UN BON nòmber, òf reputashon, ta asina importante den algun pais ku lei ta protehá un hende su reputashon. Esei por inkluí protekshon kontra kalumnia òf akusashon falsu sea por eskrito òf verbal. Esaki ta pone nos kòrda un dicho antiguo: “Bon fama i bon reputashon ta bal mas ku abundansia di oro i plata.” (Proverbionan 22:1, BPK) Kon nos por logra haña un bon nòmber i gana rèspèt di otro hende? Beibel ta duna nos algun sugerensia ekselente kon pa logra esei.

Por ehèmpel, wak loke Beibel ta bisa na Salmo 15. Kon e salmista a kontestá e pregunta: ‘Ken por biba den e tabernakel [òf, tènt] di Dios?’ El a bisa: “Esun ku . . . ta hasi hustisia, i ta papia bèrdat den su kurason. E no ta kalumniá . . . ni ta hasi malu na su próhimo, ni ta lansa reproche kontra su amigu; den . . . su bista e malbado ta despresiá; . . . maske e hura den su desbentaha, e no ta kambia esei . . . ni e no ta aseptá plaka pasá bou di mesa.” (Salmo 15:1-5) Abo lo no respetá un hende ku ta biba segun e bunita prinsipionan ei?

Un otro kualidat ku por yuda bo gana rèspèt di hende ta humildat. Proverbionan 15:33 ta bisa: “Promé ku onor ta bini humildat.” Pensa un ratu riba lo siguiente: Un hende humilde ta mira den ki aspektonan e por mehorá i ta traha duru pa logra esei. Tambe, un hende humilde ta dispuesto pa pidi despensa si e ofendé un hende. (Santiago 3:2) Pero di otro banda, un hende orguyoso ta sinti su mes ofendí lihé. Proverbionan 16:18 ta bisa: “Orguyo ta bini promé ku destrukshon, i un spiritu arogante promé ku kaida.”

Pero, kiko lo bo hasi si un hende daña bo nòmber? Bo mester reakshoná mesora i saka bo rabia? Puntra bo mes: ‘Si mi purba di defendé mi mes, mas hende lo haña sa di e kalumnia?’ Maske tin bes ta apropiá pa bai korte, Beibel ta duna nos un bon konseho: “No sea purá pa pleita bo kaso.” Mas bien, “regla un asuntu ku e persona envolví [BPK].” (Proverbionan 25:8, 9) * Ora nos dil ku e situashon na un manera trankil i kouteloso, nos por skapa tur e plaka ku mester paga na korte i abogado.

Beibel no ta solamente un buki di religion. E ta tambe un buki konfiabel ku por guia nos den nos bida diario. Ora nos apliká e bon konsehonan di Beibel, nos ta kultivá ekselente kualidatnan ku por yuda nos gana rèspèt di hende i un bon nòmber.