Nos Lektornan Ta Puntra . . .

Dios Tabatin un Kuminsamentu?

▪ Beibel ta kontestá ku Dios no tabatin kuminsamentu. Semper Dios a eksistí. Kisas ta difísil pa komprondé esei, pero promé ku nos rechasá e konsepto akí, laga nos wak kiko e Skritura ta bisa.

Pa kuminsá nos tin ku atmití ku hende no tin e kapasidat pa komprondé delaster ún detaye di Dios. Manera apòstel Pablo a deklará: “O profundidat di e rikesanan, tantu di e sabiduria komo di e konosementu di Dios! Ki inskudriñabel su huisionan ta i insondabel su kamindanan!” (Romanonan 11:33) Nos no por komprondé e sabiduria i konosementu di Dios kompletamente, meskos ku un beibi no por komprondé e manera di aktua di su mayornan kompletamente. Sinembargo, maske e palabranan inspirá akí di Pablo ta trata prinsipalmente tokante Dios su sabiduria i miserikòrdia, nan ta indiká tambe ku tin sierto aspekto- i obranan di Yehova Dios ku ta muchu profundo pa nos komprondé. E konsepto ku semper Dios a eksistí aparentemente ta un di nan. Pero tòg nos por tin pleno konfiansa den loke Beibel ta siña tokante Dios, pasobra Hesukristu a bisa relashoná ku e Santu Skritura: “Bo palabra ta bèrdat.”​—Juan 17:17.

Moisés a bisa Yehova den un orashon: “Fo’i tur semper i pa semper Bo ta Dios.” (Salmo 90:2, BPK) Pues, segun e palabranan di Moisés, e eksistensia di Dios ta ekstendé den dos direkshon. Di un banda, e ta bai den direkshon di futuro. Beibel ta bisa nos ku Yehova ta “Esun ku ta biba pa semper i semper.” (Revelashon 4:10) Pues, e eksistensia di Dios ta ekstendé te den futuro eterno. Pero su eksistensia ta bai bèk tambe te den pasado infinito. Ku otro palabra, Dios no a ser kreá. E no a kuminsá eksistí na un sierto momento. Mas bien, semper e tabata na bida.

Mayoria di nos tin problema pa komprondé ideanan apstrakto. Sinembargo, tin mas biaha ku nos ta haña nos ku konseptonan difísil pa komprondé. Tuma por ehèmpel sifranan positivo i negativo. Bo por keda konta nan sin stòp nunka, sea konta bai ariba òf konta bai abou. Akaso nos no por hasi meskos ku e añanan di bida di e Kreador?

P’esei ta na su lugá ku ta Dios so ta karga e título “Rei eterno.” (1 Timoteo 1:17) Pensa un ratu: Tantu Hesukristu, komo e gran kantidat di angelnan den shelu, i tambe hende riba tera a ser kreá. Pues, nan tur tabatin un kuminsamentu, ma esei no ta e kaso ku Dios. (Kolosensenan 1:​15, 16) Si un hende ta insistí tòg ku Dios a ser kreá, esei di mes ta lanta e pregunta ta ken a kreá e Kreador anto. Asina ta start un diskushon sin sentido ku no ta kaba nunka. Echo ta ku Yehova so ta eksistí “di eternidat te na eternidat.” (Salmo 90:2) Ku otro palabra, Yehova a eksistí “promé ku tur tempu.”​—Hudas 25.

Tene na mente ku unabes nos sa ku semper Dios a eksistí, esei por tin un gran influensia riba nos bida. E orashon di Moisés, sitá ariba, ta revelá ku e echo ku Dios ta eterno ta un garantia ku lo e kumpli ku Su promesa di duna nos bida eterno. Ounke nos bida aktual ta masha kòrtiku, Beibel ta deskribí Dios sí komo “un refugio di ún generashon te na otro.” Komo un Tata amoroso, Yehova tabat’ei, e t’ei i semper lo t’ei pa su pueblo. Nos ta spera ku e bèrdat maravioso ei ta un konsuelo pa bo!​—Salmo 90:1, BPK.