“Esposonan mester stima nan esposa manera nan mes kurpa. Esun ku ta stima su esposa ta stima su mes, pasobra ningun hende hamas a odia su mes kurpa; ma e ta aliment’é i trat’é ku masha kariño.”—EFESIONAN 5:28, 29.

Un esposo ta kabes di su famia. (Efesionan 5:23) Un bon esposo no ta brutu ni eksigente. E ta balorá su esposa, ta perkurá p’e materialmente i ta tene kuenta ku su nesesidat emoshonal. E ta hasi su bèst pa hasi su esposa kontentu. Un esposo no ta insistí pa semper hasi loke e ke. (Filipensenan 2:4) E ta kompartí ku su esposa loke e ta pensa i sinti, i e ta skucha su esposa ora su esposa ta papia kuné. E no ta “rabia amargamente” ku su esposa, i e no ta maltrat’é físikamente ni hùrt e emoshonalmente.—Kolosensenan 3:19.

“E esposa mester tin rèspèt profundo pa su esposo.”—EFESIONAN 5:33.

Ora un esposa ta respetá su esposo i ta apoyá su desishonnan, e ta kontribuí na pas den su famia. Si e esposo hasi algu robes, e esposa no ta pon’é sinti malu. Mas bien, e ta keda trankil i ta sigui demostrá rèspèt. (1 Pedro 3:4) Ademas, ora e mester papia ku su esposo tokante un problema, e ta skohe un bon momento pa hasi esei, i e ta papia ku su esposo na un manera respetuoso.—Eklesiástes 3:7.

“Un hòmber . . . lo uni ku su esposa. I nan lo bira ún karni.”—GÉNESIS 2:24.

Ora un hende hòmber i un hende muhé kasa, nan ta bira un famia uní. Pues, si un pareha kasá hasi esfuerso pa papia ku otro regularmente tokante nan sintimentunan i hasi kos pa otro, nan matrimonio lo ta fuerte. Ademas, pa nan ta fiel na otro, nan no mester tene relashon seksual ku ningun hende ku no ta nan kasá. Ora un esposo òf esposa ta infiel, e ta kousa su kasá hopi doló i e por pèrdè su kasá su konfiansa. Esei por asta kibra un famia.—Hebreonan 13:4.

“Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.”—PROVERBIONAN 22:6.

Dios a duna mayor e responsabilidat pa siña nan yunan. Un di e kosnan ku nan tin ku siña nan yunan ta kon pa komportá nan mes. Ademas, nan mester pone un bon ehèmpel  pa nan yunan. (Deuteronomio 6:6, 7) Ora un mucha komportá su mes malu, un mayor sabí ta keda trankil. Un mayor mester ta “kla pa skucha, slo pa papia, slo pa rabia.” (Santiago 1:19) Si un mayor mester korigí su yu, e mester hasi esei na un manera amoroso i no ku rabia.

“Yunan, obedesé boso mayornan . . . ‘Onra bo tata i bo mama.’”—EFESIONAN 6:1, 2.

Un yu mester obedesé su mayornan i trata nan ku rèspèt profundo. Ora un yu mustra onor na su mayornan, e ta hasi su mayornan kontentu i ta kontribuí na pas den su famia. Un yu ku ya a bira adulto ta onra su mayornan ora e hasi sigur ku nan ta bon kuidá. Esei ta inkluí yuda nan mantené nan kas den bon kondishon òf duna nan yudansa finansiero.—1 Timoteo 5:3, 4.