Bijbel ta instrui nos pa no come of tuma sanger. Esey kiermen cu nos no mester acepta sanger ni su componentenan principal den ningun forma, manera den cuminda of pa medio di transfusion. Wak e siguiente textonan di Bijbel:

•   Genesis 9:4. Despues di Diluvio Dios a permiti Noe y su famia come carni, pero e no a permiti nan come sanger. El a bisa Noe: “Solamente, boso no mag come carni cu su bida, esta, su sanger.” (Beibel Santu) E mandamento aki ta conta pa henter humanidad cuminsando desde e tempo ey padilanti, ya cu tur hende ta descendiente di Noe.

•   Levitico 17:14. “Boso no mag come sanger di ningun sorto di carni, pasobra bida di tur carni ta su sanger; ken cu come esaki mester wordo corta kita afo.” (Beibel Santu) Pa Dios, sanger ta representa bida locual ta pertenece na dje. Aunke Dios a duna e ley ey unicamente na e nacion di Israel, nos por compronde cu e ley cu ta prohibi comemento di sanger ta algo serio den bista di Dios.

•   Echonan 15:20. “Abstene ... di sanger.” Dios a duna cristiannan e mesun mandamento cu el a duna Noe. Historia ta mustra cu e cristiannan di prome siglo a nenga di come sanger, y no a uz’e tampoco pa motibonan medico.

Dicon Dios ta manda nos abstene di sanger?

 Tin bon motibo medico pa evita transfusion di sanger. Pero mas importante ainda, Dios a duna nos e mandamento pa abstene di sanger pasobra loke sanger ta representa ta sagrado p’e.—Levitico 17:11; Colosensenan 1:20.