada un di e seis “dianan” di creacion cu Dios a uza pa prepara Tera y crea bida riba dje por ta periodo di tempo hopi largo.

Bijbel no ta bisa cu sernan bibo no por experencia cambio a traves di tempo. E buki di Genesis ta bisa cu bestia a ser crea “segun nan sorto.” (Genesis 1:24, 25) E palabra “sorto” den Bijbel no ta un termino cientifico, pero e por referi na un variedad grandi di organismo bibo. Pues, bou di un “sorto” bo por haya diferente especie of variedad. Pa e motibo ey, tin cambio cu por tuma luga den un “sorto” a traves di tempo den e mesun area cu ta resulta den diferente variedad of especie. Pero nan ta keda cay bou di mesun “sorto.”

 Kico abo ta pensa?

Manera nos a mira mas prome, Bijbel ta splica na un manera simpel y exacto con nos universo a cuminsa, con Tera tabata originalmente y con bida a cuminsa. Pues, no ta posibel tambe cu Bijbel a identifica corectamente Esun cu a crea tur e cosnan ey? Encyclopædia Britannica ta bisa: “Origen di bida [como] resultado di un suceso sobrenatural, no ta bay contra di conocemento cientifico actual.” *