CUA di e dos opinionnan aki bo ta di acuerdo cu ne? Hopi hende ta gusta e palabranan di Saulo di Tarso, mihor conoci como apostel Pablo. Dicon? Pasobra su palabranan ta animante y ta duna consuelo. (Echonan 17:26, 27, BS) Den Bijbel tin otro textonan cu tambe por anima nos. Por ehempel, loke Hesus a bisa den un oracion a duna su discipelnan e siguransa cu nan por siña conoce Dios y haya su bendicion.—Juan 17:3.

Pero, filosofonan manera Filo tabatin un otro punto di bista. Nan tabata pensa cu nunca nos lo por siña conoce Dios pasobra ta imposibel pa nos comprond’e. Pero e pregunta ta: Ken tin rason?

Bijbel ta bisa francamente cu tin algun cos di Dios cu ta dificil pa hende compronde, manera entre otro su mente, su sabiduria y su existencia. Dicon? Pasobra eseynan ta cosnan cu hende no por midi ni calcula ni investiga. Sinembargo, esaki no ta stroba nos di siña conoce Dios. Al contrario, si bo medita riba e cosnan ey, lo bo por “hala cerca Dios.” (Santiago 4:8) Laga nos considera prome algun cos cu ta dificil pa compronde tocante Dios.  Despues nos lo trata cosnan cu si nos por compronde.

DIOS SEMPER A EXISTI: Bijbel ta siña nos cu Dios ta existi “for di eternidad te na eternidad.” (Salmo 90:2) Cu otro palabra, Dios no tin principio ni fin. For di e punto di bista di hende, “e cantidad di su añanan ta incalculabel.”—Job 36:26.

Con abo ta beneficia? Wel, Dios ta priminti cu lo bo haya bida eterno si bo siña conoc’e. (Juan 17:3) Acaso bo por pone confianza den e promesa ey si Dios mes no ta biba pa semper? Ta solamente “e Rey di eternidad” por cumpli cu e promesa ey.—1 Timoteo 1:17.

DIOS SU MENTE: Bijbel ta siña nos cu Dios “su comprondemento ta inscudriñabel” pasobra su pensamentonan ta mas halto cu nos pensamentonan. (Isaias 40:28; 55:9) Pues, e contesta di e siguiente pregunta ta logico: “Ken a siña conoce e mente di Jehova pa e instruye?”—1 Corintionan 2:16.

Con abo ta beneficia? Dios por scucha oracion di miyones di hende na mesun tempo. (Salmo 65:2) Pero bo mester tin miedo cu Dios ta asina ocupa cu na dado momento e lo no scucha bo oracionnan mas? Claro cu no, e ta hasta ripara ora un mofi cay riba suela. Y Bijbel ta bisa na un manera bon cla cu “[abo] ta bal mas cu hopi mofi.”—Mateo 10:29, 31.

DIOS SU MANERA DI HACI COS: Bijbel ta siña nos cu hende nunca lo “por haya sa e trabou cu Dios a haci for di principio te na fin.” (Eclesiastes 3:11) Esey kiermen cu hamas nos lo haya sa tur cos tocante Dios. E sabiduria cu tin tras di Dios su manera di haci cos ta “ininvestigabel.” (Romanonan 11:33) Sinembargo, Dios ta dispuesto pa revela su manera di haci cos na hende cu kier agrad’e.—Amos 3:7.

Con abo ta beneficia? Si bo lesa y studia Bijbel, semper lo bo sigui siña cosnan nobo tocante Dios y su manera di haci cos. Esey kiermen cu nos lo por sigui hala mas y mas cerca di Dios pa tur eternidad.

