Kon Dios Su Nòmber Ta? Dios mes a bisa: “Ami ta Yehova. Esei ta mi nòmber.” (Isaías 42:8, NW) Den Beibel, Dios su nòmber ta ser menshoná un 7.000 biaha. Sinembargo, hopi tradukshon di Beibel a tribi di remplasá Dios su nòmber ku título, manera, “Señor.” Dios ke pa nos ta su amigu, p’esei e ta animá nos pa “invoká su nòmber.”—Salmo 105:1.

Algun Título di Yehova. Beibel ta mustra ku Yehova tin vários título, manera “Dios,” “Todopoderoso,” “Kreador,” “Tata,” “Señor” i “Soberano.” Den Beibel, ora Dios su sirbidónan a hasi orashon na dje, nan a usa tantu su títulonan komo su nòmber, Yehova.—Daniel 9:4.

 Kon Dios Ta? Dios ta un spiritu invisibel. (Huan 4:24) Beibel ta bisa bon kla ku “ningun hende no a mira Dios.” (Huan 1:18) Beibel ta bisa tambe ku Dios tin sintimentu. Hende por kous’é doló òf hasié “kontentu.”—Proverbionan 27:11; Salmo 78:40, 41.

Dios Su Maravioso Kualidatnan. Dios ta trata tur hende meskos, sin importá di ki nashonalidat òf kultura nan ta. (Echonan 10:34, 35) Ademas, Dios ta “yen di kompashon i grasia, kende no ta rabia lihé i kende ta abundá den miserikòrdia i bèrdat.” (Éksodo 34:6, 7) Pero di tur Dios su maravioso kualidatnan, tin kuater kualidat ku ta sobresalí.

Poder. E ta “Dios Todopoderoso.” Esei ke men ku e tin poder sin límite pa kumpli ku tur loke e primintí.—Génesis 17:1.

Sabiduria. Dios su sabiduria ta hopi mas superior ku sabiduria di kualke persona. P’esei, Beibel ta bisa ku e ta “e úniko ku ta sabí.”—Romanonan 16:27.

Hustisia. Dios semper ta hasi loke ta hustu. Tur loke e ta hasi ta “perfekto” i “sin inhustisia.”—Deuteronomio 32:4.

Amor. Beibel ta bisa ku “Dios ta amor.” (1 Huan 4:8) Dios no solamente ta mustra amor, sino e ta amor. Su amor ta asina grandi ku bo por mir’é den tur loke e ta hasi i esei ta benefisiá nos den hopi manera.

Dios Su Amistat ku Hende. Dios ta nos amoroso Tata den shelu. (Mateo 6:9) Si nos pone fe den dje, nos por bira su amigu. (Salmo 25:14) De echo, Dios ta invitá nos pa hala serka dje den orashon i pa “tira tur inkietut riba dje, pasobra e ta interesá den [nos].”—1 Pedro 5:7; Santiago 4:8.

Hesus No Ta Dios. Hesus ta úniko pasobra ta e so Dios a krea direktamente. P’esei Beibel ta yam’é Yu di Dios. (Huan 1:14) Despues di krea Hesus, Yehova a usa su promé yu komo “un trahadó eksperto” pa krea tur otro kos i tur otro ser bibu.—Proverbionan 8:30, 31; Kolosensenan 1:15, 16.

 Hesukristu nunka a bisa ku e ta Dios. En bes di esei, el a splika: “Mi ta [Dios] su representante i ta E a manda mi.” (Huan 7:29) Ora ku Hesus tabata papia ku un di su disipelnan, el a yama Yehova “mi Tata, ku ta boso Tata tambe” i “mi Dios, ku ta boso Dios tambe.” (Huan 20:17) Despues ku Hesus a muri, Yehova a resusit’é pa biba den shelu i el a dun’é gran outoridat na Su man drechi.—Mateo 28:18; Echonan 2:32, 33.

Hesukristu Por Yuda Bo Hala Serka Dios

Hesus a bini na tera pa siña nos tokante su Tata. Yehova mes a bisa tokante Hesus: “Esaki ta mi Yu stimá; skuch’é.” (Marko 9:7) Hesus konosé Dios mihó ku kualke otro hende. Hesus a bisa: “Ningun hende no sa ken e Tata ta, sino e Yu i esun na ken e Yu ke revelá e Tata.”—Lukas 10:22.

Hesus ta reflehá e kualidatnan di Dios perfektamente. Komo ku Hesus a imitá e kualidatnan di su Tata asina bon, e por a bisa: “Esun ku a mira mi, a mira e Tata tambe.” (Huan 14:9) Hesus a yuda hende hala serka Dios pa motibu ku el a imitá e amor di su Tata tantu den loke el a bisa komo den loke el a hasi. Hesus a bisa: “Ami ta e kaminda, e bèrdat i e bida. Ningun hende no ta yega serka e Tata si no ta pa medio di mi.” (Huan 14:6) Tambe el a bisa: “Adoradónan berdadero lo adorá e Tata ku spiritu i ku bèrdat, pasobra, en realidat, e Tata ta buska esnan ku ke ador’é asina.” (Huan 4:23) Imaginá bo! Yehova ta buska hende manera abo ku ke siña konosé e bèrdat tokante dje.