Pregunta 2: Kiko Lo Pasa ku Mi ora Mi Muri?
ROMAN tabata basta yòn ora un bon amigu di dje a muri den aksidente di outo. El a bisa: “E morto di mi amigu a dal mi masha duru mes. I pa vários aña despues di e aksidente, mi a keda puntra mi mes kiko ta pasa ku nos ora nos muri.”
Dikon ta normal ku hende ta hasi e pregunta ei?
Pasobra hende tin difikultat pa aseptá morto. Sea kual sea nos edat, generalmente nos niun no ke muri. Ademas, hopi hende tin miedu di loke ta bini despues di morto.
Kon algun hende ta kontestá e pregunta ei?
Hopi hende ta kere ku ora un persona muri, un parti di dje ta sigui biba. Nan ta kere ku bon hende ta bai shelu, miéntras ku e malbadonan lo ser kastigá pa semper pa nan pikánan. Otronan ta pensa ku ora un hende muri, e ta stòp di eksistí i ku despues lo e ser lubidá kompletamente.
Kiko e kontestanan ei ta enserá?
E promé kontesta ta asumí ku ora un persona fayesé, e no ta muri kompletamente. E di dos ta indiká ku bida no tin sentido. Anto hende ku ta pensa ku bida no tin sentido, òf propósito, por adoptá e aktitut negativo akí: “Laga nos kome i bebe, pasobra mañan nos ta muri.”—1 Korintionan 15:32.
Kiko Beibel ta siña?
Beibel no ta siña ku un parti di nos ta keda bibu ora nos muri. Dios a inspirá Rei Sálomon pa skirbi: “E bibunan sa ku nan lo muri, ma e mortonan no sa nada.” (Eklesiástes 9:5) Hende ku “no sa nada” no ta konsiente di loke ta pasa rònt di nan. Nan no por sinti ni hasi nada. Pues, e mortonan no por yuda hende bibu ni hasi nan daño.
Kontrali na loke hopi hende ta kere, Dios su propósito no tabata pa hende muri. El a krea Adam, e promé hende, ku e prospekto di biba pa semper riba tera. E úniko momento ku Dios a menshoná morto ta ora el a bisa Adam ku esei ta e kastigu pa desobedensia. Sí, el a prohibí Adam di kome fruta di un sierto palu i a spièrt’é ku si e kome di dje, lo e “muri sigur.” (Génesis 2:17) Si Adam ku Eva lo a keda obedesidu na Dios, nan i tur nan desendientenan ku tabata leal na Dios lo a keda biba pa semper riba tera.
Pero Adam a skohe pa no hasi kaso di e spièrtamentu ku Dios a dun’é. El a peka ora el a desobedesé Dios, i p’esei el a muri. (Romanonan 6:23) Ningun parti di Adam no a keda bibu ora el a muri. Mas bien, ora Adam a muri, el a stòp di eksistí. Dios a bisa Adam: “Ku sodó di bo frenta lo bo kome pan, te ora bo bolbe na tera, pasobra for di dje bo a wòrdu tumá; pasobra stòf bo ta, i na stòf lo bo bolbe.” (Génesis 3:19) I komo ku humanidat kompleto ta desendiente di Adam, nos tur a heredá piká i morto for di dje.—Romanonan 5:12.
Aunke Adam a skohe pa desobedesé Yehova, Dios lo kumpli ku Su propósito pa yena tera ku desendiente perfekto di Adam. (Génesis 1:28; Isaías 55:11) Pronto Yehova lo resusitá mayoria di hende ku a muri. Relashoná ku e tempu ei, apòstel Pablo a bisa: “Lo bai tin un resurekshon di tantu hende hustu komo inhustu.”—Echonan 24:15.
Roman, kende nos a menshoná anteriormente, a studia Beibel i a haña sa loke Beibel ta siña tokante morto i Yehova Dios. Esaki a hasi un efekto profundo riba dje. Bo por lesa su eksperensia ku ta kuminsá na página 11 di La Atalaya di 1 di novèmber 2012.