E echo cu nos no por compronde tur cos tocante Dios no kiermen cu ta imposibel pa nos siña conoc’e. Bijbel tin masha hopi informacion cu por yuda nos siña conoce Dios mas mihor. Laga nos wak un par di ehempel:

DIOS SU NOMBER: Bijbel ta siña nos cu Dios a duna su mes un nomber. Con yam’e? Beibel na papiamentu koriente ta bisa na pagina 55, den un nota na pia di pagina relaciona cu Exodo 3:14: “Den nos tradukshon e nòmber Yahwe (Yehova) ta tradusí ku SEÑOR ku lèternan kapital.” Pues, e nomber di Dios ta Jehova. Nos ta haya Dios su nomber mas o menos 7.000 biaha den Bijbel, mas cu tur otro nomber.

Con abo ta beneficia? Hesus a bisa den e Oracion di Nos Tata: “Nos Tata cu ta den cielo, bo nomber sea santifica.” (Mateo 6:9) Abo tambe por uza e nomber di Dios den bo oracion. Dicon ta bon pa haci esey? Pasobra Jehova ta dispuesto pa salba tur hende cu ta mustra respet pa su nomber.—Romanonan 10:13.

DIOS SU LUGA DI BIBA: Bijbel ta siña nos cu tin dos tipo di mundo: un mundo spiritual caminda tin solamente criaturanan spiritual y un mundo fisico cu ta consisti di nos Tera y e universo. (Juan 8:23; 1 Corintionan 15:44) Den Bijbel, e palabra “cielo”  hopi biaha ta referi na e mundo spiritual. E Creador su “luga di biba” ta den e “cielo” ey.—1 Reynan 8:43.

Con abo ta beneficia? Bo ta haya un idea mas mihor con Dios ta. E Creador no ta un forsa desconoci cu ta tur caminda y den tur cos. Jehova ta un persona cu ta biba den un luga cu realmente ta existi. Toch, “no tin ningun creacion cu ta scondi for di su bista.”—Hebreonan 4:13.

DIOS SU PERSONALIDAD: Bijbel ta siña nos cu Jehova tin bunita cualidadnan. “Dios ta amor.” (1 Juan 4:8) Dios nunca ta gaña. (Tito 1:2) Dios ta husto, misericordioso, compasivo y e no ta rabia lihe. (Exodo 34:6; Echonan 10:34) Y loke kisas por sorprende hopi hende ta cu e Creador ta desea di tin un “amistad intimo” cu esnan cu ta respet’e.—Salmo 25:14, Versión Israelita Nazarena.

Con abo ta beneficia? Bo por bira amigo di Jehova. Esta un privilegio! (Santiago 2:23) Anto mas mihor bo siña conoce Jehova, mas mihor lo bo compronde relatonan biblico.

Bijbel ta duna nos un bon idea con Jehova Dios ta. Pues, no ta imposibel pa siña conoce Dios. En realidad, e Creador kier pa nos haci esey. E Palabra di Dios ta priminti: “Si bo busc’e, e lo laga bo hay’e.” (1 Cronicanan 28:9) Nos ta anima bo pa lesa Bijbel y medita riba dje pa bo por siña conoce Dios. Si bo haci esey, Bijbel ta priminti cu Dios lo “hala cerca [bo].”—Santiago 4:8.

Kisas bo ta puntra bo mes: Si mi no por compronde tur cos tocante e Creador, con ami lo por bira su amigo? Pero pensa un rato riba e siguiente pregunta: Ta necesario pa e mihor amigo di un ciruhano ta un dokter? Claro cu no! Podise e ciruhano tin un amigo cu tin un profesion completamente diferente. Pero si e amigo sa con e ciruhano ta, kico e ta gusta y kico e no ta gusta, toch nan por tin un bon amistad cu otro. Mescos ta conta si bo kier bira amigo di Dios, bo tin cu siña conoce Jehova su personalidad. Y Bijbel por yuda bo haya sa precies loke bo mester sa pa bo ta amigo di Dios.

Dios no ta un misterio. Al contrario, den Bijbel bo por haya tur detaye cu bo tin mester pa bo siña conoce e Creador. Bo kier haya sa mas tocante Jehova Dios? Testigonan di Jehova ta ofrece bo un curso di Bijbel gratis. Nos ta anima bo pa tuma contacto cu e Testigonan den bo bario of pa bishita nos website, www.dan124.com/jw-paa.