Rose a bisa: “Mi tin un problema genetico cu ta pone cu constantemente mi tin dolor fuerte. Mi calidad di bida a bay atras drasticamente.” Un di su preocupacionnan di mas grandi tabata cu tin bes e no por a concentra ora e ta studia Bijbel y otro asuntonan spiritual. Pero e palabranan di Hesus na Mateo 19:26 a yud’e hopi: “Pa Dios tur cos ta posibel.” Rose a haya sa cu tin mas cu un manera di studia. Como cu e dolornan ta asina fuerte, tin bes ta casi imposibel pa e lesa, pero el a cuminsa scucha grabacion di Bijbel y literatura biblico. * El a bisa: “Mi no sa con otro lo mi por a cuida mi relacion cu Dios.”

Ora cu Rose ta tristo pa motibo cu e no por haci loke cu e tabata por a haci antes, e ta haya consuelo den e palabranan na 2 Corintionan 8:12: “Si e disponibilidad t’ey prome, loke un hende ta duna ta specialmente aceptabel pa Dios ora esey ta segun loke e tin, no segun loke e no tin.” E palabranan ey ta recorda Rose cu Dios ta contento cu loke e ta haciendo, pasobra e ta haciendo tur loke e por segun su circunstancia.

Delphine, kende nos a menciona anteriormente, a bisa: “Despues cu mi yiu muher di 18 aña a fayece, e dolor tabata asina profundo cu m’a kere cu lo mi no por sigui biba. Nada lo no ta mescos mas.” Pero el a haya gran consuelo na Salmo 94:19, caminda e salmista ta bisa Dios: “Den e multitud di mi preocupacionnan den mi, bo consuelonan ta alegra mi alma.” Delphine a bisa: “Mi a haci oracion na Jehova pa e yuda mi haci loke cu lo yuda calma mi dolor.”

El a tene su mes ocupa cu trabou boluntario. Cu tempo el a cuminsa compara su mes cu krijt. Hasta krijt kibra bo por uza. Di igual manera, maske el a sinti cu e tabata kibra, el a siña cu ainda e por a yuda otro hende. E ta corda: “Diripiente mi a realisa cu ora mi tabata uza principio di Bijbel pa consola mi studiantenan, Jehova tabata uza esey pa alivia mi y consola mi.” El a traha un lista di personahe biblico cu a pasa den periodonan di tristeza profundo.Delphine a realisa esaki: “Sin excepcion, nan tur tabata hende di oracion.” Tambe el a siña cu “bo no por haya contesta si bo Bijbel ta cera.”

Delphine a siña algo mas ora e tabata studia Bijbel.E mester a focus riba futuro, no riba pasado. E speransa cu Echonan 24:15 ta papia di dje ta consola Delphine: “Lo bay tin un resureccion di tanto hende husto como inhusto.” Con sigur e ta cu Jehova lo resucita su yiu? Laga Delphine mes contesta: “Mi ta mira mi yiu den futuro. Ta comosifuera nos siguiente cita ta marca caba riba mi Tata su kalender. Cla cla mi ta mira ami cu mi yiu den nos hofi; mes cla cu mi ta corda yen di ternura e momento cu el a nace.”