“Di tur e filósofonan griego klásiko, esun ku tabatin mas influensia riba e puntonan di bista tradishonal di Fièrnu ta Plato.”​—Histoire des enfers (Historia di Fièrnu), di Georges Minois, página 50.

“For di meimei di siglo 2 AD, e kristiannan ku a haña sierto edukashon den filosofia griego a kuminsá sinti e nesesidat pa ekspresá nan fe na un manera ku a reflehá e punto di bista di e filósofonan ei . . . E filosofia ku a kuadra mihó ku nan tabata platonismo [e siñansanan di Plato].”​—The New Encyclopædia Britannica (1988), Volúmen 25, página 890.

“E siñansa di Iglesia ta konfirmá ku fièrnu ta eksistí i ku e ta eterno. Inmediatamente despues di morto, alma di hende ku muri den un estado di piká mortal ta baha na fièrnu, kaminda nan ta sufri e kastigu di fièrnu, esta, ‘kandela eterno.’ E kastigu prinsipal di fièrnu ta separashon eterno for di Dios.”​—Katisashi di Iglesia Katóliko, edishon di 1994 (na ingles), página 270.

“E bibunan sa ku nan lo muri, ma e mortonan no sa nada, . . . pasobra no tin ni aktividat ni planifikashon ni sabiduria den Seol, kaminda bo ta bai.”​—Eklesiastés 9:​5, 10.

Algun vershon di Beibel a tradusí e palabra hebreo Seol, ku a referí na “hogar di e mortonan,” komo “fièrnu.” Kiko e teksto bíbliko akí ta revelá tokante kondishon di e mortonan? Nan ta sufri den Seol pa nan paga pa nan fayonan? Nò, pasobra nan “no sa nada.” P’esei mes e patriarka Jòb, tempu ku e tabata sufri teriblemente pa motibu di un enfermedat doloroso, a roga Dios: “Protehá mi den fièrnu [Seol na hebreo].” (Jòb 14:13; Douay-Rheims Version) Su petishon lo tabatin sentido si Seol ta un lugá di tormento eterno? Segun Beibel, fièrnu ta simplemente e graf komun di humanidat, kaminda no tin ningun aktividat.

E definishon akí di fièrnu ta mas lógiko i mas na armonia ku e Skritura, no ta bèrdat? Kua krímen, pa horendo ku e por ta, por pone un Dios di amor torturá un persona pa semper? (1 Juan 4:8) Pero si fièrnu di kandela ta un mito, kiko di bida den shelu?

Wak tambe e versíkulonan di Beibel akí: Salmo 146:3 i 4; Echonan 2:​25-27; Romanonan 6:7 i 23